الصعايده وصلوا

بسم الله الرحمن الرحيم
في السلك

*انتهت التسجيلات
*الصعايده في مصر عادي ببيعوا ليهم تمثال رمسيس
*هنا في السودان عندنا
*مسرحية الصعايده وصلوا
*في الموسم مرتين الفرق بتشتري رمسيس
*تمثال رمسيس يبيعه السماسره للفرق المختلفه
*في فرق بتشتري ليها تمثالين تلاته
*رماسيس كتااااار
*او قل رمسيس الاول ورمسيس التاني ورمسيس السادس عشر
*في التسجيلات الرئيسيه بطلعوا حق مصاريف السنه
*وفي التكميليه بطلعوا حق المدرسه ورمضان
*المره دي في فرق اشترت رمسيسين
*رمسيس من البرازيل ورمسيس من الاهلي
*ورمسيس التالت فوتوهوا
*وعندها من بداية الموسم
*رمسيس كانوتيه
*وفي فرق اشترت خوفو ومنقرع
*وفي ناس جابوا تهراقا
*هييييييييييييييييييييييع
*الصعايده وصلوا
*والاداريين عندنا شدت ما صعايده
*الرماسيس بقوا يجوا براهم يقيفوا جمب الاتحاد
*بتباعوا عادي
*رماسيس وابان هولات من جميع نواحي افريقيا
*وصعايدة مجالس الادارات في السودان اسكت بس
*عويص الصعيدي اضحوكة مصر
* بضحك عليهم وبنكت فيهم
*سنويا بشتروا رمسيس
*عادي جدا وبكل تباهي كمان
*والغريبه سنويا بيلدغوا من نفس السماسره
*وبنفس الطريقه
*كلهم بالبندقه
*قالوا في تلاته صعايده قبضوهم في ادغال افريقيا
*قبضتهم قبيله افريقيه بدائيه جدا
*ماشين ساااااكت
*بس لافين حتة جلد في نصهم وشايلين حراب
*السكسك مايديك الدرب
*والكدوس قشه
*اها قاموا ربطوا الصعايده التلاته
*واقاموا طقوس معينه
*لاخلوا ليك ايقاع ولا خلوا ليك رطانه
*بعد شويه ظهر زعيم القبيله
*طويييييييييييييييييييييييييل
*وازرااااااااااااااق
*وشايل ليهو كدوس بتاع قصب
*القبيله كلها صرخت وانحنت ومالت في طقس بعرفوهوا براهم
*زعيم القبيله قال ليهم
*وهموتو اسألوتو .....موتوا موتوا مشنقوتو ولا بندقوتو
*يعني اسالوا الصعايده الوهم ديل
*قولوا ليهم تموتوا  بالمشنقه ولا بالبندقيه
*جابوا الاول ختوهوا في حته عاليه
*عندهم واحد بعرف عربي
*اظنوا ده البجيب ليهم الزيت من الدكان
*سأل الصعيدي
*تموت بالمشنقه ولا بالبندقيه
*الصعيدي قال بالمشنقه
*ربطوهوا وعلقوهوا وجروها ابت تشتغل
*زعيم القبيله قال ليهم
*آلهوتي عمروري جديدوري ادوري
*يعني الآلهه ادتو عمر جديد
*فكوهوا وقالوا ليهو بختك
*جابوا التاني
*قال ليهم بالمشنقه
*برضو نفس الحكايه ابت تشتغل
*وقالوا ليهو الالهه ادتك عمر جديد وفكوهوا
*جابوا التالت
*سألوهوا تموت بالمشنقه ولا بالبندقيه
*قال ليهم بالبندقه
*الصعايده كوركو ليهو
*قول لهم بالمشنقه يا عطوه
*قال ليهم عطلالالالالالالالالانه
*عطوه دي ينفع اداري في فرقنا دي
*يغشوهوا السماسره سنويا بنفس الطريقه
*ويشتري نفس الرمسيس
*ولما يسألوهوا تموت بي شنو وهو عارف المشنقه بايظه
*يقول ليهم بالبندقه
*معقوله
*برازيلي قدر يانكو مدرب المنتخب سنة سبعين وفرحانين !!!!
*الابقاء علي كانوتيه رمسيس الاكبر وفرحانين !!!!
*والغريبه صلاح الضي الخلي الكورة قبل سطاشر سنه
*لقي السوق مدور سجل
*صعايده كتار يا عمك
*حقوا ناس بشاره يرجعوا
*كفاهم غربه
*والرزق في البلد دي راااااقد
*بالبندقه عند ناس عطوه
*قالوا لي المريخ جاب عمر بخيت
*قلت ليهم و غارزيتو خلي المريخ  ليه ؟؟؟؟
*والغريبه زول يضحك في تسجيل عمر بخيت علي اساس انو طاعن في السن
*وفي كشوفاتو كاريكا
*وبجدد لي مساوي
*وبسجل فيصل موسي علي اساس انو صغير
*الصعايده كتااااااااااار
*والرماسيس ماليه البلد
*بالبندقه يا عطوه
*ماحدش محوش منها حاجه
*عشان كده
*لما يجوا الاداريين لمكاتب التسجيلات بالفارهات
*السماسره قلوبهم بتهتف
*الصعايده وصلوا الصعايده وصلوا
*ايها الناس
*البقت بقت
*والبقت علي رديف المريخ والاشبال كارثه
*والمجلس بدفع فيهو زول واحد
*وحرام نحملوا كمان صرف الاشبال والرديف
*هناك رأي مريخي جماهيري
*حقو نسلم الرديف والاشبال لطارق سيد المعتصم
*يوفر اموال التسيير
*يوفر اموال التسجيل
*يشرف ماليا واداريا علي الفرق الاتنين
*ويختار من يراه مناسب ليساعده
*حتي اختيارات  الاجهزه الفنيه نسيبها ليهو
*شرطنا الوحيد ان يكون الفنيون من اولاد المريخ
*فهم كثر
*ونرجع بعد سنه نقيم التجربه
*اذا نجح نلزمه بالاستمرار
*واذا لم يوفق نشوف حل تاني
*لكن حاليا
*الرجل الامثل هو طارق سيد المعتصم
*ناقشته في الموضوع
*مشكورا قبل التضحيه
*وقلت ليهو تجيب القروش من بيتكم
*تجيبها من اصحابك
*تجيبها تنزيل
*النادي مابديك ولا تعريفه
*قال لي كان اداني ما داير
*رأيكم يهمنا يا اعضاء مجلسنا الهمام
*اربعطاشر راجل ماقادرين توفروا مية مليون
*راكبين مركب سيلفا وماشين علي جزيرة الكنز
* راجيين جمال يدفع قروش اعادة قيد اولاد الرديف ؟؟؟
*اخدمونا وافتونا في مقترح طارق ده وكتر خيركم
*ايها الناس
*ننعي بقلوب حزينه الاستاذ عادل فضل
*الذي راح مبكيا علي شبابه يوم امس
*وان كنا سنذكر محاسنه
*تاسيسا علي حديث الرسول عليه افضل الصلاة والتسليم
*اذكروا محاسن موتاكم
*سنذكر حياته كلها
*فكل حياته كانت محاسن
*اللهم ارحمه وادخله بفضلك فسيح جناتك
*ونعزي انفسنا قبل ان نعزي اسرته في الرياضيه واهله
*ولانقول الا مايرضي الله
*انا لله وانا اليه راجعون
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*سخت شديد علينا
*ورمضان قرب يجينا
*لو جا بالطريقه دي يا والينا
*البتلقاهو صايم يامن  داعش او مع الحوثيينا
*الناس دي كلها بتعمل ليها كلي يا والينا
سلك كهربا
ننساك كيف ورمضان لو جا في السخانه دي الهلال يلعب كيف العصر في الكنغو ؟؟؟؟
والي لقاء
سلك

b_silik@hotmail.com
////////