اصل الحكاية
لما يقولوا ليك جمال الوالي والكاردينال كانوا حاضرين تدشين ترشيح مجدي شمس الدين لانتخابات البرلمان عن الحزب الاتحادي الديمقراطي الاصل عصر امس الاول عن الدائرة (23) ام دوم والجريفات ، تقول شنو؟ وإنت عارف وانا عارف انه في ازمة وتهديد ووعيد بين الاتحاد ونادي الهلال والمريخ خصم اصيل .
طيب لما تعرف انه وفي نفس اليوم ده لكن بالصباح او النهار كان في جلسة لتنقية الاجواء بين الهلال والاتحاد العام إنتهت ببيان مشترك مامفهوم بالضبط زي بيان مشترك سابق بين الاتحاد والمريخ والشرطة ، مافهمنا منه اي حاجة المهم بيان طلع ليه ؟ المناسبة شنو؟ البيان ماقال . وفي بيان الهلال والاتحاد اتكلموا عن التأمين والاحتكام ، شنو الجديد ماف زول عارف برضو الهدف او البيان ماقال ، لانه المكتوب ده الطبيعي والمعمول بيهو .
طيب تقول شنو لما تعرف انه في نفس اليوم أمس الاول 29 مارس 2015 الهلال استلم خطاب من لجنة الاستئنافات العليا خطاب جديد بتاريخ قديم تؤيد فيه صحة قرار لجنة شئون اللاعبين غير الهواة بصحة اجراءات تسجيل اللاعب بكري المدينة للمريخ ، وحتي يكون المكتوب مفهوم وماتبقي علينا حكاية البيانات المامفهومة الخطاب الاستلموا الهلال بتاريخ امس الاول 29 مارس 2015 ويشير مضمون الخطاب لقرار قديم بتاريخ 20 يناير 2015 استلمه الهلال في اليوم التالي للقرار بتاريخ 21يناير 2015 .
وتقول شنو لماتعرف انه في نفس اليوم طلع الامين العام لمجلس ادارة نادي الهلال في التلفزيون وقال بالواضح وعلي الهواء مباشرة وتناقلته صحف الامس : ( بكري المدينة كلاعب لايلزم الهلال بعد ان اختار ناديا آخر ، وأن الهلال لايتوقف في محطة لاعب ، وأن القضية اصبحت تشكل لهم تحديا ليس ضد اللاعب او الاتحاد العام ولكن من اجل اثبات امر ما) انتهي حديث الامين العام لمجلس ادارة نادي الهلال .
لاحظوا كل هذه الاحداث تمت في يوم واحد جمال الوالي والكاردينال (الخصمان في قضية بكري المدينة ) معا في تدشين انتخابات سياسية لسكرتير الاتحاد مجدي شمس الدين ( الحكم في القضية) ، وسبقها اجتماع تنقية اجواء وبيان مامفهوم ، وسريعا كتبت الاستئنافات العليا التي يفترض انها مستقلة خطاب جديد بقرار قديم فصلت فيه امر التحكيم واحتفظت بتاكيد وجود خطاب قديم بطرف الهلال يؤكد تكوين لجنة للتحكيم . وكتب عماد الطيب الفصل الاخير وهو يؤكد (بكري المدينة لايلزمنا كلاعب) ، حديث مضحك ومفجع في ذات الوقت ، ومخجل ان يصدر عن امين عام مجلس او مجلس يفترض انه بقامة نادي كبير مثل الهلال ، لانه ببساطة إذا كان لايلزمك كلاعب ، واذا كنت حسب الحديث مقرا بصحة اختياره لفريق آخر ، طيب المشكلة وين؟ ماتسيبوا للمريخ ، والصحيح ان كل هذا السيناريو الضاغط في يوم واحد اكد علي تخلي الهلال عن قضية اللاعب بكري المدينة بمسرحية غبية ومفضوحة ، وكل الضجيج والازعاج (واللعلعة) من الكاردينال واعضاء مجلسه ، طلع (ونسه) تخيلوا ، ونسه من الونسات التي يتحفنا بها يوميا ، سأفعل ولن اترك ولو كان واللاعب والقضية والجوهرة والفضائية والثريا والفندق ، وكروز وميشو و وووو ، والباب جنب البيت وحبل الكذب قصير جدا ، وخلونا مع الزول ده لغاية الباب. قلت ليكم ومن بدري موضوع بكري مع المجلس ده حدوا قرييييب ، وبكره ح نتكلم عن وضع الهلال او ورطته المدروسة من الاتحاد في حال فكر الذهاب الي لوزان ، ده طبعا لو فكر . سؤال بريء جدا انتو لجنة الاستئنافات من لجان الاتحاد ولا مستقلة ؟ نشوف بكره لو باقي عمر.
hassanfaroog@gmail.com