ماتقول كده .. كده عيب .. بقلم: بابكر سلك

بسم الله الرحمن الرحيم
في السلك

•    عندي ابن عما لي اسمو محمد خير اسماعيل
•    برغم انو من اهلنا لكنه مامننا
•    من الجماعه ديك
•    محمد خير ده عندو ابن اسمه احمد
•    احمد عمرو ثلاثه سنوات
•    يعني علي الفطره
•    كنا بنتناقش انا ومحمد خير في الكوره
•    جات سيرة العجب
•    محمد خير قال لي عجب ماسوره
•    احمد انتبه
•    جا لي ابوهو وقال
•    ماتقول كده ….كده عيب
•    ابوهو فاتح خشمو لي اسي
•    لكن انا من الليله اي شتله ماعندي تعليق عليها غير عبارة احمد
•    ماتقول كده ..كده عيب
•    اي زول من الجماعه يقول كلام فارغ
•    نرد عليه بعبارة احمد
•    ماتقول كده …كده عيب
•    المهم
•    قريتوا موضوع خطاب الاتحاد المصري في خصوص الحضري ؟؟؟
•    شتل مستورد
•    شتل من خارج الحدود
•    لكن الموضوع مامشي علينا
•    ولم نعره اهتمام
•    ناس خالد نشروا صورة الخطاب المشتول
•    فات عليهم كثير من الملاحظات التي تفيد بان من شتل الخطاب ضعيف خبره بالعمل وغير مواكب في المعلومات
•    احسن تعليق علي الحته دي هو الملاحظات التي اوردها  الرائع شيبا بمنتدي جماهير المريخ
•    شيبا له الملاحظات التاليه
•    الاتحاد المصري لا يسمي المنتخب المصري بالفريق القومي
•    تاريخ انتقال الحضري للمريخ بالخطاب مكتوب 21/12/2011
•    ياربي يكون الخطاب ده بخصوص  انتقال الحضري للمريخ المره الجايه !!!!
•    صلاح حسني ومنذ العام 2008 وبموجب قرار الفيفا اصبح منصبه المدير التنفيذي وليس السكرتير العام
•    اما التوقيع فحدث ولا حرج
•    هذه بعض ملاحظات الاخ شيبه
•    ادخلوا منتدي الجماهير عشان تشوفوا الناس بتضحك عليكم كيف
•    ايسكوتي ايسكوتي
•    ميش الحضري بيلعب مع المريخ من دلوكيت  وهايتسجل في المريخ يوم 21/12/2011 ؟؟؟
•    ديه دي ؟ انت عبيطه يا بت ؟
•    علي العموم
•    شتلة خطاب الاتحاد المصري اثبتت ان ناس المشاتل بقوا خبراء غابات
•    ولكن تظل حسرة تسجيل الحضري للمريخ طوبه تغلق حلاقيم الحساد الي الابد
•    وارقص يا حضري وسط الشتول زي ماداير
•    بالمناسبه
•    الاخ الاستاذ العالم معاويه احمد السيد لديه رأي قانوني في هذا الخصوص
•    سينشر في هذه الصحيفه
•    حتي يكف اصحاب المشاتل عن الشتل من جديد
•    ايها الناس
•    لاتنسوا ان فريق البطولات لابد وان يكون لديه جمهور بطولات
•    واحنا ادها وادود
•    زي ماقال الحضري
•    المهم
•    ناس يقولوا ميشو باق
•    وناس يفاوضوا في العشري
•    منتهي التناقض
•    ايها الناس
•    بروفات التشجيع محلها التمارين
•    والمباريات الاعداديه
•    والمباريات التنافسيه الداخليه
•    قالوا الهلال متابعة لشكواه حول عصام الحضري قد بدأ اتصالاته بمحامي سويسري شهير
•    ياناس
•    محامي سويسري حته واحده كده ؟
•    الزول ده مابكون غالي شويه ؟
•    دحين مابدور مقدم اتعاب ؟
•    من فين ياحسره ؟؟؟
•    زي ماقال الحضري
•    اديكم فكره
•    في حاجه اسمها العون القانوني
•    ناس العون القانوني ديل بقدموا الخدمات القانونيه للفقراء مجانا
•    شوفوا نمرة العون القانوني السويسري كم
•    وشوفوا زول يدينكم رصيد
•    اتصلوا عليهم
•    اشرحوا ليهم موقفكم المالي
•    وقدموا قرعتكم
•    اذا وافقوا
•    شوفوا زول يدينكم قروش
•    رسلوا ليهم الحيثيات بال ( دي  اتش ال )
•    الخوف بعد ناس العون القانوني السويسري يقروا كلامكم عن عدم قانونية مشاركة الحضري مع المريخ
•    يقولوا ليكم
•    ماتقول كده ….كده عيب
•    لكن لو مالقيتوا زول يدينكم رصيد
•    موتوا بغيظكم
•    لما تشوفوا الحضري
•    غمدوا
•    وارقص يا حضري
•    ماتقول كده ….عيب الكلام ده
سلك كهربا
           ننساك كيف وسط الشتول دي !!
والي لقاء
سلك
babikir maki [b_silik@hotmail.com]