tahamadther@gmail.com
(1)
يقول المزارعون.نزرع الكثير.ونحصد القليل.والحكومة ممثلة فى الجبايات والرسوم وغيرها.لا تزرع شيئا.وتحصد كل شئ.
(2)
الوالى يتنفس.والخروف يتنفس.الوالى لا يفعل شيئا.والخروف لا يفعل شيئا.فان الوالى يكون شنو؟إحتفظ بالاجابة فى مكان جيد التهوية.وليس مثل الاماكن التى تُخزن فيها الامدادات الطبية أدويتنا.بالمناسبة هل المرضى من ال(VIP)قاعدين او راقدين او واقفين يستعملوا أدوية الامدادات الطبية؟ويسألنى الله يوم القيامة فقد شاهدت فى ولاية القضارف مخازن الادوية.(ادوية الدواء الدوار).تُحزن فى دكاكين فى احدى مبانى احد الاحزاب المتنفذة.
والجاسمة فوق صدورنا منذ اكثر من ربع قرن.وهى مخازن عادية.لا يوجد فيها تكيف عادى ولا مركزى.بل ليس بها منافذ لتجديد الهواء.اى دكاكين صم بكم.وبرغم ذلك يتم تخزين الدواء الذى يستعمله عامة الناس!
(3)
السودانيون كل حاجه يعملوها (كتيرة وشينه)قد تصل الى مرحلة العباطة.فالفنان الحقيقى.
والفنان الذى مثل الحمل الكاذب.,كان يصحابه اروغن واحد فقط لا غير.واليوم الفنان يصاحبه مثنى وثلاث ورباع.والانثى .الكريم كان يكفيها اسبوعاً واسبوعين.وحاليا الكريم ينتهى بإنتهاء الغسلة االثانية للوجه.وحتى مساعد رئيس الجمهورية من واحد واثنين وصل الى كم؟احسب عددهم كم؟ثم أسال نفسك.ام ان نفسك مقفولة من العد والحساب.؟ولكن برضو أسألها العربية فيها كم ياى؟وكم مساعد ياى؟
(4)
وجدى السادس عشر مكرر.يصيح باعلى صوته.وكأنه صوت مكرفونات (الحديد بتاعة زمان)وهى تدعونا للبقاء فى مكان الحفلة.لان الليل مازال طفلاً يحبو.وصعبة شديد نخلى الليل يحبو كدا ونمشى.لذلك كنا نساهر حتى تعلم الليل المشى.المهم ان جدى يصيح ياولد طلع الخروف الكبير داك من الزريبة.واضبحو. ووزع للجيران وكمان أمش اعزم ناس الجامع وناس خالك وعمك.وماتنسى المساكين القاعدين جنب الجامع.وبعد داك امش السوق واغشا الدكان وقول ليهم يوزعوا بلح.ويشدوا البلية.
والفضول يكاد يقتلنى.واريد ان اعرف السبب وراء هذه العزومة وهذه الكرامة.وسالت جدى.ياجدى الحاصل شنو؟فى زول جاء من الحج؟فقال حج فى عينك دا شهر حج؟ فقلت طيب فى زول كان مغترب جاء من السعودية؟فقال لى البجى من السعودية بضبحو ليهو.ياجنا أنت مطرطش ولا شنو؟فقلت طيب الحاصل شنو؟فقال لى كيف الحاصل شنو؟أنت لا سمعت ولا قريت؟فقلت سمعت شنو وقريت شنو؟فقال فقال لى ماسمعت الدولار إنهار امام الجنيه ؟وخفت على جدى من الصدمة.وان يدركه الموت وهو فى ريعان شبابه!وخفت عليه من إرتفاع الضغط والسكرى.فقلت له كدى ياجدى ابلع حبوبك اول حاجه.وقال بسم الله ياشافى وبلع حبوبه.فقلت أنت طبعاً زول مؤمن والحياة من الموت مامعروفة.وكدى روق المنقة وخت الكورة واطه.وواصلت كلامى وقلت له انت طبعاً عارف فى ناس بعملوا من الحبة قبة.وبعملوا من الفسيخ شربات ليمون.اجيب ليك شربات ليمون ياجدى؟فقال لى يجنا انت مخبول؟إحنا دايرين نضبح بمناسبة إنهيار الدولار وانت تقول لى نجيب ليك شربات ليمون؟فقلت له خلاص اسمع ياحاج.انت عارف انو الدولار ركب الظلط ووصل الى كم وعشرين جنيه.هسع انت عارف الانهيار القالوهو دا قدر شنو؟فقال جدى والله ماعارف لكن سمعت المحلل بتاع التلفزيون يقول إنهيار الدولار .واكيد الانهيار دا حاجه كبيرة.ولا ماكدى؟فقلت ياجدى من الاخر كدى إنهيار الدولار يعنى بقى سعرو 18 او 19 جنيه.وبلع جدى ريقه عشر مرات كاملات.وقال لى طيب وينو الانهيار؟فقلت له كدى نحاول نسأل المحلل.
فصاح جدى فى وجهى امش حصل اخوك وقول ليهو خلى الخروف فى زريبتو.وخلى ناس السوق يوزعوا البلح ويشدوا البليلة .يمكن بدعاء احد المساكين والفقرا.امريكا ترفع العقوبات عننا.ثم قال امريكا لو رفعت العقوبات حرم اضبح تور.فقلت له تور بحالو ياجدى؟ فقال ماكتيره على رفع العقوبات.وقبل كدا فى ناس ضبحوا تور بمناسبة الانفصال.والمافى شنو؟ ثم تمتم جدى بصوت هامس .اللداحة أكبر امرهم.والكلام سيد عملهم.فقلت ديل منو ياجدى؟ فقال لى ديل ناس حزب المؤتمر ال….!!
(5)
كل فقرة فى دستور السودان.البعض يراها نصاً مقدساً.ولكن كم من النصوص المقدسة.
التى لا يُعمل بها مثل نص حرية التعبير والنشر.؟.واللهم فك اسر وحظر دكتور زهير السراج.
والاستاذ عثمان شبونه.وعجل لهما بالنصر والفرج.وردهما سالمين غانمين الى القراء والمحبين.
///////////////
