ـ اول شي الحمد لله على بداية مشوار المدنية ومبرووك يا أهلي الطيبين والله تستاهلوا الافراح بالزيادة..وربي يرحم شهداء الثورة ..وما ننسى انو المدنية اتمهرت بالدم الغالي والارواح العزيزة.. ـ اول ملاحظة في الحفل ان السادة اعضاء المجلس العسكري الانتقالي كانت وشوشهم كعبة شديد..اي والله كالحة جدا ..(عاملين زي الزول الشامي ليهو عفنة)وزي القاعدين في بيت بكا في اغلب اللحظات والابتسامات يوك وبالتلتلة..والبرهان وشو ضعف شديد جدا..ما عارف ده من الهم..ولا عليه مراجعة الطبيب والسكري..غايتو حميدتي عامل انا الصابر عليك يا هم ومجلد وشو..والغريبة صلاح عبد الخالق مفروض يعرف انو الزول لمن تكون امكانيات وشو ضعيفة جدا عليه بالابتسام وفرد الوش..لانو التكشيرة بتزيد الكرفسة وبتزيد المرارة..? عموما السادة العساكر عاملين زي ام العروس الما قبلانة بالعريس..يا ربي يكون من اثر تقليص السلطات المطلقة الجاي ده ولا من المدنية..بِس? ـ ناس قوى الحرية والتغيير كانوا مفرهدين بالابتسامات الانيقة على الشفاه..☺ ـ بعدين كونوا الولد الاشم ناجي الاصم يلقى ذلك الخطاب القوي الجميل..ده حيسبب طمام وخمة نفس وشحتفة وبرودة في الاطراف وألم في عضم الصاصويا لناس كتااار..غايتو ناس ق ح ت بقوا بتاعين مغارز..??? ـ الرؤساء الافارقة كانوا فرحانين اكثر من باقي الضيوف..وأبي أحمد كان النجم الاول?..وظهرت محبة اهلنا له ولاثيوبيا بالترحيب الحار والصفقة فوق والوقفة ليك يا أبي احمد ..حتى جات بعدها تحية رئيس وزراء مصر وكانت باهتة جدا..?ياااخ فعلا باين زمن الغتغتة والدسديس انتهى..? ـ للاسف منظمي الحفل فيهم شي كتير من الكوزنه..والاحتفال كان ناقص بس يجي بشه يرقص والجماعة يهزوا برفع الاصبع السبابة فوق..معقول يااخ? ـ للاسف تم قتل (يا شعبا لهبك ثوريتك) رائعة شاعر الشعب محجوب شريف وهرم افريقيا محمد وردي رحمهم الله..من كل نواحي الاداء والمزك..ويا ريت لو كان جابوا النشيد الاصلي بصوت وردي..? ـ بالامس الموهوم عبد الحي يوسف وهو في غيه المتواصل والتجارة بالدين..دعى وتمنى امنية سيئة بأن يحدث الله امرا يمنع التوقيع على وثيقة الحرية والمدنية ..والحمد لله ربنا اكرم شعب السودان وتم التوقيع..بس لازم ناس الحكومة المدنية يخلوا بالهم للدبايب دي عموما..? ـ اخيرا نرجوا بعد كده من الكيزان ان يستكينوا ..ويرقدوا على بطنهم براحة ويرخوا اجسامهم عشان بنسلين المدنية يمشي فيهم..? مدنيييياااووو
