بسم الله الرحمن الرحيم
في السلك
• ثورات الشارع العربي ضد اشياء كتيره لفتت نظر العالم
• العالم كلو آمن
• آمن بالشعوب العربيه
• وبانها شعوب لاتقبل الحقاره ابدا
• ولكن بالها طويل
• يمكن ان تصبر عليك تلاتين سنه زي مبارك
• وممكن ازيد زي زين العابدين
• وممكن اتنين واربعين سنه زي القذافي
• ولكنها في الآخر ستثور
• انها شعوب بركانيه
• مهما طال الزمن الذي تخمد فيه
• فانها ستنشط
• وتجعل عاليها واطيها
• عشان كده وصيتي للحكام العرب القاعدين والجايين
• يبقوا خفاف
• دقه سريعه ويتخارجوا
• سكوت الشعوب العربيه لا يعني القبول بالانظمه التي تحكمها
• ولكنه طول البال
• وسعة الصدر
• الشعوب العربيه رفعت شعار جميل
• ليس المهم من يحكم
• ولكن المهم كيف يحكم
• علي العموم سطر التاريخ للشعوب العربيه ثوراتها ضد الظلم والمحسوبيه واللغف
• باختصار ضد الفساد
• وبالتأكيد ومن خلال متابعة تلك الثورات في قناة الجزيره
• فان اي شخص منا يكون قد تأثر بمشهد معين
• او بكلمه دخلت وجدانه
• واصبح صداها يتردد في دواخله
• مشاهد كتيره كانت كفيله بالتواجد داخل الوجدان
• من الناس من اعجبته عبارة المصري الذي كتب انا عريس بقالي شهر مارحتش البيت
• وفي ناس عجبهم منظر الجمل البرطع في ميدان التحرير
• وفي ناس عجبهم الزول التونسي الطلع في الدبابه وقبل العسكري ونزل
• وفي ناس عجبهم الياماني الكتب في جضومو ارحل
• وناس كتار ادهشهم عقد القران الذي تم بميدان التحرير
• وناس عجبتهم عبارة القذافي الشهيره
• زنقه زنقه
• عندي عما ليا قال لي مافي مشهد عجبني
• كل المشاهد بتتشابه
• ولكن هناك مشاهد اثرتني كثيرا حتي رقرقت لها عيناي
• قلت ليهو زي شنو يا عمي ؟
• قال لي زي كلام زين العابدين , فهمت الدرس فهمت الدرس , وزي كلام حسني مبارك الجره فيهو واطي , وزي كلام علي صالح بانه قبل المبادرات التي اتفقت علي رحيله
• عمي قال لي شئ مؤسف ان يجر الرجال واطي ويقعدوا يستجدوا في زمن ينسوا فيه انهم كانوا يوما رموزا ومبوزين في وجوه من يستجدونهم اليوم
• وختم حديثه بعبارة كتر البتابت عيب , القذافي الوحيد المابتبت والتبقي تبقي
• قلت ليهو هيييييييييع يا عمي
• من وجهة نظري اعمق مشهد من مشاهد تلك الثورات هو مشهد الرجل التونسي
• ذلك الرجل الذي منعته العبره من التعبير
• فمسح بيده رأسه الذي شاب
• وردد
• هرمنا ...هرمنا
• يقصد انه تمني يوم كهذا ولم يشاهده حتي هرم
• زين العابدين قعد كتير
• وفسد كتير
• خمه تونس كلها
• لما شبع هو خمه لي نسابتو
• هذا الرجل الذي ردد هرمنا ,,,,هرمنا
• تفتكروا حضر كم خمسه وكم سته للهلال في تونس ؟؟؟؟؟؟
• هرمناااااااااااااااااااااااااااااااااااااااا
• ياربي هرمنا ده ربك رب الخير كاتب ليهو سته تاني يحضرها ؟؟؟؟؟
• المهم
• امس كنا متطورين بعض الشئ عن المباراه التي سبقتها
• واقول بعض الشئ لان طموحاتنا اكبر بكثير من احلام غيرنا
• لاننا نطمع في بطوله جويه
• ومن حقنا ان نحلم بتحقيق انجاز حققناه حتي هرمنا
• ويهمنا مستوي البطولات الجويه
• ونعمل لذلك
• خلاصة القول اننا نسير في الطريق الصحيح
• ولتسقط المسيره كل من يعوقها
• لتستمر
• العجب حيرني
• العجب ده زي صباع المعجون
• كل ما تقول كمل
• تعصروا تلقاهو فيهو
• ايها الناس
• ماذا حدث في موضوع الاعتداء الوحشي اثناء المباراه ؟؟؟؟؟؟
• نحنا هرمنا ولم نجد من المسئولين غير الكيل بمكيالين
• وفي ناس بقولوا في سرهم
• هرمنا ,,وهرمنا ,,, مليون هرمنا
• ولم يفتح الله علينا بجويه واحده
• هرمتوا ساي !
• واحد وتمانين سنه
• انتوا دار العجزه بدخلوها في كم ؟؟؟
سلك كهربا
ننساك ؟ لسه بدري
والي لقاء
سلك
babikir maki [b_silik@hotmail.com]
