أصل الحكاية
نقرأ الخبر أول وبعدين نعلق ( اعلن المهندس الطاهر يونس عضو مجلس إدارة نادي الهلال (المستقيل) عدم قانونية قرارالمجلس بقبول إستقالته مشيرا إلي أن قبول الإستقالات من هيئات الشباب والرياضة حق أصيل للمفوضية ،وقال وفقا لتصريحات خص بها (حبيب البلد) ، أنه قرر سحب إستقالته لتأكيد عدم قدرة المجلس علي قبولها وفقا للقانون ، ويمضي يونس في تصريحه بتولي عدد من المحامين لملف قضيته ويختتم مؤكدا ان قرار سحب الإستقالة لم يكن من أجل العودة ، ولكن لتوجيه رسالة للجميع ، كاشفا أن مجلس إدارة نادي الهلال الحالي فاقدا للشرعية ويلعب علي الوقت مؤكدا ثقته في كل الإجراءات القانونية التي قام وسيقوم بها لتحكيم صوت القانون) إنتهي .
لما أقرأ كلام زي ده بشعر إني قاعد في الشارع في لستك جنب عمود نور ، وبقول أي كلام (غلاط والسلام) ، مكاواة ، محاولة إنك عارف بالكضب وبالصاح ، بصراحة ماعرفت الطاهر يونس مالو ؟ زول طارح نفسه أفهم زول، والباقين مابعرفوا حاجة ، وزول عامل إنه المعرفة جات لغاية عنده ووقفت ، زول صدع بينا وهو بيتكلم عن دكتاتورية رئيس الهلال وتدخلاته وقرارته ، زول بتكلم عن قضية البرنس العادلة ، وطلع في النهاية ما عنده قضية ، وتطلع القصة كلها (حساسيات ومكاواة) ، معقول في زول مسؤول وطارح نفسه من دعاة التغيير ممكن يقول ( سحبت إستقالتي عشان أؤكد عدم قدرة المجلس علي قبولها) ده شنو ده .. ده بهظر، بتكلم جادي ، بتونس بينا ، بونس في روحو ، ماقاله الطاهر يونس كارثة وعنوان يعكس مستوانا الإداري المنهار.
زول إستقال عشان يسحبها دي جديدة (لنج) … زول إستقال عشان يلعب مع المجلس لعبة القط الفار ، زول إستقال بدون موضوع ، وكان قايل في موضوع ، ولما بقي مافي موضوع بقي ماعنده موضوع، سحبها بدون موضوع ، فهمتو حاجة؟
الطاهر يونس ختم تصريحه المرتبك بإرتباك عجيب قال ( مجلس الهلال فاقد الشرعية ويلعب علي الوقت وأكد ثقته في كل الإجراءات القانونية التي قام وسيقوم بها لتحكيم صوت العقل) إنتهي .
الزول ده مالو؟ كيف يكون المجلس فقد الشرعية وكيف تسحب الإستقالة من مجلس فقد الشرعية، وياالطاهر يونس مالك؟ سؤال الله يرضي عليك في مجلس ولا مافي؟ لأنه لو في مجلس معناها مجلس شرعي ، ولو مافي ماممكن تسحب إستقالتك من الهواء؟ ، لكن قول الهواء وافق وقال ليك أسحبها ، وضعك القانوني في مجلس الهواء ح يكون شنو؟ أوع تقول لي قانوني ، لكن مانستبعد، وممكن الطاهر يونس يطلع علينا بكره بتصريح ويقول (أنا المجلس) . براهو كده مجلس لحاله .
كله جايز ، وخلونا مع (أليس في بلاد العجائب).
hassan faroog [hassanfaroog@hotmail.com]
