الجمعه القبل قبل اليتيمه

بسم الله الرحمن الرحيم
في السلك

*الليله الجمعه
*وماجمعه عاديه
*الجمعه القبل قبل اليتيمه
*الجمعه الجايه سيبها
*الجمعه البعدها هي الجمعه اليتيمه
*وبعدها رمضان يا عمك
*ربنا يجعلنا من الصائمين
*ومن المعتوقين
*العتق ده بالذات ساكنوا شديد
*الله يعتقنا
*المهم
*وعشان جمعتنا الليله غاليه علينا ومفضله بالنسبه لينا
*داير نتكلم فيها عن كورتنا بصراحه شديده
*كورة البلد
*البلد القالوا لينا بلد البنت والولد
*قالوا
*المهم
*كورتنا لازم تشبه لقمتنا لازم تشبه عملتنا لازم تشبه فكرتنا
*لازم تشبه عيشتنا لازم تشبه كربتنا
*لازم تشبه مويتنا لازم تشبه كهربتنا
*لازم تشبه طبنا وهندستنا
*لازم تشبه خدمتنا المدنيه ومحاماتنا
*لازم تشبه تجارتنا لازم تشبه بورتنا
*الولد باير ما لاقي وظيفه تلمو
*والبت بايره مالاقيه رجلا الشغل يتمو
*عاد هي بورة نصاح
*المهم
* كورتنا بتشبه لقمتنا
*من منا ما بعرف امواج
*ذلك المكان الانيق الذي يزين الطريق والمطل علي شارع افريقيا
*اكل زي الاكل
*ونضيف وطااااعم ومغذي ومفيد وغاااااالي لكن ما كتيره عليهو
*اكل كده والناس الببيعوا فيهو كده والبجوا يشتروا برضك كده
*طيب
*فيكم زول بعرف امواج التانيه ؟؟؟
*امواج مايو
*برضو بتتباع فيهو لحوم الدواجن والضان والمخلل والزيتون والجبنه والشيبس والرغيف الفاخر بتاع المناسبات
*ولكنها لحوم ومخللات واجبان وزياتين مستعمله
*فيها جزء استعمال دبلوماسي
*بسيييييييييييييييييييييييييييط
*وفيها جزء استعمال متوسط
*وشركه اصلي
*اخير من جديد وما اصلي
*واحسن من الجديد الما اصلي
*ناس امواج مايو بلقطوا بضاعتهم من ترابيز المناسبات في الصالات والخيم البهيه
*موش في شفع بجوا جاريين علي الترابيز ؟؟؟
*ديل تجار كبار في امواج مايو
*بعد يلملموا غنائمهم ويجوا امواج مايو بفرزوها
*الاستعمال الدبولماسي براهو
*يعني ورك جداده قدر ده يكون ما اتعضي
*الاستعمال البسيط كوم براهو
*ده البكون معضوض عضة صغيرونه من خشيم قدر الزراره
*حتي الخشيم لو ماقدر الزراره
*تلقاهن في المناسبات بعضن بي طرفو
* النوع التالت استعمال مابطال
*ده البكون ماخد ليهو عضتين تلاته
*وهكذا الزيتون والجبنه
*الشبس معظمو استعمال دبلوماسي
*لسه النفس السودانيه ما اخدت عليهو
*وببيخوهوا
*يقولوا ليك في الاخر بطاطس
*المهم
*لكل ليلاه
*ولكل امواجه
*وفي الآخر كورتنا لازم تشبه امواجنا
*والبلعبوا الكورة معظمهم ناس امواج التانيه
*اما ناس امواج الاولي
*فدافوريهم مافايت صالة التنس
*لذا ولذلك
*كورتنا بتشبه لقمتنا في امواجنا اللمتنا
*مرة نلقي العضه استعمال دبلوماسي نطير الاهلي القاهري
*ومرة نلقاها استعمال بسيط ندرن مع الصفاقسي
*ومرات نلقاها استعمال شديد يطيرنا امل ملقاسي
*وهكذا كهربتنا
*مرة ننسي انها بتقطع
*ومرات ننسي انها بتجي
*ولما تجي نغني
*الكهربا جات املوا الباغات اسي بتقطع
*وفعلا  تقطع
*قبل المويه القاطعه ترجع
*ايها الناس
*الاشياء تسير مع بعضها البعض
*فلا تتوقع تطورا في منحي وباقي المناحي  راقدات رز
*ولا تتخيل نجاحات في امور  وباقي الامور راقدات رز
*ايها الناس
*وصل كم سعر الرز ؟؟؟؟؟
*المهم
*اذا دايرين كورتنا تطور
*الحكومه تقتنع
*معليش
*ما الحكومه
*الدوله تقتنع بانها دايره الكورة تتطور
*ولما الدوله تقتنع تقوم تجيب وزير مقتنع
*والوزير المقتنع يجيب خبرات مقنعه
*والخبرات المقنعه تضع استراتيجيات التطور تقنع الجمهور القنع
*والجمهور القنع يقتنع
*وبعد ده يبدأ قطار التطور في التحرك من محطة النسيان التي اطال الوقوف فيها
*ولكن برغم ذلك
*شامي لي ريحة مطار السنه دي
*قد تكون فرختنا المرة دي استعمال دبلوماسي يا فرده
*ايها الناس
*ان تنصروا الله ينصركم
*وكي تنصروا الله اصدقوا
*فالصدق هو اول خطوات نصرة الله
*اها
*نجي لي شمارات والي الخرتوم
*كان شفت يا والينا
*مستشفي التيجاني الماحي
*فيهو مرضي لينا
*معمول خصيص لحالات تصيب النفس يا والينا
*ربنا يشفيهم ويشفينا
*لكن لاحظنا يا والينا
*انو سور المستشفي بالخارج كلو مكتوب ارشادات يا والينا
*يعني بقراها الزول الماشي في الشارع يا والينا
*يكونوا ناس المستشفي اقتنعوا بالجن الفينا
*وكتبوا الارشادات بي بره مخصوص لينا ؟؟؟؟؟
سلك كهربا
ننساك كيف واعقل ناس هم الطشوا بدري
والي لقاء
سلك
b_silik@hotmail.com