ياخرطوم حليلك
كانت الخرطوم لطافه
ناس اناقه ف توب عفافه
ناس قيافه
وزايده فوق الكل مسافة
كانت الخرطوم ثقافه
في الأذاعه وفي الصحافه
كلمه واعية ورد حصافه
ناس بتعرف كيف تفكر
وكيف بتحسن اختلافا
ناس بتعرف كيف تشيلك
ناس بتعرف كل ميلك
وين تسيبك وين تجيلك
ناس بتقسم كل اساكا
يوم تشيل الهم معاكا
ناس بتفرح بي عديلك
ناس جميله
ناس اصيله
وياحليل ام در حليلا
عزة في اوتار خليلا
بيها يطربنا المغني
في الجميله ومستحيله
والبلابل لما تصدح
بين ضفافا وبين خميلا
والعيون شايلاك زفه
فرحة بالزين والعديله
ياحليل ساقيتنا ضاعت
وياحليل شمبات مقيلا
وبكرة راجع بي حنيني
الداخرو ليها يوم اجيلا
ظلت الخرطوم عصية
علي المهازل و الاذيه
صامده في وش الاعادي
والدقون الارذقيه
كانت اللاءات ثلاثه
لاتنازل لاتفاوض لاوصية
ومهما ليل الظلم طول
ثابته دائما في القضيه
عبدالباقي احمد
بلفاست
ياخرطوم حليلك
مصدرُك الموثوق للأخبار والتحليلات والآراء الدقيقة!
نقدّم تغطية دقيقة ومتوازنة، إلى جانب تحليلات معمّقة وآراء متنوعة تساعدك على فهم ما وراء الخبر. تابع آخر المستجدات والرؤى أولًا بأول.
