سودانايل أول صحيفة سودانية رقمية تصدر من الخرطوم
أصل الحكاية
أنا لو مكان قادة الاتحاد العام كنت سأتقدم بإستقالات جماعية بعد الفضيحة المجلجة بإلغاء بطولة شرق ووسط أفريقيا (سيكافا) من الوزير كما قيل لنا ولخطأ إجرائي عادي (ماكلموهو) .. معقولة بس ؟ زمان لما يتقال ليك كلام تشعر منه بإستخفاف وعم إحترام لعقلك ترد (شايف القنبور ده) .. عشان كده لما الوزارة تقول مامواقفة نقول ليها طوالي شايفة (القنبور ده) لأننا عارفين علاقة الوزير مع الاتحاد وعلاقة جمال الوالي مع الاتحاد والوزير .. عشان كده من سابع المستحيلات أن ينتظر الوزير تصريحات جمال بتنظيم البطولة وموافقة الاتحاد وحضور سكرتير سيكافا وعقد المؤتمر الصحفي وعرض قناة صديقنا محمد خير فتح الرحمن (الشروق) .. ليه مستحيل؟ لأن الوزير بحكم التجربة لايعرف الانتظار ..
مش هو الوزير القرر تكوين لجنة تحقيق في كلام جرايد عن تجاوزات مالية في الاتحاد العام؟ ياهو الوزير ذاتو .. ومش هو الوزير القرر يكون لجنة تحقيق في احداث مباراة كأس السودان بين الهلال والمريخ؟ ياهو الوزير ذاتو .. مع إنه تكوين اللجنتين ما شغله ولااريد العودة لماكتبته قبل ذلك عن عدم إختصاص الوزير في مثل هذه الحالات والرد الذي وصلني بصحيفة (الاحداث) من مدير إعلام الوزارة علي سلطان ورهاني علي أن هذه اللجان لن تري النور أبدا لأن هذا كما ذكرت ليس عمل الوزير ..
المهم أن اللجان لم تر النور ولن تراه .. والوزير كما ذكرت لا يعرف الانتظار .. بجانب ان العلاقة بين الاطراف الثلاثة تجعل موضوع سيكافا من الاخبار الاولي عند الوزارة .. وامر الابلاغ من عدمه رسمي أو شفهي لايمكن أن يلغي بطولة اكتملت كافة ترتيباتها علي الأقل من باب سمعة السودان في المنطقة برضه مهمة حايقولوا علينا شنو الجيران؟ الاتحاد مابعرف حتي الخطوة الاجرائية؟ ولا حايقولوا مااحترموا اتحاد سيكافا؟ وسيكافا إتحاد (عينه) غير إنه مفروض يصدر عقوبات رادعة علي السودان بسبب المهزلة التي تفتقد إلي أبسط أساليب اللياقة والاتكيت وعدم الاحترام لكيان إقليمي؟ يفترض أن يصدر بيان توضيحي لكل الدول المنضوية تحت لواءه عن تفاصيل المهزلة .. وطبعا ده كله ماحايحصل .. لأسباب معلومة وغير معلومة ..
انا في لحظة إتخيلت إنه جمال الوالي هو رئيس اتحاد سيكافا مع إنه الرئيس مامعروف والمعروف الوحيد في هذا الاتحاد هو السكرتير لدرجة تتخيل معها إنه شايل الاتحاد في شنطته .. إتخيلت جمال رئيس سيكافا كيف؟ مش هو جمال القال بعد ضربة إنتركلوب حاننظم سيكافا والسكرتير زارنا تاني يوم .. ومش هو جمال القال بعد ماإتلغت حا نشارك في زنزبار والسكرتير لاحس ولاخبر .. ولاكيف؟ وجاب الثقة دي من وين؟ مع إنه لو قالوا ليهو سيكافا في الشارع ده يمشي بالشارع التاني .. خجلة ساي .. ياخي ده حتي ماشغال بالصفعة الوجها لسيكافا وإتحادها .. وزنزبار ذاتها يشيلوها منها وقت ماعايزين ويرجعوها ليها وقت ماعايزين زي ساعة الجيب ؟ ياخي ده لو دافوري بي (بيبسي) مابعملوا كده.
وحتي الاتحاد حيرنا رئيسه معتصم جعفر.. يقول المريخ خاطب إتحاد سيكافا لتنظيم البطولة والمريخ خاطبنا كيف الكلام ده؟ في نادي في الدنيا سلطته أعلي من إتحاد بلده ؟ إلا المريخ.. البنعرفوالإتحادات هي البتخاطب يعني المريخ يمشي لإتحادنا الهمام ويقدم طلب لتنظيم البطولة والاتحاد بعد داك يناقش إمكانية التنظيم كإتحاد بعيدا عن النادي.. يمكن أن يتكفل النادي بينه وبين الاتحاد العام بالصرف علي البطولة خاصة وأنها بطولة إقليمية تتبع لإتحاد قاري ومعترف بها يعني مابطولة ترفيهيه .. وبالتالي الاتحاد السوداني يخاطب إتحاد سيكافا بنيته في تنظيم البطولة (المخاطبة بين الاتحادات ولامكان للنادي من الاعراب) فمن أين إكتسب جمال الوالي كل هذه الحقوق ؟ (شفتو القنبور ده) .. العايز اقولوا لاني تعبت.. قرار إلغاء بطولة سيكافا أكبر من الوزارة والاتحاد والمريخ .. ده كلام حكومة.
hassan faroog [hassanfaroog@hotmail.com]
