تامنها مويه في البرد ده !! .. بقلم: بابكر سلك

بسم الله الرحمن الرحيم
في السلك
*الاهله حلوين شديد
*وناس روشا الاحلي
*روشا طوالي بزيدها موية
*اول امس في المؤتمر الصحفي 
*مدرب الهلال الفاتح خيال
*بي خيالو ده حدد نسبة واضحه
*قال وصلنا لي اربعين في المية من الجاهزيه
*روشا زادها كوز
*هي ناقصه يا روشا !!!!
*زادها مويه وقال المدرب قال وصل لي خمسه واربعين في الميه من الجاهزيه
*زيد ياحبيب
*اصلو اي شئ زاد
*امس المدرب قال سيخوض مباراة العربي بسبعطاشر لاعب
*روشا طوالي زادها مويه
*قال طمنطاشر لاعب
*زيادة المويه في البرد ده بتوديكم يا روشا
*وبالمناسبه
*روشا زعلان من فشل اجتماع الاستئنافات للبت في قضية بكري المدينه والازرق
*الصحيح قضية الازرق وبكري المدينه
*بكري ماشغال بالازرق الشغله
*الازرق هو الشغال بي بكري 
*داير يموت عديل كده
*وشو اتختف
*الازرق بقي ازراااااااااق 
*الله يجازيك يا بكري
*لكن ياروشا وكت بتزعل لي فشل اجتماع
*ازعل لي فشل معسكركم ده
*ازعل لفشل تسجيلاتكم دي
*ازعل لفشلكم في مغادرة محطة الصفر الدولي دي
*محل الزعل رااااااقد
*بعيد من بكوري
*ايها الناس
*الاعداد يسير بصورة طيبه
*ويكاد يكون التكوين الفني والمهاري للفريق السنه دي الافضل خلال السنوات الاخيره
*يبقي وقفة الجماهير هي الفاضله
*ووقفت الجماهير بتبقي واضحه وظاهره من تفعيل الرقم الوطني
*لاتنسوا الرقم الوطني 2870
*احد الظرفاء علق علي اختيار هذا الرقم بقوله
*ان المريخاب يحبون الرقم 2870 لانه يمثل السنه التي سيحقق فيها الهلال بطولة جويه ويفارق صفره
*سنة الفين وتمنمية وسبعين يا روشا 
*دحين ماعصرتوا علي الصفر الدولي شديد !!!!
*المهم
*اذا قدر لهذا المشروع النجاح
*بالتأكيد سيدر اموالا علي المريخ
*تمكنه من شراء استاد الهلال للاشبال
*وتسجيل من يرتفع مستواه من لاعبي الهلال
*اسوة باخوته طمبل ومجاهد وكليتشي وعزو ونزار (اعتبار ما يكون ) وتراوري وبكري المدينه
*القنبلة الفجرت الجوهره
*الكرة الآن في ملعب الشفوت
*البتقدر عليهو بدعم
*ببقي مليارات
*مشروع يتيح الفرصه لكل مريخاب العالم للمشاركه والمساهمه
*الفكرة قديمه نعم
*وسبق وان طرحها الفريق فاروق من قبل
*ومن قبله طرحها مهندس مختص
*وبالمناسبة
*هذا المهندس له افكار داعمه كبيره
*يمكن ان تضاف مع هذه الخدمه
*بشرط ان يكون ذلك قبل تفعيلها
*ولذا نتمني ان  يبحث الناس في تلك الخدمات الاضافيه وامرها
*قبل الاستعجال في تفعيل الخدمه
*وعائد تلك  الخدمات الاضافيه لايقل عن خمسمية مليون (بالقديم ) شهريا
*ولا تكلف المشارك اي شئ يذكر
*ولكنها تدر ارباحا طائله ودخلا كبيرا
*المهم
*ناس روشا يدوها كوز وهي تدينا طراوه
*لكن زيادة المويه ياروشا في السقط ده صعبه شديد
*طبعا نحنا اصحاب الصلع كومنا برانا
*ناس السراميك
*انا وجعفر سليمان وحسن محجوب ومدرب الهلال الجديد وكردنه و فطومه اختي ما معانا
*كردنه ده طبعا زينا
*لكن داسيها بالحلاقه الخفيفه
*المهم
*الصلعه عندها قصة عجيبه
*في الشتاء زي السكريه في الفريزر
*ايدك ما بتقدر تختها فيها
*سااااااااقطه
*في   الحمام المويه تجيك من الدش
*زي المطره في الزنكي
*في الصيف
*كان عندك عجين جاهز بتعوسو طوالي 
*الطايوق راااااقد
*عشان كده اصحاب الصلع مع دخلة اي فصل من فصول السنه بصروا وشوشهم
*مابنفع معانا الا الربيع
*والبلد دي عدمانه اسم الربيع
*ربيع عربي مافيها
*ناهيك من الربيع الاوروبي
*اها
*بوادر كلام وطراطيش تتعلق بشمس الفلاح
*القصه واضحه
*والحكاية معروفه
*والمريخ في السليم
*واذا في بلوه بتقع بعيد
*لكن لن تصيب المريخ
*وهذا اللاعب يذكرني بضياع مستقبل والي الدين القضارف
*حرشوهوا وضيعوهوا
*ومشوا خلوهوا
*المهم
*نسأل الله السلامه
*ايها الناس
*ان تنصروا الله ينصركم
*اها
*نجي لي شمارات والي الخرتوم
*انت يا والينا
*صحي القطر ده والبص النهري جبتهن لينا !!!!!
*ومن زمان وين يا والينا
*ان شاء الله ربنا يجعل ايامنا كلها انتخابات عشان تحسوا بينا
*لكن الفلسه الفينا
*مافلست انتخابات يا والينا
*حقوا تأجلوها لينا
*او تبهلوها يا والينا
*معقوله السنه الجديده الرسوم تتضاعف لينا
*والرغيف يخف وزنو علينا
*ضامنين الانتخابات يا والينا
*ولا الحكاية حقاره بينا ؟؟؟؟
سلك كهربا
ننساك كيف ورغيفكم ده لابشبعنا ولا بفوزكم ولا بصوت لينا
والي لقاء
سلك
b_silik@hotmail.com