تدشين حملة…”مك..البلد”!! .. شعر: إبراهيم الكرسني

أصبحنا بالواحد الأحد
وأمسينا بالرحمن عدد
قالوها كل أهلي الغبش
فى مدني يوم جاهن ولد
قال ليهن “المك” فى البلد
…
ليهن زمن ما شافو مسعولن كبير
ليهن زمن ما شافو حتى ولا مدير
الزيت كمل ما شافو زول…
كمل الدقيق ما شافو زول…
عاشو المحل ما شافو زول…
جاهن مطر ما شافو زول…
خاضو الوحل ما شافو زول…
حتى البيوت إتكسرت ما شافو زول…
كا المصايب والمحن ما جابتن
بس فجأتن جاهن غفير….
يجري ويكورك فى البلد…
يا أخوانا هوي جايي البشير؟!
…
كل الخلوق إشهدت..وإستغفرت.. وإتحصنت
تسأل بعض!!!
مالا البلد؟؟؟
شن فيها يا ربي البلد؟!
لامن يجيهم زول كبير!!
واحد يقول إنشاء الله خير
التاني قال لابد يكون أمرن عسير
ما بحلو والي.. ولا مدير
الحل يكون داير مشير!!
…
كل الخلوق إتلملمت
كان كان كبير.. أو كان صغير
إتفاءلت قالت خلاس…
من بكره بتخف الهموم
من بكره شفعنا بتنوم
من بكره بيقيف الجري
وسط السراب…
من بكره بيفوت التعب
والكل يقول…
“مك” البلد…
كان باقي قلبو على الغبش
فد كلمي منو…
والله بتفرج كرب
…
وفيهن كمان واحدين كتار
والله جايين غير سبب!!
وفيهن كمان واحدين كتار
جايين يشوفو رقيصو بس
ما مصدقين…
إنو الرقيص.. أيوا الرقيص
ممكن يكون…
بدل البرامج و الخطب!!
…
كل الخلوق إتلملمت
قالولن الخبر الأكيد
والله صح الزول وصل
قام نطا عثمان قالهن
لابد من دمن كتير
لابد من تورن كبير
يا أخوانا جايينا المشير
…
قام حمد إحمد قالهن
يا أخوانا هوووي…
بالله صلو على الحبيب
ده التور بنضبحو للغريب
أو للرحم..أو زول قريب
لكين وكت قتو المشير
كيفن بنضبح للعوير!!
…
قالولو ليه؟
يا حمد إحمد قولنا…
لابد من عندك سببن قوى وبيحلنا!!
قام حمد إحمد قالهن كضاب أشر
والله مو زي البشر…
الزيو يدوهو البحر!!
شن شفنا منو بلا الضرر
سوى البلد زي الهكر
جاب النفايات والحشيش
خلا الشباب يمشي ويلوص
والله مو جايب خبر!!
…
فى الجوطة ديك جاهن ولد
جاهن يكورك من بعيد
يا أخوانا هوووي…
الحملة جات..الحملة جات
قام حمد إحمد قالهن إنشاء الله خير
لابد تكون حملة جمكسين.. أو نفير
لكين وليدن قالهن…
حملة تصوتو للبشير!!
…
قام حمد إحمد قالهن..حملة شنو؟
حملة نصوت للبشير؟!
هوووي يا وليد..ده بشير شنو؟
ياهو البشير..القال قبيل
ما بيرجى خيرن مننا!!
ياهو البشير.. الكان بقول
ترباية أعمامنا الكبار…
شيخ اللمين.. و..ود مصطفى
والله ديل ربونا جد…
ربونا بالدرب العديل
ما فيش فساد..ما فيش كضب..لافيهو ميل
…
هوي يا وليد.. ياهو البشير؟
جايينا نحنا عشان نصوت للمشير!!
والله فعلن ما غلت القال عوير!!
زولن يكضن من هو درفونن صغير
لامن كبر وأصبح مشير…
لا يوم رمش… لا عذاب ضمير!!
وتقولي صوت للبشير؟!!
…
شوفو الكضب فى مدني…
فى وسط البلد…
قام إتنفش “مك” البلد…
قال للغبش…
الليلي بيناتنا الحساب أصبح ولد!!
أنا جايي أعمر للبلد!!
وفوق العمار….
أنا جايي بالواحد الأحد
شان أنصر الدين للأبد!!
…
قام حمد إحمد قالو خليهو العمار
من جيتنا ليك تلاتين سنة
وريتنا إيه غير الدمار
وبلدنا منبوذ بالحصار
والله وريتنا النجوم عز النهار
والله نشقفتا البلد…
والحال وقف داير بصار
وشان حالنا يعمر وينصلح
داير حكيم…داير دليل..
ما بدورلو زولن..زول كجار!!
…
ودين الله داك…
مو دين لعب…
ما بينصرو الناس الهمج
لا بدور عواره.. ولا كضب
خليهو للناس الكبار..
أبعد بعييد.. يا زول دحين
هو الدين بدورلو منافقين؟!
الدين حمايتو تدور تهجد
وناس سجود…
ناس صالحين…
ناس صادقين…
ناس زاهدين…
مو ناس يكضبو ليل نهار
لا بخافو رب… لا بخافو دين!!
…
وتعال كمان شوف الكرم…
لمان يكون القايلو معطون بالوهم
قال الجزيره يعود تمام..
من بعد ما أصبح سجم
وناس الجزيري…الكانو جيعانين زمان
ليلن ونهار أكلن لحم…
وناس الجزيري..الكانو حفيانين زمان
الليلي لابسين الجزم….
والجايي أكتر بى كتييير
والدار أقول وده وعد جد
كل زول حيرقد لى قفا
عربيتو واقفي جديدي لنج
وشان ما تقولو كلام كضب
حرم حلفتبو فى الحرم!
…
قام الوليد قاليهو…
يا بويا قولك كررو…
شان من زمان…
قرونا ناسن كيف كبار
قالونا حكمة تقولا لى
“كترة التكرار…تعلم الحمار”!!
…
قام حمد إحمد سوى قولو وكررو
قال ليهو هوي شوف يا مشير
خليهو كضبك للعمار…
خلى القمح..البيهو حالنا صبح ودار
ورينا كيف حال القطن…
الكان زمان زي المرق…
ساند البلد…قرا الصغار
وفر دوا..عالجلو مليون ألف جار
ما فينا زولن تب صرم…
أو زول يكوس حق الخدار!!
…
ورينا يا سيدي المشير…
ما قتا جيتك للحساب…
والله عاد يوم الحساب…
بالصح بتطلع زول عوير
والجرده تطلع بالكسور
وحسابنا يطلع كلو غير
وشان الحساب..يطلع حساب
مو بس كوار…
أو بس كلام…ساكت فطير
بالله أرحل يا مشير!!
…
من مدني يسأل مندهش
قتولي أرحل يا بجم!!
أرحل وأفوت….
شان تاني نرجع زي زمان
ويجونا تاني الأمريكان؟!
…
قام حمد إحمد قالو
أسمع يا سجم…
والله فى الزمن السمح
ما شفنا زول حاكمنا
غير ناس البلد…
والله ما فيهن غريب
يبنو الشوارع والسدود
والله “ما قدونا قد”…
وتاني بنقول والله بالخشم الملان
بالله أرحل يا مشير…
قبال تموت…
والجرده فى ود اللحد!!
إبراهيم الكرسني
28/2/2015م

gundial49@gmail.com