الوزير (يتهنقط ) في شنو !!!

بسم الله الرحمن الرحيم
في السلك

*التسجيلات في السودان زي الولاده زمان
*اقول الولاده زمان لانو الولاده اختلفت بين زمان واسي
*زمان الناس كلها تكون راجيه الولاده
*واول ما تتطلع الدايه
*يجروا عليها
كلهم بصوت واحد
*ولد ولا بت
*اسي طبعا الولاده اختلفت
*بقت زي الامتحانات
*من بدري تكون عارفها متين
*وولد ولا بت
*وفي ناس بوزنوها مع الاجازه
*بل في ناس بختاروا يجيبوا كم
*واحد
*توأم ابو جوز
*توأم ابو تلاته
*وحتي الجنس
*ولد وبت
*ولا ولدين
*ولا بتين
*ولا بت وولد
*الولاده اتطورت
*والطب زاتو اتطور
*والله لو ما الطب اتطور
*كان شكينا في قصص كتيره
*المهم
*التسجيلات بتاعتنا في البلد دي
*زي ولادة زمان
*الولاده متين مامعروف
*المهم دخلت التاسع وفي اي لحظة متوقعه
*والغريبه الغشيمه لو حاسبه غلط
*تمقلب ليك خروف السمايه زاتو
*ولد ولا بت
*مامعروف الا يجي مارق ويفصح عن نفسو
*تسجيلاتنا جايبين منو ومن وين وليه ومتين
*زول غير رب الخير عارف مافي
*بنجح ولا يفشل
*القصة توفيق من الله سبحانه وتعالي
*لذلك تلقي الهلال يشطب كانوتيه الليله
*وبكرة ينط
*كردنه يقول ليك الاعتماد علي النشئ
*ويجدد للشغيل وعمك مساوي تلاته سنين تاني
*نحنا موضوع كوفي فيهو شنو
*مافي زول بعرف الا اليوم بعد يقفل باب التسجيلات
*الياسو مدخلنو كشف  طبي سته مرات ليه
*الياسو زاتو ماعارف
*شكه في روحو
*قال يا ربي يكون عندي شنو
*وده السودان
*واجمل قرار صدر فيما يخص التسجيلات
*هو قرار رئاسة الجمهوريه بمنع التجنيس
*خلونا نروق شويه
*ياخ تسجيلاتنا لو مازي ولادة زمان
*برازيلي الهلال ابو اسره كريمه
*الراجل شدة ما كبير
*نام تربيزة الولاده اقصد التسجيلات
*الزول ده الضغط قايم عليهو خلي بالك
*واحتمال العمر
*للسن احكام
*الناس الكبار ديل بتجيهم غفوه
*مابقدروا يقاوموها
*غايتو لو جاتو الغفوه في كورتنا
*وختفها من قدامو الشبل ابراهومه
*الزول ده لمن يصحي بلقاها تلاته صفر
*عمك ياخ
*ايها الناس
*المجموعات علي الابواب
*ونذكر
*ابو الهل لاعب في الكنغو
*وضد مازيمبي
*وفي رمضان
*والشمس بره
*كان دايرين كلامي
*ما تفطروا
*العبوا صايمين
*ماممكن تخسروا الكورة والصيام
*صوموا صيامكم
*والقاسمه الله بدوكم ليها
*الفاطرين ليها شنو
*لو اتعشيتوا الباقيه باقيه
*نحنا كورتنا هنا
*في رمضان برضو
*في استادنا
*بالليل
*نضرب الحلو مر في الفطور ونتسحر بالفريق الجزائري
*ومجموعتنا كلها صايمه
*يعني زول بلعبنا بالنهار في رمضان مافي
*ولما نقابل مازيمبي في دور الاربعه ان شاء الله
*بنلاقيهو ماكلين الضحيه وتريانين
*كورة الختام طبعا الاولي عندنا
*التانيه بره
*باقي بنحب الجويه نحنا
*ريحة المطار يا فرده
*مطار مطار
*ما طير طير يا محمد عبدالماجد
*الخوف نكون جايين بالكاس
*وعمك البرازيلي ابو اسة محترمه نقابلوا في صالة المغادره
*بي اسرتو يا عمك
*زول يودعو ما حايلقي
*باقي الجماعه ديل مابحبوا الوداع
*بفكوا الزول عكس الهواء في الاستاد
*ايها الناس
*ناس شارع الحوادث اخجلونا بمشروعاتهم الراقيه الباقيه في نفوسنا مابقت الحياه
*واجمل حاجه عملوها
*انهم ادوا شرف قص الشريط  في الافتتاح لست الشاي
*اختيار موفق ومعبر وجميل
*لانو لو جابوا وزير مثلا للافتتاح بحرجوهوا
*معقوله وزير ماعمل العنايه ويجي يفتتحها ؟؟؟
*دور ست الشاي كان كبير جدا
*فهي صاحبة البنابر التي اتت منها الفكره
*وهي صاحبة الصبر الجميل
*وهي رمز من رموز البلد دي الذي يجب ان لا تخطئه عين
*وهي تعبيرا عن كبرياء امه وشعب
*الوزير يعمل انعاشو ويجي يفتتحوا ونصفق ليهو
*لكن يجي (متهنقط ) في اللاند كروزر عشان يفتتح غرفة انعاش ماساهم فيها بي لمبه
*مابتجي
*والوزير لما يتهنقط حقو يتهنقط بي حقو وانجازو واعجازو
*ما يتهنقط في انجاز الناس
*الوزير يتهنقط في شنو ؟؟؟
*شكرا جميلا لكم يا ناس شارع الحوادث
*ومابتنضام بلد شبابها ما باره الخيابه
*بل شال هموم الناس علي اكتافو واجبر الظروف كي تطاوعه لخدمة انسان البلد
*ان شاء الله لاتفوتوا ولا تموتوا يا ناس شارع الحوادث
*والمرة الجايه لما تعملوا مركز غسيل الكلي
*خلوا عمك الطاهر سيد التسالي يفتتحوا لينا
*عمك الطاهر الرجل الطاهر
*المباري ملوة تسالي اليوم كلو
*من اجل العيش النضيف
*بارك الله فيكم فردا فردا
ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*موضوع ميدان العاشره في الثورة لسه بحير فينا
*تجي تورينا
*ولانجيب ناس العاشره ونجيك تبرر لينا ؟؟؟؟
*ولا ننسي الموضوع وتنسوا الموضوع وينسوا الموضوع وميداننا يرجع لينا !!!!!!
سلك كهربا
ننساك كيف وميادينك ميادينك محرمة علي مواطنينك
والي لقاء
سلك
b_silik@hotmail.com
///////////////