سودانايل أول صحيفة سودانية رقمية تصدر من الخرطوم
أصل الحكاية
زمان كنا بندخل في تحدي لكتابة بعض الاصوات التي نتعامل بها في مخاطبتنا لبعضنا البعض .. مثال لذلك ممكن تقول لي واحد إتحداك أكتب لي صوت يقال عندما تسأل شخص ماشي السوق؟ وبدلا من الاجابة بنعم يخرج من فمه صوت يحمل معني كلمة (نعم) .. ونجتهد في كتابة الصوت بتحدي واضح لأننا كنا نفترض أن كل أشكال المخاطبة اليومية يمكن كتابتها لذا كنا نخرج بأشكال وألوان من الكتابة فالبعض يكتبها (جغ) وآخرون يكتبونها (كغ) وهكذا .. تذكرت هذا الامر وأنا اتابع عن قرب حالة الاستياء والاحباط التي يعيشها أهل المريخ بعد الخروج المخجل من دور ال32 للبطولة الافريقية للأندية الابطال وتابعت الاستياء في قمته وهم يعلقون علي تصريحات جمال الوالي بتنظيم بطولة سيكافا ولفت إنتباهي أن الغالبية منهم كانت ردة فعلهم بحركة رافضة من اليد وصوت من الفم يعبر عن إستياء بالغ ورغم إجتهادي في كتابة هذا الصوت إلا أن كل الذي خرجت به (نُس) او (نُز) بضم الشفتين وضغط اللسان مع اللثة العليا تدعمها كلمات أخري تخرج بسرعة وتكاد لاتتوقف .. (ياخي سيبنا بلا سيكافا بلا لمة) .. (ده عدم موضوع سيكافا بتاع الساعة كم) .. (الزول ده عايز يوصلنا وين) .. (عايز يثبت شنو؟) .. (هو قالوا البطولات بحيبوها كده) .. (قول شلنا سيكافا معناها خطرين) .. (بعد ماكنا مريخ مانديلا انتهينا لدرجة اننا ننظم بطولة عشان نشيلها ونقول شلناها) ..
مصيبة جمال الوالي الكبيرة أنه لايتعلم من أخطاءه بل قد لاأكون مبالغا في حال قلت أنه لن يتعلم منها لأنه لايعقل الاصرار علي ضرب وتر تخدير الجماهير بالقدرة المالية فهذا هو الفشل بعينه لو كان يدري .. فقد تجاوزت جماهير المريخ هذه المحطة ولن يعوضها الانهيار الاداري الذي يعيشه المريخ تنظيم بطولة اكثر فشلا مثل سيكافا أو حتي الفوز بها لأننا عندما نسمع كلمات مثل (بطولة نظمناها عشان نفوز بيها) هذه لوحدها تنسف شرف المنافسة وتحولها لبطولة (مفصلة) فالسيد جمال الوالي يبحث بإختصار عما يعيد له الثقة المفقودة وإن كان لايدري أن الجماهير لم تعد تخدعها مثل هذه القرارات .
بيني وبينكم دي أسرع بطولة تتنظم في العالم (خلونا من كلام مجدي شمس الدين دي محاولة لحفظ ماء وجه الاتحاد وموضوع حايجي وقته) المهم من يوم السبت بعد نهاية مباراة المريخ وانتركلوب لغاية امس سيكافا اتنظمت (كده بكل بساطة مش جمال الوالي؟) لاحظوا الراجل فكر بس يعمل حاجة يغطي بيها فشله الاداري جاتوا سيكافا وقال حاننظمها ركزوا معاي (حاننظمها) الكلام ده يوم الاحد يوم الاثنين سكرتير اتحاد شرق ووسط افريقيا (سيكافا) كان في السودان سرعة وصول تشطب الراس ياخي سكرتير المريخ عشان يصل النادي مابيصل بالسرعة دي .. امس (الثلاثاء) إتحاد الكرة السوداني أعلن تنظيمها يعني لو دورة في (الحلة) مابنظموها بالسرعة .. لكن جمال الوالي كله ممكن .. وبرضه أرحل .. اليوم غرامة الحضري عملت شنو؟ دفعت ولا لسه؟ دفعت ارحل مادفعت أرحل وكله في النهاية فشل إداري ..
hassan faroog [hassanfaroog@hotmail.com]
