(ڤيديو) إلقاء وإخراج: الأستاذ علاء الدين فوزي
٭٭٭
“يا جَماعَة عشرين سنة كضبت عليكم
قُلتَ لَيكم كلام كضب … عملتَ حاجة كضب”
٭٭٭
مِن قُمنَا مِن المهَد
شُفنَاك تَعِيد وتقول
بَحلف مَعاكم عَهد
أكان محنَة هسي تزول
وصبرنا صبراً جَدّ
ومَرضنا مالو حلول
لَمن دَخلنا اللَّحد
وموت الرِّجال مَحمول
٭٭٭
“يا جَماعَة عشرين سنة كضبت عليكم
قُلتَ لَيكم كلام كضب … عملتَ حاجة كضب”
٭٭٭
ناديت بِنحمي النَّاس
وَنحفظ شِمال وَجنوب
بعت البلد بِي نجاس
مِن نِمولِي لي حَنتُوب
وفقدت كل احساس
ودمّ القَلِب مخَضُوب
وعِدمَنا حتَّى لِباس
وَعرانا ما محجُوب
وزّعت اللّحم والراس
مِن حَقَنَا المسلوب
لا عفة لا إخلاص
لا دين ولا أسلوب
٭٭٭
“يا جَماعَة عشرين سنة كضبت عليكم
قُلتَ لَيكم كلام كضب … عملتَ حاجة كضب”
٭٭٭
لا عيشة لا كَرَاس
فِي زَمنَك المعطوب
لا موية يوم الباس
حَتّى المَلِح مَحجوب
فِي قبتَك قَنَّاص
وَدم الشَّهيد مرغُوب
لا حرسك إنت الخاص
في يومك المكَتوب
بَحميك من الرصاص
فالثورة عاد بتحوب
وحُكمك قَسَم بنقاس
وندوسوا بي مركوب
٭٭٭
“يا جَماعَة عشرين سنة كضبت عليكم
قُلتَ لَيكم كلام كضب … عملتَ حاجة كضب”
٭٭٭
أهلي الكرام …
رصاصة القناص
مَا بِتَكل المَحبُوب
بِكتُل سُكَات النَّاس
والخوف وجوهو ضروب
دَم الشَهيد بي كَم
ولَا السؤال مَحسُوب؟
بي حكمة بي اخلاص
برجع وطن بالطوب
عاد ما بنخاف دَسَّاس
لا أمن لا قنّاص
لا جيش ولا عسّاس
لا شرطة لا وسواس
ولا سجنك المغضوب
٭٭٭
“يا جَماعَة عشرين سنة كضبت عليكم
قُلتَ لَيكم كلام كضب … عملتَ حاجة كضب”
٭٭٭
كل المهالك دِي
تملَانا بس إحساس
تسقط حكومتك بس
ولو ما ضُقنَا حتى نُعاس
كاذب … كلام ونّاس
كافوري تحكي عُجُوب
قاعد في قصر الماس
للقمة نحنا نجوب
لا بد حليفنا النصر
ولابد نشِيل الكاس
٭٭٭
“يا جَماعَة عشرين سنة كضبت عليكم
قُلتَ لَيكم كلام كضب … عملتَ حاجة كضب”
٭٭٭
ما بهم نَجُود بالخاص
أصلو القلب مجذوب
وكفاية يَا رَقَّاص
حبل الكضب منصوب
لا عفة لا اخلاص
شوف وين قِيم حَبُوب
يوم نمسك احنا الفاس
ونَرفع علمنا يلوص
شوف لك جُحر جَندوب
يوم النصر فَرَّاس
قَرَّب وصار محسوب
٭٭٭
“يا جَماعَة عشرين سنة كضبت عليكم
قُلتَ لَيكم كلام كضب … عملتَ حاجة كضب”
٭٭٭
info@badawi.de
///////////////////
