يابلد نيشك مجلي
تضرب المسكين في راسو
والحرامي عديل تخلي
الغني يزيد في غناهو
والفقير مظلوم تملي
ناس بتاكل لما تلقى
وناس بتاكل شان تحلي
ناس بتتعالج بتشه
وناس تعيش خلف المقشه
وضاعت ارزاق ناس في كشه
وناس تدور بس بهبشة
وواحد يهبر ليهو خمشه
حتى للمستشفى رشا
وبرضو باقي وزير محلي
هل ازيدك ام اخلي
للعليم اشكيهو حالي
غيرو مافي نصير يبالي
ناهب البلد الاراضي
ساكن الدورين وعالي
العمل عبث ارتجالي
في مجالو او مجالي
حتي تصريحو انفعالي
لو تعاقبوه تخلو والي
برضو للمنظر نحلي
في بلد دايما مجلي
يظعط المسكين في جلدو
ولي حديث اﻻفك يعلي
المباراة حتبدا حسه
والنتيجه تلاته لسه
لو رئيس النادي ساكت
او رئيس الدولة حس
كنا دشنا المفاسد
بى شريط ورئيسنا قصاه
الركب في كيسا لسه
والنتيجه بعد اذنكم
نحن مغلوبين بخمسه
المدرب بلفو اصلي
اصلو حارسنا بيجلي
في بلد مهزوم مجلي
يخبت الصادق في عينو
والمنافق هو البيوليه
اما في التعليم فاصمت
الفصول جلست جمعا
ومكتب الناظر تمدد
البنا الهلكان في عضمو
في المطر ما بقدر يصمد
حولوا التعليم خصوصي
والفقير ينطم يسكت
العلم و النور تبدد
في نظام فاسد مؤكد
لما طه القرشي هاجر
والخبيز في درجو عتت
ضاعت الامال وولت
اما منقو . . فبدري شتت
في بلد مبتور وبغلي
تاكل النيران عيالو
لابترحم لا بتخلي
يقتل الطلاب رصاصو
لا بيرحم لا بخلي
مقطع فيديو القصيدة موجود علي يوتيوب . . اكرم محمد زكي
اللهم ارحمنا أجمعين
akramaddress@yahoo.co.uk
////////////
