الزناطير بلاوي ساااااي !!!!!

بسم الله الرحمن الرحيم
في السلك

*في المحاكم الزول بقسم
*اقول الحق كل الحق ولا شئ غير الحق
*روشا اول امس قال الحق
*بس ما كل الحق
*قال لي كاريكا احترم نفسك
*قالها متين لكن ؟؟؟
*قالنا بعد قلناها بي سنتين
*لما كان بكابر
*قالها لما قالتها الجماهير علنا يوم شندي
*قال روشا
*قال الحق ولكن ليس كل الحق
*الكوكي مدرب مؤهلاته التدريبيه اقل من تلك التي حصل عليها مصطفي النقر
*وخبراته الميدانيه لا تقارن بما يتمتع بها مصطفي النقر
*الحته دي ماقلتها ليه يا روشا ؟؟؟
*قول كل الحق وكت اصلك قررت تفتو
*قول تيم الهلال مواسيرو اكتر من القاعده في مغلق صديقي عمده
*قول معسكر الفجيره كان كذبه
*وناس بوتاكو الدقيتو ليهم الطار مواسير
*وكيبي قاعد ساي
*قول جوز مواسير البرازيل مقلب جديد شربه كردنه
*قول ان كردنه متناقض
*يقول نعتمد علي الصغار
*ويسجل فيصل موسي  وجونيور
*فيصل وجنيور مجموع عمريهما يساوي طول شارع الخرطوم بورتسودان
*قول كل الحق يا روشا
*ماتقول جزء من الحق
*وقال روشا حقيقه اخري
*قال المريخ عمرو مايبقي هلال
*وده صاح يا روشا
*معقوله المريخ يرجع ورا ويبقي صفر دولي ؟؟؟
*طيب مانديلا ده يودوهو وين ؟؟؟؟
*نمسكو لي عمك شبشه ؟؟؟
*صدقني يا روشا
*الهلال الاخد خمسه من مازيمبي افضل من هلال اليوم عشره مرات
*اضرب خمسه في عشره
*وورينا مباراة الاحد حاتطلع كم
*قول كل الحق يا روشا
*ووينا نقد واحد وجهتو لي كردنه طيلة فترته
*قول يا روشا
*الاتبلبل بعوم
*عوم يا روشا
*جماهير الهلال عارفه اي شئ
*بس دايره تعرف منو البقول الحق كل الحق ولا شئ غير الحق
*وورينا يا روشا
*قروش دعم الاهله الشرفاء لبناء الجوهره الزرقاء
*قاعده تمشي لمشروع الجوهره
*ولا مشت لي تسيير الفريق ؟؟؟
*دي الحته الدايرين فيها قول الحق كل الحق ولا شئ غير الحق
*ايها الناس
*روشا بعد قال الحق
*رجع تاني لي كلام الطير في الباقير
*داير يخدر الزناطير
*قال سيدي بيه ونيلسون كده
*مدحهما مديح صاح
*وانا بقول ليك يا رشوا
*اول من يغادر كشف الهلال هما سيدي بيه ونيلسون
*جوليام حمام
*بطير براهو
*ايها الناس
*طبيعي ان يفرخ الصغار للكبار
*وجنينتنا الادتنا عمر وبكري وغرزه
*جنينة السرور
*والفاكهه المانجيضه بنرجعها ليها تنجض
*ونشيليها تاني
*زي وليد
*جنينتنا ونحنا حرين نقطف منها منو ومتين
*ايها الناس
*كل الحرب التي يشنها الاعلام الهلالي علي الوالي
*طيلة الاطناشر سنه الفاتت
*ماهي الا تعبير عن خوف الاهله من قدرات الراجل
*هدفهم الاساسي هو ابعاد جمال عن المريخ
*عشان كده اطناشر سنه بتخبطوا ساي
*المهم
*احدهم كتب بالتفصيل عن مباراة المريخ والرابطه
*وهو ماشافها
*ولا تعليق
*ايها الناس
*تخطينا عزام بهدف بكري المدينه
*تخطينا الانغولي بهدف بكري المدينه
*اقصينا الترجي بضربة جزاء مع بكري المدينه
*وباص من بكري المدينه
*بوعقرب يا حبيب
*هو النجاح ده كيف بس
*ايها الناس
*بدأ العد التنازلي لمقابلة العلمه
*دايرين اول تلاته نقاط واربعه اهداف في روليتنا
*ويوم الاحد بتكتمل مباريات المجموعتين
*نشوف طيش المجموعتين منو
*مع العلم بان العلمه حاياخد اربعه
*وما بكون طيش المجموعتين
*دي وضحت ليكم يا روشا ؟؟؟؟
*ايها الناس
*العم شبشه رجل قامه
*وخبره
*رأيكم شنو لو يختم حياتو الرياضيه في المريخ ؟؟؟
*موش برضك فيها تكريم للرجل !!!!!
*شبشه يستاهل
*خمسه وتمنين سنه ماشاف مطار
*خلونا نزورو المطار
*ايها الناس
*للعلم
*باص بكري لراجي الذي احرز منه الهدف التالت
*كوستي لي اسي خاته يدينا في راسها من الدهشه
*بوعقرب ياخ
*المهم
*قال روشا ان المريخ نادي بلا هيبه
*بي جوياتنا دي كلها بلا هيبه ؟؟؟
*طيب بلا جويه ديل بكونوا بلا شنو ؟؟؟
*بلاوي ساي !!!!!
*شامي لي ريحة مطار يا روشا
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*الشال مدير المويه
*بشيل مدير الكهربا لينا
*وبشيل مدير المحليه الليلنا
*وبشيل رئيس النفايات يا والينا
*وبشيل المحافظين والمحافظات هيلنا
*وبشيل كتير من الوزراء والوزارات يا والينا
*وبشيل كتير من التجار المستغلننا
*عجوره بخمس الف يا والينا ؟؟؟؟؟
*يغلي الزبادي في رمضان وينزل سعر اللبن ؟؟؟
*الزبادي ده مصنوع من البوماستيك يا والينا ؟؟؟
*شلنا الصبر كتير  شيلهم كلهم يا والينا
سلك كهربا
ننساك كيف وبرانا بنصعبها علي بعضنا....ملعون ابو الاستغلال
والي لقاء
سلك

b_silik@hotmail.com