سعيد شاهين اخبار المدينه تورنتو
طبعا يا جماعة الخير ما ممكن اقول لعمر البشير بمناسبة الذكرى السنويه للانقاذ {هى الكم دى مافى داعى ليها} المهم ما ممكن اقول ليه راجع بيانك الاول وقارنو بالوضع الحالى تعرفو ليه لانو ببساطه حيقول لى انت لسه ما قشيت ريالتك دى؟ وطبعا مافى داعى للاحراج ده لكن بالجد انا بلوم الناس الحاسدين ديل البيقولو عمر البشير فاشل والانقاذ فاشله بلومم لانو دى حساده وابرهن ليكم انهم نجحوا
شوفو اولا بالتبادى اولاد حسن البشير كولهم كانو وين وبقو وين اها برضو تقولو لى فاشلين
شوفو ناس لحس الكوع كانو وين وبقو وين
شوفو الناس الورثو من ابوهم حواشه كانو وين وبقو وين
شوفو القرو طب فى جامعة الخرطوم لما كان العشا فيه باسطه ولبن غير الفطور والغدا والداخليات وكلو مجااان وتجيب اهلك واصحابك وفيهم الكان جاى بى شنطة الحديد وراكب الضهارى لما اللوارى قبلن شوف ديل عملو جامعاتم براهم ومستشفياتم براهم وفيهم العملو الحاجات التانيه غير تطبيق شرع الله بجداره فى مثنى وثلاث ورباع دى غير الفكه البى تحت تحت وما ملكت ايمانكم برضو تقول فاشلين
وعشان دى كلو يتحقق لازم يزيلو اسباب ما جعلهم يصلو الى هذه القمم ومن اسبابها مجانية ومجانيه دى البتجنن فازالوا كل اثار مسببات نعمهم مجانية تعليم مجانية قرايه مجانية علاج طيب اذا ما نسفو المجانيات دى ياكلو عيش من وين وشن فايدت انقاذم ونجحو تماما فى كل ذلك
ونجحوا فى تهليك القيم السودانيه
وتطالعنا الاخبار فى شهر الانقاذ وشهر رمضان بخلاصة المشروع الحضارى وحصاده ولانهم نجحوا تماما اهدوا الشعب السودانى حصيلة حصادهم من داخل هيكل اهلالكهم من داخل مكان لا سبيل للشيطان من دخوله ولكن لان البشير قال انهم حيروا الشيطان ذات نفسه فقد قدموا للشعب السودانى حصيلة حصاد سنين دولة الشريعه فى ما تناقلته الصحف من محاكمة الفكى شيخ الخلوه الذى صال وجال فى اعراض يفع شفع اتمنه اهليهم له باعتبار طهر المكان فاذا بشيطانهم يعربد داخل اروقته
يا جماعه انتو مخكم بقى ظلت ولا شنو الرساله واضحه انو الفكى ما براهو الاغتصب الانقاذ بتغتصب فى السودان ارضا وجوا وبرا وبحرا وما تحت الارض وما بينهما
وكلو هى لله هى لله والزعلان البركاوى فى موجود وبرضو تقول لى فاشلين ديل العايزنو بعملو والمعاجبو يشوف ليه اقرب حيطه يتكل عليها
waladasia@hotmail.com
//////////////
