سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• زمااااااااااان
• ايام الجينز طلع جديد كان حااااااااجه كده
• وتواترت منه موديلات كتيره وجدت رواجا ما بعده رواج
• بعد شويه الاولاد المفلهمين ( اولاد العز ) بقوا يجيبوا جينز باهت في محلات معينه
• علي اساس انه النوع الاصلي
• فانكب باقي الاولاد المامفلهمين علي بناطلين الجينز حقاتهم و بقوا ( يبرطوا ) ليك الجنز في الغسيل لما يعرف حاجه
• عشان يبهت زي بتاع اولاد العز
• ويتقلوا ليك المكوه في الاماكن المفروض تبهت
• تطورت فلهمة الجينز
• واصبح موضوع الساعه
• تجي لابس ليك جينز زمان زي الراكب ليك برادو اليويمن دي
• وتطور الجينز ومواضيع الجينز
• الناس المكترين المحلبيه الوكت داك بقوا يتكلموا انجليزي عشان الجينز
• الواحد بقي يقول والله ماشي القاهره داير لي بنطلون بلو جينز
• بقوا مابقولوا جينز ساي
• بلو جينز
• اها
• في الوكت داك كانت تجارة الشنطه جديده لنج
• الجماعه العنقاله
• الواحد يطلع جواز ( كان رخيص جدا ) ومصر جاك زول
• واحدين بمشوا بي حلفا
• ديل البجيبوا الحلل والصواني والستائر
• عشان الوزن
• وواحدين بمشوا بالطياره
• وديل البجيبوا اكسسوارات ( الجكس ) زمان كان اسمها الهتش
• وبجيبوا احذيه وقطع غيار خفيفه
• وبعض الادويه
• كانوا شغالين في امانة الله
• يربحوا ويخربوا في الاقتصاد الوطني زي مادايرين
• المهم
• قال ليك واحد من تجار الشنطه المفلهمين قاعد وسط (جكس ) في عرس بعد الحفله انتهت
• طبعا زمان حفلة العرس بتبدأ الخميس وتنتهي الجمعه
• بقوموا الشباب يقعدوا يتونسوا لما الشمس تطلع بسيط ويكسحوا
• في قعده بعد الحفله صاحبنا قال ماشي القاهره ( لزوم القشره )
• واحده سألتو لي شنو ؟
• صلح قعدتو وطلع المنديل ( المنديل كان موضه ) وقشقش عويناتو وشم المنديل ( زمان كان المنديل بريحوهوا )
• الواحد يكب ليك فتيل الريحه كلو في المنديل لو ماشي عرس
• ويتمني واحده تقع ليها حاجه في عينها
• عشان يديها المنديل
• وتشم الريحه
• وتقتنع بان الولد ده قشره ومغندل
• المهم صاحبنا بعد البت سالتو قال ليها
• ماشي مصر عندي طلبيات كده وداير اجيب لي روحي بلو جنز احمر
• الكلام ده اتذكرتوا وانا اطالع صحيفة الاهرام اليوم الرائعه
• تنقلت بين صفحاتها في متعه متناهيه
• مواضيع كتيره لفتت انتباهي
• ولان المجال هنا لايتعلق الا بموضوع واحد من تلك المواضيع فاني اتناوله هو فقط
• قرأت فيها موضوع بصفحة الرياضه عنوانه الهلال يستأنف اعداده لمواجهة السوكرتا
• الموضوع قال
• يستأنف فريق الهلال اليوم الاحد اعداده الجاد تأهبا لمواجهة حي العرب بورتسودان في الجوله السادسه للدوري الممتاز والتي تقام الثلاثاء المقبل بالقلعه الزرقاء
• اول ماقريت القلعه الزرقاء وقعت في الواطه من الضحك
• اتذكرت صاحبنا بتاع بلو جينز احمر
• نحنا سمينا استادنا القلعه الحمراء
• بي حقنا وسراميكنا وطوابقنا وحوض سباحتنا ونادينا التلاته طوابق وكشافاتنا الكريستال
• قلعه زرقاء في شنو ؟
• اسي ده ما كلام زول الهتش زاتو ؟؟؟؟؟
• طيب قول قبلنا تسميتكم لاستادكم بالقلعه
• المويات الراكضه حول القلعه دي شنو ؟
• سمعنا بانو حبيبات المويه علي الزهر اسمها الندي
• المويات الراكضه حول قلعتكم دي ندي برضو ؟
• دي يعني نقدر نسميها ندي القلعه ؟
• ندي القلعه الزرقاء ؟؟؟؟؟
• حيرتونا
• ايها الناس
• نلتقي بالامل عطبره
• نتوقع اداء متطور وشبابي
• نتوقع وقفة جماهيريه من الشفوت
• نتوقع استيعاب اجود لطرق اللعب وتكتيكاته
• نتوقع تشكيله يغلب عليها العنصر الشبابي
• ايها الناس
• الدافي لاعب دخل قلوبنا بسرعه بفضل غيرته وحماسه
• ولاعب بمثل تلك المواصفات لا يشبهه التمرد
• بل قل لا يمكن ان يتمرد
• فقط يجب ان يكون الجلوس معه بحياديه وتفهم للدوافع
• ويجب ان يعلم الدافي انه لاعب محترف
• وان حكاية الحردان ( ان صحت ) لعدم الاشراك دي حقت لاعبين هواه
• يجب ان يتعامل باحترافيه عاليه
• لانو ليس محترف بالدين
• ولم نتسبب في مرض امه
• والدته تحمد الله
• ولدها قاااااااابض
• المهم
• قلت لي المويات دي ندي شنو؟؟؟؟؟
• ايها الناس
• الكهربا تاني قامت لي حركاتها
• وحقو ناس الكهربا يعرفوا انو حركات زي دي اليومين دي بتدعونا كي نلتقي في الفيس اقصد الفيوز
• ماممكن صيانه تستمر كم وعشرين يوم في منطقه واحده يقطع لها التيار يوميا من الساعه الثانية عشر وحتي الخامسه
• في منطقه جلها مكاتب وتحتاج في عملها للتيار
• هووووووووووووووي ياناس الكهربا
• ماتبقوا السبب انتوا
سلك كهربا
ننسي كيف بس ؟
والي لقاء
سلك
babikir maki [b_silik@hotmail.com]
