تلتق طين ولا ببقي ليك نعلين

بسم الله الرحمن الرحيم
في السلك

*ايها النااااااااس
*تاني ايها الناس
*البشوف تصريحات اعضاء مجلسنا بعد قفل باب التسجيلات
*والبسمع فلسفتهم البتقول
*قمنا بواجبنا كاملا
*نفذنا اجندة الجهاز الفني
*كنا حريصون علي القيام بالمهمه بحذافيرها
*البسمع الكلام ده يقول وحاتك الحلف بينهم وقع قرض
*كأنو كلو زول فيهم كان بقول علي الطلاق الحساب علي
*ولكن الحقيقه لاتشبه التصريحات اطلاقا
*جمال وحده اعاد رمضان وسدد حساب ديديه ودفع كل الحوافز
*سحب ارانيك التسجيل والشطب والاعاره
*الخوف يكون دافعها جمال برضو
*رسوم الكشف الطبي اربعه مرات لالياسو ومره لي ديديه
*اخاف تكون فواتيرها مشت لي جمال
*وحق اقامة اللاعبين الجابوهم للتسجيلات
*غايتو قروش جمال تجقلب والتصريحات للوردات
*ايها الناس
*خلونا نقولها بي صراحه
*لا اقطاب ساهموا
*ولا مجلس شوري ساعد
*ولا جماهير دعمت
*ولا اعضاء مجلس كشكروا ساي
*ولا معارضه سمعنا ليها بيان ايام الدفع
*كلو جمال
*لكن في التصريحات ما بنلقي جمال
*فعلا السواي ما حداث
*والحداث اكيد ما سواي
*ايها الناس
*بالطريقه دي بنلحق المورده في الاولي
*يافعلا مريخاب نقوم بالدعم اللازم
*واخونا كان بقي عسل ما نلحسوا كلو
*او نقبل باي حته يمشيها المريخ
*شكرا جمال برغم انك لاتحتاجها
*ايها الناس
*مبادرة قروب احباب حول المريخ لتبني معسكر تونس ماليا
*هي مبادره توضح ان الروح لسه موجوده عند الانصار*وقبلهم ساهم قروب صفوة بلا حدود بلا حدود ايضا
*وكانت مساهمة قروب المريخ الكيان ظاهره للعيان
*ولكن لماذا لايكون العمل معمما ومنظما يشارك فيه الجميع
*ويكون الدخل ثابتا ومعروفا ودائما
*لان النفرات زي علوق الشدة
*فاهلنا في دارفور قالوا
*تلتق طين ولا ببقي ليك نعلين
*حتي لا نواجه باعضاء مجلس زي القاعدين ديل
*لابدعموا
*لا بكشكروا
*ولا بفكروا كيف يعملوا استثمارات للنادي تفكهم من فضيحة الجلدنه دي
*لنا في المريخ عقرب بالملعب
*وعقرب في جيب اي اداري
*ايها الناس
*شهر اطناشر قرب
*حقو من اسي نعرف منو البجي يدير النادي
*ومعاهو منو ومنو ومنو
*وبدفعوا كم
*وتفكيرهم في الاستثمارات شنو
*اخير ننضف بيتنا ونعلق ستائرنا قبل ما  يذيعوا العيد
*المهم
*ابقينا علي فريقنا كاملا
*اعدنا رمضان
*نقصنا فقط عنكبه
*وانهينا عقد وانغا
*واضفنا ديديه وعمر بخيت
*يبقي حتي في حالة فشل جميع الجدد لا قدر الله
*لم نخسر شئ من تشكيلتنا المعروفه التي اجبرت الترجي يشوف كونفدرالتو وين
*لان احمد ابكر لم يكن ضمن المنظومه
*ولا مالك النيجيري
*ايها الناس
*المطلوب الوقفه الصلبه مع الفريق
*من عزام ولي قدام
*قدام دي حدها المطار
*المهم
*الضحك في التلفزيون بكون ماقدر الكلام
*تلقي الكلام عادي جدا
*المذيعه تتضحك لما تتشنقل
*والضيف ما يصدق
*يقهقه ليك لما تشوف شرابو واحد اقصر من التاني
*في التلفزيون الضحك ساي
*ماداير اقول بدون سبب
*لكن ماقدر السبب
*الحال ده ياهو حال الهلال
*البشوف الجعجعه في التسجيلات
*يقول الهلال اتخلص من جميع مواسيرو الجابهم من الفجيره
*المواسير الكان داسيهم في الفجيره خوف الفضيحه
*فيهم مواسير لي اسي مدسوسه
*ناس كانوتيه
*الاهله الشرفاء خرجوا خسرانين من التكميليه
*لكن بضحكوا ضحك تلفزيون ساي
*زول يبقي علي جميع المواسير
*ولسه معتمد علي وليد (دايرين يسمنوهوا ) واطهر
*ويقول ليك تسجيلاتنا
*ماسورتين برازيليات ابو لستك
*واحده فيهن مدتها منتهيه
*وتضحك المذيعه لما تتشنقل
*ويضحك الضيف لما نشوف شراباتو
*اما الشعله
*فما قيل عنه
*قيل عن محمد احمد قبلو
*فيكم زول عارف محمد احمد القالوا فيهو ماقالوا اسي بلعب في الهلال ولا اتشطب ؟؟؟
*والمذيعه تضحك لما تتشنقل
*والضيف شراباتو في الشاشه
*ايها الناس
*وليد علي بال يسمن
*نكون في دور الاربعه ومعانا مازيمبي والتطواني ووفاق سطيف
*كتروا ليهو الحلبه باللبن يا روشا
*ايها الناس
*نكته عجبتني شديد
*كتار منكم بكونوا سمعوها
*ما كعب اقولها للناس الماسمعوها
*قال ليك مغترب في السعوديه مرتو هنا
*المره بتاعت رتينزات شديد
*معلمه في الرتينزات
*قامت رسلت لي راجلها حلو مر لي رمضان
*الراجل عارف المره بتاعت رتينزات
*قال اجرب الحلو مر ده في الهنود الفي البقاله التحت ديل
*قام زبط ليهم جك من امو
*الهنود ضربو الجك مع التشكرات
*بعد نص ساعه نزل يشوفهم
*لقاهم ليك بستفوا في شنطهم
*قال ليهم مالكم يا هنود
*قالوا ليهو رفيق شوف كلام كيف
*سعوديه ماكو بنقعد بالكل ماشين كلاكله
*المهم
*الله يكفينا شر الرتينزات
*نكته تانيه
*طبعا النسوان ما بحبن زول يسألن عن عمرهن
*واحده قال ليك مدخلنها عمليه
*الدكتور قال ليها عمرك كم
*عاينت ليهو كده وقالت
*خمسه وعشرين
*قال ليها عشان البنج ده صعب
*قبل كده واحده ادتنا عمرها غلط
*اتشلت بالبنج ده
*قالت ليهو تلتين
*قال ليها تعرفي مره واحده ادتنا عمرها غلط دخلت غيبوبه
*قالت ليهو خمسه وتلتين
*قال ليها آخر مره جاتنا هنا واحده ادتنا عمرها غلط ماتت
*البنج ده صعب شديييييييييييييد
*قالت ليهو اربعين وبعد ده مابزيدك لو الغي العمليه
*دحين محمد عبدالرحمن في العمليه في تونس قال عمرو كم ؟؟؟
*الزول ده كلموهوا البنج التونسي ده صعب
*ايها الناس
*ضحك ناس التلفزيون البعملوا فيها الاهله ده ضحك كضب ساي
*عليكم الله وعليكم الله وعليكم الله
*شيبون وابراهومه وشمس الفلاح
*ما بساووا  تلتين من رديف الهلال ديل ؟؟؟؟؟
*الله يسألكم
*قلت ليك المذيعه تتضحك لما تتشنقل
*والضيف يقهقه لما نشوف شراباتو
*وفي الفارغه ساااااي
*الموضوع ماقدر كده
*ايها الناس
*قالوا خمسة مازيمبي دخلت مرمي الهلال عن طريق عمر بخيت
*المذيعه تتضحك لما تتشنقل
*والضيف يقهقه لما شفنا شراباتو ما طول بعض
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*كهربتك دي في رمضان  ما بتقضينا
*يا زبطوها يا بنزوغ وربنا عالم بالعلينا
*والحساب بكون علي المسئول فينا
سلك كهربا
ننساك كيف وبقينا نخاف من رمضان في ظل الظروف دي مع العلم باننا صايمين حداشر شهر وبناكل في رمضان بس
والي لقاء
سلك

b_silik@hotmail.com