المريخ عاصمة الثقافه السودانيه

بسم الله الرحمن الرحيم

 

في السلك

 

 

 

·        في المريخ في قطاع اسمو القطاع الثقافي

·        يقوده الرائع عمر محمود خالد

·        وبرفقته مثقفون صفويون حمر شديد

·        منهم الرائع الفنان جعفر سعيد الريح

·        قابلت جعفر

·        ولان الوطن همنا

·        تناقشنا في ثقافة المريخ

·        جعفر سعيد لديه مشروع ثقافي ضخم يذكرني بالخرطوم عاصمة الثقافه العربيه

·        ولذا استأذنت جعفر سعيد في تسمية المشروع بالمريخ عاصمة الثقافه السودانيه

·        ولان الفكره غير قابله للسرقه

·        ولان من يسرقها لايستطيع ان يجيد تنفيذها

·        لكل ذلك سافصح عنها

·        هي جمهرة ثقافيه لاندية المريخ داخل الوطن الكبير

·        دائما تكون في الفتره من ديسمبر وحتي فبراير

·        فترة توقف النشاط

·        تتباري خلالها اندية المريخ ثقافيا

·        مسرح 000 شعر 00 غناء000 القاء شعري 000وضروب اخري

·        المهرجان الاول يكون بالقلعة الحمراء دون مشاركة تنافسيه من المريخ الاب

·        وسنويا يقوم المهرجان لدي مريخ من الانديه المريخيه بالولايات

·        الاشراف العام سنويا للمريخ الاب

·        يعني السنه دي هنا الجايه مثلا في بورتسودان ثم الابيض

·        اعجبني المشروع الذي اعده استاذ جعفر بالتفاصيل

·        الامر الان امام القطاع الثقافي

·        يلا يا فنانين

·        نحنا جاهزين

·        عندنا ثقافه وحوض سباحه بعد نتثقف نعوم وبعد نعوم نتثقف

·        حلالالالالالاتنا

·        امس لاقيت واحد هلالابي جاي من المطار قال لي الهلال طيارتو قامت

·        قلت ليهو الله يكتب السلامه

·        قال لي ماواجعاني هزيمتنا من مازيمبي في امدرمان

·        قلت امال مكرفس وشك كده واجعاك بطنك ؟

·        قال لي ابدا 000 الواجعني انو يوم مازيمبي غلبنا الناس الفرحوا في الشارع كانوا اكتر من الناس البفرحوا يوم نحنا نغلب

·        قلت ليهو يعني مستواكم الجماهيري طلع زي مستواكم الفني ؟

·        قال لي اكتشفت اننا حبه 000 شويه خلاص

·        قلت ليهو يعني الموج الازرق طلع موجات صويتيه سااااي ؟

·        قال لي الفكي  قال نحنا ممكن نغلب مازيمبي في بلدو اربعه

·        قلت ليهو الفكي زاتو لو لعب طرف شمال معاكم طرف مازيمبي اليمين بحاورو 000 بحاورو

·        وكان حاورو بعكسها

·        وكان عكسها براااااكم بتعرفوا الباقي

·        وكان لعبتو الفكي متوسط دفاع بتخسروا ديمبا

·        وكان خسرتوا ديمبا براااااكم حاتشوفوا الحاصل

·        قال لي الفكي ده انت قايلوا هين ؟ ده الفكي ابو كدايس

·        قلت ليهو ابو كدايس ده فكي ولا كداره ؟

·        قال لي ابوكدايس سافر مع ناسنا شايل معاهو اربعين كديسه

·        قلت ليهو ابوكدايس ده ماعارف ناس الكنغو بربوا الكلاب طول العمر ؟ موبوتو براااهو عندو سبعطاشر كلب , واي زول من الجمهور داخل الاستاد لازم يكون معاهو تذكرة دخول وكلبين , الكديسه الاتطير

·        كنت قااااعد جمب البحر

·        فاتح خيالالالالالات

·        اتخيلت ليك ابو كريق لابس تي شيرت واحد وعشرين اكس لارج

·        قال لي تي شيرتي كيييف ؟

·        قلت ليهو زي العجب

·        قال لي الدخل العجب في تي شيرتي شنو ؟

·        قلت ماتزعل خلاص زي الكنغو

·        قال لي زي الكنغو كيف يعني ؟

·        قلت ليهو مشكل دوائر خمسات خمسات

·        بارك الله في ثورة الاتصالات وفي راديو وتلفزيون العرب ونحنا بنحبها ياخالد عزالدين , عشان لو ماراديو وتلفزيون العرب لما ترجعوا حاتشبكونا درون , اتنين واحد ليهم والحكم خاين وحاجات زي دي

·        نشوفي برانا ونعرفي كم 0

·        سمعت في الاذاعه ان طيارة الجماعه قامت الساعه تلاته

·        الساعه سبعه سمعت ان طيارة الجماعه وصلت يوغندا وفي طريقها للكنغو

·        قلت الطياره ماشه في فوج ؟ ناس المرور ديل بقوا شغالين فوق ولا شنو ؟

·        لكن احتمال الطياره تمشي علي الكنغو متر وترجع مترين

·        كويسه برضو عشان يكون عذر السفر المرهق

·        الكنغو زاتها فيها حتانه

·        امشوا ليها رحله

 

سلك كهربا

               مطار وادي سيدنا اقرب للحتانه من مطار الخرطوم

والي لقاء

سلك