الليل شايلو شوق ودانى بلدك شاقى
وشايل ريد سنين شاحن معاها أشواقى
ريحة عنبرو التوّرْ على عشراقى
فتق جرح أزاى يا بدرى وين عشاقى
زولك جاك بزح إلقاك مساهر هامى
وخرمان يا الشهاك شاهيك غدربو ورامى
يا الحادق اللهيج أنا قلبى عشقك رامى
ونبتن فى القلب شتلات هواك وغرامى
ود عينو إن وقع فى العين بنضمن جَهَرو
وفيهو جنس جمال يات من قنصبو انْقَهرو
معدوم متلو مافيش قطْ طبيق فى دَهْرو
يا فرس الرهان مافيش بدالك مهرو
زايد فى السماح دايما بهرشك أسدو
وديمه الناس تحن لى مثلو لمن حسدو
هبار للشرك جبخان قنيصهم فسدو
وتجار الغرام بارت عروضهم كسدو
ماهر فى الكلام تحلف تقول دحدوح
وعزاف للحروف وسط الجميع ممدوح
شدر الريد تظنو بغنى ديمه تسوح
وتفضح سر هواها الكاتمه كلو تبوح
يا راعى الظروف أرواحنا أرعى لحاله
وعقد الريد نجيك بندور تكون حلالا
راكبين فوق تلوب متل التقول رحاله
وأمسح للقديم تبنا الذنوب أمحاله
وقت الباب قفل والشوفه قالو محاله
طلقت فينا نار متل التقول ملاله
العين شاف غزال قام بالصنق فلالا
رجفت روحو لا صاد لا صبح حَلّالّه
بلقيس فى الجمال محروس حراب وسيوف
والزول كان جبل إن شافو بس منسوف
إن مرق الصباح شمس النهار مكسوف
وإن قدل العشاء قمر الطلوع مخسوف
حَجُونا وصنفنا وقالو فيهو حكاوى
وشفنا جمالو فى عين العجوز الراوى
عينو عديل تَشِلْ وكان لمسنا بداوى
نشال للقلوب ما بسويّ زيو الحاوى
munswor@yahoo.com
