بسم الله الرحمن الرحيم
في السلك
*قرعة الممتاز رمت ناس روشا رمية صعبه شديد
*وقعتكم سوداء ياروشا
*سيدا اتقدم ليكم علي الخلا
*وقال ليكم طالعوني الخلا
*حايستفرد بيكم هناك
*خلا زي الخلا
*ودي راجيها ليهو زمن
*الارباب زاتو راجيكم في الخلا
*ودي معركه ما بنفع فيها غناء الحماس
*يعني قصة مهيرة بت عبود هنا لا بتفع ولا بتنطق
*سيدا الاسد المربعن في الخلا
*وناس روشا ماشين الخلا
*والاسد كان ربعن في الخلا
*لابخلي عتوت ولا بسيب سخله
*بوفيه مفتوح اليوم داك
*ايها الناس
*اول تلاته نقاط طارن
*لكن صدقوني
*برغم ان الاتحاد رفع شعار لا للتأجيل
*كورة الخلا دي بأجلوها
*لو يكتلوا وزير قديم
*او فنان مخضرم
*او شاعر كتب قصيده واحده في حياتو
*او يكتلوا عويناتهم
*لو ينتحر كردنه
*كورة الخلا لازم تتأجل
*فتشوا يا روشا من اسي لي سبب التأجيل
*ايها الناس
*آخر مباراة دوريه بين اسد الخلا والهلال كانت تعادل
*والقبل الاخيره كانت اتنين لي اسد الخلا في استاد الخرطوم
*وعادي جدا اسد الخلا ياكل الجماعه
*لكن دي بالذات
*مع المدرب الفاتح خيال ده
*والبرد البجبر علي فتح الخيال ده
*صدقوني
*جمعه الاجنبي المعار من كوبر
*الخوف يجي من الخلا علي مصحة كوبر
*المهم
*فاز الهلال علي اشبال الفريق الكويتي
*الفريق الكويتي فيهو سته مع المنتخب
*واربعه محترفين ما لعبوا
*وآخر يوم اتمرن قبل تلاته وعشرين يوم
*يبقي غلبتوا مين يا عم ؟؟؟
*المهم
*محمد عبدالماجد خايف شديد
*خايف من شندي
*ومن حفظه الله ورعاه
*صدقوني
*اول كورة للهلال في شندي
*صبحيتها محمد عبدالماجد كالعاده حايحتجب
*وتاني يوم حايكتب لينا عن عثمان حسين
*ومحمد محتج علي القرعه
*قال القرعه مفبركه
*الطسه خاينه
*خليك واضح يا حماده
*وقول العزله ظلم
*الارباب شال اللعابين وخلي ليكم المواسير
*شكوها وخلوا كلو اتني يتاسموا تاني
*الروس الروس
*حباب التيوس
*من سيدها للعصيده
*طبعا في البرد ده كردنه حايقول العصيده
*والعصيده تمشي لي كردنه
*وسيدها يمشي للارباب
*غايتو الا تطرشقوا اللستك في الجيلي
*وتقولوا حادث نجت منو البعثه باعجوبه
*واللاعبين في المستشفي للاطمئنان عليهم
*وتتمسكوا بالقصه كسبب للتأجيل
*لكن تصلوا الخلا
*الخلا ولا الرفيق الفسل
*وحتي يا محمد عبدالماجد
*لو عملوا ليكم كورة شندي آخر الموسم
*برضو بتمشوا شندي
*وسيدا هناك
*راجيكم في الخلا
*وعلل محمد عبدالماجد اسباب رفضه للقرعه بالآتي
*الهلال غير في تشكيلتو ومحتاج وقت عشان ينسجم
*يعني يأجلوا ليكم الدوري لما تنسجوا ؟؟
*وقال المدرب لسه مابعرف الدوري السوداني
*خلاص مفروض نعمل ليهو تعارف مع الدوري السوداني
*الاخ الدوري السوداني الاخ المدرب الجديد الفاتح
*ما الفاتح النقر
*الفاتح خيال
*وقال شندي اكملت اعدادها والهلال لسه
*ماقلتوا نموذجي في الفجيره
*وقال الهلال يعاني من اصابات جماعيه
*هكركم ده تدفعوا تمن تهكيروا للقرعه يا محمد
*انسحبوا بدل الجرسه دي
*اصلكم قبل كده لما وفاق سطيف اداكم اتنين في استادكم
*انسحبتوا من مباراة الرد قلتوا معوقين
*معوقين بالما ؟؟؟
*وقال سيمبو بعيد عن اعداد الهلال في الامارات
*يعني الاتحاد يستني سيمبو يكمل اعداده يا حماده ؟؟؟
*سيمبو ده موش كان قريب للاهداف التلاته بتاعتنا في شباككم
*يعني قربو وبعدو واحد
*وطوالي مشي علي بكري المدينه
*يا حماده
*لو البرد نزل
*تقولوا ماشين تشتكوا بكري
*لو السخانه جات
*ماشين تشتكوا بكري
*لو المدارس اجلوها
*ماشين تشتكوا بكري
*لو هلالابي اتقدم لي عروس رفضت
*ماشين تشتكوا بكري
*لو عدلوا الدستور
*ماشين تشتكوا بكري
*لو لعبوكم في شندي
*ماشين تشتكوا بكري
*لو زادت الاسعار
*ماشين تشتكوا بكري
*بقيتوا زي جورج بوش
*اي حاجه يقولوا ليهو حصلت
*يقول ده بن لادن
*الشعب الامريكي يرفض التدخل في العراق
*قال ده بن لادن
*عينك محمره
*قال ده بن لادن
*جورجه بوشه في المستشفي بتتوجع
*قال ده بن لادن
*بكري المدينه بقي ليكم زي بن لادن
*لكن صدقني ياحماده
*لا بكري بقيف مهما كررتوا الكلام وصبح كتير
*ولا المعاناه بتترفع عن كاهل الجماهير
*وفي شندي اول خمسه دقائق نقاطكم بتطير
*جرسه زي الجرسه
*وكمان خايفين من امل عطبره ؟؟؟
*الامل القرب يهبط ده برضو خايفين منو
*ومن الخرطوم الوطني
*الخوف عندكم لكن
*ايها الناس
*عجوبه خربت سوبا
*والبباري الانتايه تمرقوا في الفضايه
*تعالوا الخلا
*تعالوا الفضايه
*هيثم مربعن راجيكم
*المهم
*ابراهومه ونمر وحسن
*اولادنا من الاشبال للرديف
*اثبتوا حسن الصناعه
*وامتعوا الجماهير
*عشان كده كنا بننادي بالاعتماد علي الاشبال
*وحقوا نهتم بالباقين اكتر
*لسه في حسين ومصعب وزرديه وغيرهم
*والسنه دي النصف التاني من الممتاز حقو نلعبوا بالرديف
*لانو الفارق بيننا وبين اقرب منافسينا بعد الدورة الاولي
*بكون زي اربعين نقطه
*الجماعه من الاربعه مباريات الاولي
*بطلعوا بي نقطتين من اطناشر
*وبعد داك بتفرتقوا
*المهم
*محمد عبدالماجد بدل الجرسه دي
*اعمل ليك رقم وطني في المريخ الوطن 2870
*قلبك بقوي ومابتخاف
*لا سيمبو ولا اعداد ولا معوقين
*تتطلع للنصر دوما
*وتشوف المطار بي جوه
*ايها الناس
*ماتنسوا
*الرقم الوطني
*2870
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*بنشكر وزير التربيه القلبو علينا
*اقفلوا شبابيك الفصول قال لينا
*دي فاتت علينا
*يعني لو ماكلمنا وقال لينا
*كان البرد شرطنا يا والينا
*بس في حاجه سعادةالوزير ماقلها لينا
*الفصول المافيها شبابيك ولا سقف يا والينا
*نقفل خشومنا ونتطم يا والينا
*ولا عند الوزير حلول لينا
سلك كهربا
ننساك كيف والوزير زي الفكي البقول شوتوا ارضي وفي الزاويه
والي لقاء
سلك
b_silik@hotmail.com
////////////
