التلاعب بنتائج المباريات جريمه .. بابكر سلك
10 مارس, 2015
منشورات غير مصنفة
28 زيارة
بسم الله الرحمن الرحيم
في السلك
*جريمة التلاعب بنتائج المباريات جريمه كبيره شديد
*هذا التلاعب يأخذ اشكالا عديده
*مثلا حكم يصر علي اخراج مباراة بنتيجه معينه
*ويمكن ان يكون التلاعب اداري
*ماتستغربوا
*مثلا اداريا توقف لاعب مؤثر وقونو مضمون حتي لا يشارك في مباراه معينه
*او تنذره بتوصيه للحكم من الجهات الاداريه
*وممكن مدرب مثلا يشتري لاعبي الخصم
*ده برضو تلاعب في نتائج المباريات
*واشكال التلاعب كتيره
*مثلا زي التلاعب في تقرير الحكام
*تغير اتنين لي اطناشر
*دي كلها تشكل جريمة التلاعب بنتائج المباريات
*تحصل في البلاد التي تنتهج اسلوب المراهنات
*بالعربي قمار يعني
*بالفقه ميسر
*لكن ان يحدث ذلك التلاعب في دولة زي حيلتنا دي
*ببقي الموضوع شاذ
*لاننا دولة لا تنتهج الميسر
*مابقول لاتعرفه
*فهي تعرفه ولكن ما شغاله بيهو
*واخطاء التحكيم لما تقع كلها في صالح فريق معين
*وطول العمر
*يبقي تلاعب بنتائج المباريات
*ايها الناس
*الي متي تستمر جريمة التلاعب بنتائج المباريات في هذا البلد ؟؟؟
*لما يكون النظام طول العمر ان يختتم الموسم بمباراة الكأس
*ويكون حارس مرماك الوحيد اسمو يس عندو كرتين
*وعشان تقسم الموسم
*تقوم تجيب مباراة الكأس قبل الممتاز
*عشان كان المريخ لعبها يس ياخد الكرت التالت
*وبي كده يلعب الممتاز بحارس الرديف
*او ينسحب
*وتدي الكاس بتاع السودان لمن تريد ان تعطيه اليه
*هذا تلاعب بنتائج المباريات
*ايها الناس
*ان كان بكري مخطئا
*يستحق العقاب
*ولكن هل العقوبه مناسبه ؟؟
*وهل فعلا ماورد بتقرير الحكم صحيح ؟؟؟
*وهل يجوز للجنه التحري عن صحة التقرير ام تأخذ به مسلما به ؟؟؟
*مع العلم
*بان سيدي بيه الموسم الماضي تم طرده في مباراة اتحاد مدني
*وضمن الحكم ذلك في تقريره
*وكان يستحق العقوبه الاضافيه
*ماذا كان موقف اللجنه التي حاسبت بكري المدينه من كل ذلك ؟؟؟
*هل كان الكيل بنفس المكيال ؟؟؟
*ام ان هناك تطفيف ؟؟؟
*وان كان كذلك
*ويل للمطففين
*ايها الناس
*لو كانت مباراة المريخ ضد الهلال بعد تلاته مباريات
*لاوقفوا بكري اربعه
*وان كانت بعد مباراتين
*اوقفوهوا تلاته
*وان كانت القادمه لاوقفوهوا مباراة واحده
*الروب ده كيف بس ؟؟
*الروووووووووووووووووب
*لبكري حق الاستئناف
*وعلي مجلس المريخ الضغط في الحته دي
*ان شاء الله القرار يكون الايقاف لخمس مباريات
*بس يلعب كورة الهلال
*ايها الناس
*التلاعب بنتائج المباريات الذي يحدث عندنا سنويا لصالح فريق بعينه
*علي الطلاق سيؤدي الي كارثه كبيره
*اقلها الغاء نشاط كرة القدم في هذا البلد
*ايها الناس
*العيب مافي الناس البتلاعبوا بنتائج المباريات
*العيب في مجتمع المريخ الذي يبعد نفسه عن الاتحادات واللجان
*وحتي اذا دخل ذلك المجال
*يدخله ليسقط مرشحا مريخيا
*العيب فينا
*منذ عشرات السنوات ونحن نهمل هذا الجانب
*لذا الذين يتلاعبون بنتائج المباريات ليهم حق
*والحكم البصهين من بلنت اوضح من الشمس
*يتلاعب بنتائج المباريات
*ان كان يخطئ بقصد
*او كان يخطئ لجهل
*في الآخر يتلاعب بنتائج المباريات
*والبخطئ في قراءة اسم لاعب من الجواز لانو مكتوب بالبرتغالي
*برضو بتلاعب بنتائج المباريات
*والطريفي الذي لم يستقيل عندما سافر الحكم ليوغندا بالتقرير الفيهو انذار عمر بخيت
*يبقي اذا ماتلاعب وقتها بنتائج المباريات
*سكت علي التلاعب بنتائج المباريات
*لان الشكوي في عدم قانونية مشاركة عمر بخيت
*كانت مضمونه
*وكانت ستوجه النقاط للفريق الآخر لا للهلال
*ولكن تلاعبا بنتائج المباريات
*بقيت النقاط لدي الهلال وحرم منها اصحابها
*تلاعب شديد
*ايها الناس
*لايعجبنا التفلت في الوسط الرياضي
*وعلي الذين تاجروا باللافته التي علقتها بعض الجماهير في مباراة الامل
*كان عليهم مراجعة مواقفهم من لافتة الساجدين
*ومن المانشيت الذي كتبوهوا في صحفهم بنفس عباراة لافتة الساجدين
*دائما تأتي التفلتات من جهه معينه
*يقرها البعض
*وينتقد ردة الفعل عليها
*يبقي من وافق علي تلك اللافته
*معليش
*ما يفتح خشمو في دي
*فقط ننتقدها نحن الذين انتقدنا ديك وغيرها
*ايها الناس
*يريدون ان يقتلوا بكري بنفس السلاح الذي قتلوا به جبره
*ولكن هيهات
*وبمناسبة جبره
*طيلة سنواته في المريخ
*كانت الهتافات البذيئه تتعالي كلما استلم الكرة
*اين كان من ينتقد لافتة الجمهور اليوم من تلك الهتافات ؟؟؟
*ايها الناس
*اذا لم تحسم مثل هكذا امور
*وتوأد في مهدها عند من يسنها في الوسط الرياضي
*فانه لايجدي انتقاد ردات الفعل
*فقط ستتحول تلك الردات لافعال شنيعه
*وعندها لاينفع الندم
*بكري واجع الهلالاب موت
*ودي حقيقه
*والهلال تعبان تعب الموت
*ودي حقيقه
*والكاردينال لايستطيع ان يستمر طويلا وهذه ايضا حقيقه
*لان تقاضي الحكام (خطأ ) عن ضربات الجزاء ضد الهلال
*لايقنع من جماهير الهلال العقلاء
*لانو في هلالاب خجلانين شديد
*من كورة النسور
*وضربة جزاء الميرغني
*وهدف الميرغني المنقوض
*وعلي اللجنه التي عاقبت المدينه
*وعلي الحكام الذين يكتبون تقاريهم
*عليهم جميعا ان يعلموا
*سنتابعهم في قراراتهم وفي تقارير الحكام
*لاعب يرفع اصبعو ساي
*لو ما ضمنها في التقرير
*يشوف ليهو بلد تانيه
*وحكم يجيب تقرير
*الزول الضرب التلفون
*لو ماضرب تلفون بنفس السرعه ليبلغ مجدي
*حايبقي الهول الضرب التلفون
*وحايعرف كيف بنضرب (التلفون )
*كفايه
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*الليله الشمار حار علينا
*كان شفت يا والينا
*قالوا في مسؤل كبير علينا
*اشتري تربيزة اجتماعات لي مكتبو يا والينا
*بي تسعمية وخمسين مليون من مال اهالينا
*خلي بالك ده الجقر الاكل كبرينا يا والينا
*داير يجتمع بباقي الجقور ينسقوا كيف ياكلوا باقي الكباري الفضلت لينا
*لكن صدقني يا والينا
*يا التربيزه ترجع والبيعه تقوم
*يا بنفتوا يا والينا
سلك كهربا
ننساك كيف وتربيزة الاجتماعات بتسعمية وخمسين مليون جنيه جنيه ينطح جنيه
والي لقاء
سلك
*عشان كده بنسأل
*ده برضو تلاعب
b_silik@hotmail.com
////////
سودانايل أول صحيفة سودانية رقمية تصدر من الخرطوم
