هذه هى سنة الحياة ولكن البشير الجبان من اجل نفسه الرخيصة يضحي بشعوب السودان ، ولا يهمه الاقتصاد المتردي ، صفوف الخبز ، الغلاء الطاحن والامن الغائب . واخيرا بعد مسرحية التمنع والتتقل والتظاهر بأنه مرغم على تقبل جحيم مواصلة حكم البلاد لخمسة سنين قادمات تأكد ترشيح البشير في اسخف مسرحية
هل فكر هذا الرعديد ومن يطبل له ماذا هو فاعل بعد انقضاء الخمسة سنوات ، ووقتها سيكون في الثمانين من عمره ؟ انه موقابي تحت التكوين .نعم ان الكثيرين يخافون التغيير . فاللصوص يخشون الضوء . لم يعد هنالك ما يباع بعد بيع الدم السوداني في اليمن . ولقد فشلنا في مجالنا حتى خراف الهدى التي برع فيها السودان لاكثر من الف سنة قد فشلنا فيها هذه السنة . وبعد ان صار السودانيون يموتون في عرض البحر في مراكب الموت هربا من البشير وجحيمه ، صار المعيز والخراف السودانية تموت في عرض البحر بسب الاهمال والفساد . وتعود الخراف مثل عربات السكك الحديدية قديما ومكتوب عليها تعاد الى الورشة عطبرة وتاريخ الارجاع ، وصار مكتوبا على خرافنا تعاد الي الورشة سواكن مباشرة .
السعر الحقيقي للرغيفة جنيهان والطوابير مثل نهاية الدوري او زيارة فريق عالمي . ووزير المالية قال … اكلوا الكسرة ، وهي الكسرة وينها ؟ . وهذه السنة لم تزرع كل الاراضي في القضارف سلة غذاء السودان ، بسبب عدم توفر الجاز . ولكن عربات الجنجويد ، الامن ، القطط السمان والدستوريين لم تتوقف . واليوم تظهر آفات قاتلة في جنوب كردفان تستهدف الذرة الشامية ، العيش ، الدخن وعشرات المحاصيل . وبدلا من ارسال الطائرات والمتحركات للقضاء على الآفات ترسل الطائرات الحمم والقنابل على المواطنين . وشيوخ تفصيل الفتاوي وكل تنابلة السلطان مشغولون باصدار الفتاوي تتحدث عن ضرورة ترشيح البشير ،، هذا او الطوفان ،، وشيوخ يتحدثون عن حرمة الخروج على الحاكم حتى اذا زنا في العلن .
فكرة ترشيح البشير مرة اخري ليست جديده . لقد ظهرت بعد سنة واحدة من انتخابات النوم في العسل، لان المدعويين لم يحضروا وجلس الطباخون والجرسونات بدون عمل وبعد ان غلبهم الملل مارسوا احب شئ لنفوسهم…. النوم مدفوع الاجر .
لقد كتبت وقتها موضوعا بعنوان اها …. وبعد اربعة سنين . والآن اقول ….اها وبعد الانتخابات القادمة وخمسة سنوات هل سيأتي نفس الشيوخ ونفس الوجوه ويرددون نفس الكلام
اقتباس
اها …. وبعد اربعة سنين ؟ شوقي بدرى
لو مسيلمة كان عايش كان حيمشي يجاور عند البشير كحوار مطيع . مش يوم داك البشير قال ما حيترشح وقانون الانتخابات والدستور مش فصلوه ناس الانقاذ براهم ؟ المثل السوداني بيقول ,, قالوا سمونا رضينا ,, طيب اذا انحنا رضينا . والبشير خج ومخج سعن الانتخابات وطلعت الفرصة والفرصة بقت سمن . وناس الانقاذ مسحوا سدرهم . ومسحوا شنب احزاب الفكة . والبشير ركب رئيس اربعة سنين ، الاربعة سنين ما حتروح بسرعة . ماذي كانه اول امبارح الرئيس الامريكي كان حايم في الخرطوم ، وادروب خج الصندوق . والسياسيين كانوا في السوق . احسن من دلوكت يورونا هل البشير حيترشح تاني ؟ علشان نتهيأ من جديد . لانه الجنائية قاعدة .
الانقاذ شغالة بي حكمة الشيخ فرح ود تكتوك . قالوا السلطان اراد ان يحرجه وقال له اذا انت عالم ، علم الجمل ده الكلام . فقال ليه عاوز 7 سنين . لمن طلع سالوا الشيخ عن عدم معقوليته في تقبل التحدي . قال ليهم,,7 سنين يا مات البعير يا مات الامير يا مات الفقير ,, .
ناس الانقاذ بيفكروا يا ماتت الامم المتحدة . وده ما ممكن . يا مات البشير . وبعد العمرة وتغيير الشيالات والكرونة وعمود الطوالي . البدفورده حيدردق نص دستة سنين , والشاهد بله الغائب .او ياتي الله بمعجزة . وده علمو عند ربنا .
البشير ده مش قال لو شنق الترابي الله ما حيحاسبو ؟؟ ما بخجل قاعد وماكل وشارب مع الترابي . النميري ما وصاه وقال ليه اوعك تفك الترابي . يومك التفكو حتكون زيي كده حايم من بيت بكي لي بيت بكا ..
وبعدين الترابي بعد كلام الغرباوية ومطالبة البشير بتسليم نفسه ، كيف قدر يعمل,, صمن بكمن ,, لا يبصرون . اهل السوق بيسموا الفلوس الضحاكات . تلاتة مليار وناس الشعبي رقدوا آبري . الترابي وابراهيم السنوسي البعشقوا الكلام انطموا . مشكلتنا يحكمنا ويسيطر علينا الحقراء منا .
عاوزين من غندور رد اليوم قبل بكرة . هل البشير حيترشح بعد 4 سنوات ولا حتدونا سكة بدون اللاعب ؟؟ وغندور ده زمان كان بيسخن . زمان كان مريحنا من الكلام . وان كنا محتارين في البروفسر البقي يدافع عن الشغيلة ويرأس النقابات . ودلوكت بقينا نسال ما بجيه وجع حلق ولا لوز او عشراقة ؟ يتكلم في الاستراتيجية والتعليم والزراعة والقانون الدولي وسكب العنكوليب وشلخ العيش والمشاط والكورة . زمان كان وين ؟؟
البشير والصادق كسروا القحف وقالوا عن بعض ما قالته المشاطات في الكوافير . حنشوف بعيونا الحياكلها الدود دي الاتنين بعد شوية طحنية بالزيت . المصالح بالنسبة لهم اهم من الكرامة ورجب ورمضان والفطر . وبعدين البشير مفروض يقول شنو تاني علشان اولاد الصادق يحردوا ؟؟ في النهاية طلع ليهم ابوهم حفيد المهدي المنتظر عميل صهيوني . .
والميرغني كمان دور في الانقاذ . وده العشر القام ليه شوك . طيب يا مولانا . وزراء الاتحادي في الانقاذ بيدافعوا اكتر من الكيزان . وود بلال بقي ذي صوت سيده او هز ماستر فويس .؟ خسارة التعليم . الميرغني ما يطلع بيان بطردهم او علي اقل شئ يتبرأ منهم . ويقول انهم لا يمثلون الاتحاديين الشرفاء . وانهم ضالون لن يرجعوا لحظيرة الدندر . واين موضع ابن الميرغني النائب السائح من الاعراب . ولكن تذكرت ان الميرغني دائما طالب سلطة . ولقد اورد الاستاذ طيب الله ثراه شوقي ملاسي في كتابه اوراق سودانية . ان الميرغني استدعاة وطلب من ان يكلف صديقه الطيار كسباوي بعمل انقلاب لصالح الميرغني . بكل سهولة . بالله وانت ماشي الزير تشرب جيب لي معاك واحد انقلاب وصلحو . يعني كلهم انقلابيين . والشعب السوداني هو المسكين .
كركاسة
كل يوم نسمع بحرائق في الشمالية للنخيل . ومش نخلة ولا اتنين . عشرات الآلاف من النخيل وصواردة مسقط راس الفنان وردي تحترق الان . النخل دة زمان ما بيحرق لية . ولا علشان النخل بقوا يسقوه عرقي.
سالني البعض ماذا اقصد بكركاسة . زمان بيجوا الناس بيكون لستك العجلة الخارجي قد انسهك . وبيطلبوا من اصدقائي العجلاتية كركاسه . ويرفض كيكس وكرك والنيع وطيوبة في سوق الموية . وكنت في بعض الاحيان اقوم بعمل كركاسة للزبون وهي مجانية. والعملية هي قص قطعة من اللستك بدون السلك ووضعها من الداخل لحماية الانبوب . وكان البعض من من عاني من تراجع الشعر يستعين بباروكه صغيرة . يسمونها كركاسة .
shawgibadri@hotmail.com
