سودانايل أول صحيفة سودانية رقمية تصدر من الخرطوم
أخبار أخرى
بسم الله الرحمن الرحيم
في السلك
b_silik@hotmail.com
* امل عطبره هو امل عطبره الوحيد بعد هبوط اهليها
*وعطبره مدينة الحديد والنار
*المعروف انها تلعب بالنار زي ما دايره
*النار ما بتسوي ليها شئ
*ولان عطبره نار في نار
*امس فطومه اختي قدمت الاعذار
*عشره مصابين
*وافصحت انها تناقشت في الشأن الفني مع باتريك
*اها يا فطومه
*لقيتي الطبخه كيف ؟؟؟
*بقيتوا علي التوم والكسبره
*ولا سليقه ساي اخير
*اقول ليك
*سليقه اخير
*لانو جمهوركم بطنو طامه شديد
*البهارات بتهيج عليهو القرحه
*وناس المصران شفناهم يوم جرية بكري المدينه
*والجمهور الهلالي بينو وبين الاستفراغ زحة يدو من خشمو
*المهم
*الاهله دايرين يصالحوا جماهيريهم
*باي ثمن
*مهما كان التمن
*وذلك تحت شعار المابي الصلح ندمان
*كردنه سافر بره البلد
*اخير يحكوا ليهو ثورة الجماهير
*اخير من يحضرها
*وجمهور الهلال الواعي
*بعرف النصر والانتصار المستحق
*من انتصارات الصلح التي تأتي بطرق مختلفه
*منها الحظ والاخطاء التحكيميه
*تفاحات الحاحات غير وارده
*لان اهل عطبره بياكلوا من الباوقه اللذيذ تفاحه بس
*المهم
*الهلال تعبان
*تعبان يا حبيبي
*المهم
*تهديفة الطاهر حماد الدقت في الحديده
* أظهر التقييم الحقيقي لمكسيم
*ومن اليوم مفروض تبدأ رحله جمعه جينارو
*بالمناسبه لوزان قالت شنو ؟؟؟؟
*المهم
*اداء المريخ امام المريخ كوستي
*لم يعجبنا
*ولكن السوء لم يكن بحجم النقل الاذاعي لمعلق الرياضيه
*يعني ماممكن يقول ليك المريخ العاصمي بلعب من الشمال للجنوب
*ويقول ليك علي جعفر بمشي باللاين من الناحيه الغربيه
*الزول ده يا ما بعرف اتجاهات
*ودي ما مشكلتو
*مشكلة المناهج الخلت الناس الساعه البتمشي تك تك تك دي
*مابعرفوها
*مشكلة المقررات
*الدخلت الجغرافيا والعلوم والتاريخ
*في كتاب واحد اسمو مسكننا
*والباقي ختوهوا في ملبسنا
*ومسكننا كمقرر
*زي مسكننا كمدمر
*وملبسنا ككتاب
*بشبه ملبسنا المهترئ
*الزول ده الكورة لو نقلها لينا بي درداقه
*كان فهمنا الحاصل شنو
*ولكنه هذا الزمان
*ايها الناس
*الصبر بجيب حقو
*والدليل تطور عنكبه
*تطور عنكبه لان الثقه اللقاها من المدرب والجمهور
*خلتو يلعب باعصاب مرتاحه
*مزيدا من الصبر يا جماهير المريخ
*مزيدا من التشجيع
*اوكرا وكوفي وجابسون
*مكاسب كبيره
*حالتهم لسه ما دخلوا الفورمه
*قليل من الصبر مزيد من الانجاز والتطور
*المهم
*شغلت تسجيل لمباراة الاستقلال امس
*امس شفت جرية بكري المدينه في كورة الاستقلال
*ياخ انا جريت
*جريه مرعبه شديد
*ليهم حق ناس السكري مايمسكوا نفسهم
*وعملة ناس المصران مجبورين عليها
*الزول ده جا زي السهم
*لو ما شاشتنا جديده
*كان اتشقتت
*قلت لي لوزان قالت شنو يا روشا ؟؟؟
*ايها الناس
*ناس فطومه قالوا لاعبين بالصغار
*الشبل وليد علاء الدين
*الشبل ده علي ما اذكر
*الفين وعشره كمل السن بتاعت الاشبال
*مافي خانه ليهو عندنا
*مشي هلال كادوقلي
*قول كمل السن طمنطاشر سنه في الفين وعشره
*في الفين وخمسطاشر ببقي كم ؟؟؟
*طبعا ناس فطومه بحسن نيه خصموا الخمسه من الطمنطاشر
*طلعوهوا شبل عمرو تلطاشر
*لكن باضافة الخمسه للطمنطاشر
*يبقي ويلي داخل علي الخمسه وعشرين
*الشبل بكون زي جمال سالم مسجل رديف
*زي ابراهومه ونمر وحسن سفاري
*بالمناسبه امل عطبره لعب امس بي سته اشبال
*اربعه في المنتخب الاولمبي
*واتنين لسه
*تقول لي وليد شبل ؟؟؟؟
*المهم
*دايرين نشيد نادي اسري في القلعه الحمراء
*لاسرنا
*العاب للاطفال وكافتريات
*لقضاء امسيات عائليه جميله
*دايرين نبدأ
*باجود الانواع نبني
*السيخ الاصلي والتشطيب ديلوكس
*اسمنت عطبره الطن بي كم ؟؟؟
*عندكم فكرة ؟؟؟
*المهم
*امس مكسيم يظهر
*أهو حديد يا فطومه
*ايها الناس
*الخوف يتملك الناس في كل المناحي وجميع النواحي
*ناس خايفين الانتخابات تقوم
*والناس التانيين خايفين الانتخابات تفشل
*وبمناسبة الخوف دي
*الرائع القدال كتب طواقي الخوف
*غنتها مجموعة عقد الجلاد الرائعه
*الالحان لصديقي الاستاذ شمت
*المزيكه مابقدر اكتبها ليكم
*لكن يقول القدال
*سكك الحديد بي كم ****وبي كم بيت المفتش
*بعتوا الارض بترابها **** والبيع بيعة عدوكا
*بعت الارض بي ترابها ****باكر تبيع ابوكا
*وان مت من تخمه باكر ****ناس الشرق يبكوكا
*وناس الغرب يبكوكا ****** وناس الشمال يبكوكا
*وناس الجزييييييييييييييييييييييييييره
* ناس الجنوب طبعا في الفراش ده ما معانا
*الا يبرقونا معزيين
*او يرسلوا لينا في الكشف رصيد
*لكن لما نجي نبيع الرصيد
*ناس هنا بخصموا عشره في الميه
*لا براعوا لي اننا عندنا بكا
*لا يقولوا الفراش بقي مكلف
*تبقي علينا ميته وخصم رصيد
*ايها الناس
*ان تنصروا الله ينصركم
*اها نجي لي شمارات والي الخرتوم
*كان شفت يا والينا
*حكاية كبري المنشيه دي زاولت بينا
*الكبري ده اتعمل لينا ولا فينا يا والينا ؟؟؟؟
*ولا النيل الازرق انحرف زي ماقلتوا لينا ؟؟؟
* شخصيا ارجح قصة الانحراف يا والينا
*لانو الحصل في الكبري ده غير انحراف مافي شئ يبدو لينا
*الانحراف فيهو ظااااااهر يا والينا
*والينا
*كبري توتي متين بنحرف لينا ؟؟؟
*ولا طوالي بقع بينا ؟؟؟
سلك كهربا
ننساك كيف وتاني بالمراكب يا اخينا
والي لقاء
سلك
