رحل البروف احمد شبرين نعته كل البلد كل الحروف والالوان والوزراء والفنانين والفضائيات والعلماء واللوحات والساحات ونعته العمله السودانيه لانه كان مصممها
كان رجلا فريدا عفيفا نظيفا ما ان تقابله لا تملك الا ان تحبه وما ان تفارقه الا ان تخطط للقائه .
كانت اللوحه غيبا فاستلهم اللون سر الجمال.كان إذا شاركت احدى اللوحات الشبرينية بمعرض ما فهذا يعني أعلى وأغلى وانفس درجات الفن والخلق والابداع.
جاء وظل حزننا شديدا علي فقد ذلك العزيز .فقد الوطن، فقد الناس ،استلهام الغيب فكانت هذه القصيدة “شبرينا يا فخر البلد” .فهي لاتساوي مبلغ حزني وقامه ذلك الرجل ولكن ما لا يدرك كله لا يترك كله
حشد الحزن في يوم رحيلك ***كل
عتادو وكملو
حزن الحرف واللون كمان***شان كان معاك بيجملوا
انا كيف اقول واوصف حزن **لكل بلادنا بيشملوا
حزنا كتير ما لي براي***حزن البلد من اولو
رحل اللي كان بسمه وجمال ***الكان حزنا يبدلو
رحل الملك فارس الكلام ***الكان حلمنا يكملو
كان الامل يغشي الصعيب ***في لحظه واحده يسهلو
كان همة ما بتعرف خنوع ***الراسي تغشي تزلزلو
يستلهم الروح والجمال***من غيب بعيد ويأولوا
واللوحه تخرج من غيوب ***ساقيها نورو وصندلو
في كل شي نورك يبق **تسقيو جمال وتدولوا
شبرينا يا فخر البلد ***الشافو فنك هللو
والعرفوا شخصك هامو بيك***من قبلتك ما اتحولوا
علمك براك وفنك براك**ما اظني مثلا مثلو
رحل الجسد والروح تسوح***تسقي الكيان وتجملوا
اللون بيفرح والحرف*** لمن هواك يدللو
والدنيا يغشاها الجمال***والناس يهيموا وينهلوا
من ذوق رفيع_من فن رفيع***وقنديل جمالهم تشعلو
يا الف رحمه ونور ابوي ***تغشاك عليك تتنزلو
تأويك لي جوار الرحيم ***راضي و رضي ومتمهلو
ابنك :عبد المنعم علي شبرين
بواسطة د. عبدالمنعم عبدالمحمود العربي
drabdelmoneim@yahoo.com
