لمن تقول “وينو البديـــــــــــــــل؟”
أعرف تمام ذاك السؤآل هو الوهمْ
هو الحبل الفوق رقبتك إنبرم
عشان تعيش خايف ذليل فاقد العشم
لكن نقول ما تشــــــــــــيلو همْ
وينو البديل؟ ياهو دا البديل
محروسة تبْ .. مصمومة صمْ
فرسانا جمْ .. ما ليهو كمْ
فاقو العــــــدد .. كسرو الرقم
فيهم عشم .. فيهم فهم .. زايد زخم
حــــــــــفظو العهود .. أخلو الذمم
شحذو الهِمم والفـُـرقا دي بلموها لمْ
جاينكم لا ناس مكاسب لا نِعمْ
جاينكم بس ناس شغل، بس ناس خدم
لا ناس مراسم لا مواتر لا زخـم
وكل الخراب الفينا دا وكل السجم
نمحاهو بى حبة فهــــــــــــــــم
نســـــــــــــهر عشانك يا وطــن
لمين نختـــــــــــــك في القمم
سودانا دا منذ الأزل ذهل الأمم
كان الحضارة والشطارة والقلم
وما تشـــــــــــــــــيلو همِْ
********************
ما تشـيلو همِْ جيشنا الأمين الخاتى ذمْ
جيشنا الأمين حِصــناً منيع ما فيهو رَمْ
جيشنا الأمين حالف يمين حالف قسم
واطـــــــــــــاتنا دى كفاها دم
والجــــدّ وجب والجــــــدّ لزم
جيشنا الأمين حالف يمين حالف قسم
قــــــــالكم : يا ناس .. يا بلد ..
شايلنكم رآيا وعـــــــــلم
ناس الشرق .. ناس الشمال
ناس الغرب .. ناس الجنوب
ناس الوسط .. عِقــد الربوع الإتنضـم
حارسينكم وطناَ حبيب للناس أعم
وهـــــــو الأهـــــــمْ
عارفينكم أخــــــوان لزم
أما الغشــــــــيم المُعتدي
بنلجموا .. وما تـشيلو همْ
•••••••••••••••••••••
د. شـــــــهاب طه
٧ ديسمبر ٢٠١٦
نعم للعصيان المدني السلمي في ١٩ ديسمبر ٢٠١٦
sfmtaha@msn.com
