نَص من بحر المالح

كيف تتأكد
يا قلبي الداقِّي صفايح الحزن المايله
إنو الغربه صَفاها مُعَكَّر
أمواجا طايله
وإنو الحرب الدايره بلا إضنين دي
تِمساحا بيكبَر
يبلع
يرفِس
يِدَّشَ
يعاود الكَرَّه شهور وسنين
أطرش
أعْسَر
عينيهو جحيم القايله
عصار الليل
مدسوس في زوايا الكرسي العايب
مرصوص زي هم الطفل الشايب
يدوس مستقبل أمَّه
هايج
كاسِر
أبدًا مابْتَفتر أسنانو الهايله
دخيل وبخيل
شِن مُسْتَنِّيَه يا أمي حليمه
وأختي منال
المركب رافضه الجيه
مخنوقه
دُروبا تِلال
وقزاز مسنون
عضام مسحونه
وبعض نعال
وحُرَّاس البحر الكانو
كتار وكبار
غريبه الليله يكونوا شويه
وَدَار وشَتَار
وعجاج الفزعه النبسم ليهو زمان
حِداد في حِداد شفناهو
وُكَيَّه
يا وطن العِزَّه شبابك وين ؟
دا خرابك طال
دا خرابنا الطال
متين نبداهو سَدَاد الدَّيْن ؟!
دي أرضنا ؟!
كان دي أرضنا مُحال !!

عبدالماجد موسى/ لندن

seysaban@yahoo.co.uk