نشن وأضرب
أضرب في المليان
جبخانة
أو بمبان
ما بيهم
دانة تاتشر
أو دبابة
ما بيهم
أضرب بس
تسقط بس
—
الشعب الجاي
ياكل جبخانة
يعطر فشفاشو
بريحة البمبان
وبخور الدانة
ما بيهمو الموت
أضرب بس
تسقط بس
—
قايل انك
تقدر تدفن احلامنا؟
قايل إنك
تقدر تقهرنا؟
بإسم الدين
والخبخانة؟
والسرقة تلعلع في حيشانك
ياكاتل أحلامنا
وتبصبص في أحلام الجيل الجاي؟
أضرب بس
تسقط بس
—
حرم ما بتقدر
لو جبت معاك
جيوش الشيطان
والجن الأحمر
والفسدة المأجورين
من كل مكان
تهزمنا
ونحن
رفعنا
شهادات الموت
أضرب بس
تسقط بس
—
نقولا عديل
ما بالدس
تسقط وتسقط بس
لأنك ساقط من يوم
ولدوك
في علم الحكم
وعلم العدل
وعلم الحق
تسقط..وتسقط بس
بالله عليك
بحلق عاين
في عيون الطفلة
السمحة
ويشيش الطفل القمحة
المغبونين
المرقو قصادك حالفين
يا تسقط
يا بنموت نحن
لأنك دمرت كيانا
والأمل الجوانا
تسقط بس
—
عليك الله البتحلف
بيهو
وترقص
يوماتي
ما عارف
سر الحليفة
انو الفي الشارع ديل مين؟
يا أخى أصحى
لمتين
تخالف الحلف
يا اخي إستحي
ديل الناس الزمان
قرفتهم
كتلتهم
هجرتهم
عطلتهم
جايين للقصاص
ياعمر
ويقولو ليك
تسقط..تسقط… بس
mamounelbagir@yahoo.co.uk
/////////////////
