اصل الحكاية
محمد عثمان خليفة قال ( بعبع الفيفا لن يخيف الوزارة ) ، ومدير إدارة الإعلام قال ( تصريحات محمد الشيخ تخصه وحده) وقال برضه ( الوزارة ردت بمذكرة عبر وزارة الشباب والرياضة الاتحادية والاتحاد العام لكرة القدم بخصوص إستفسارات الفيفا في هذا الخصوص) ، وللعلم فقط محمد عثمان خليفة إداري سابق محدود القدرات إن لم يكن بلا قدرات ، وهو راجل محظوظ عشان كده بقي سكرتير إتحاد الخرطوم في غفلة من الزمن ، وإن كان إتحاد الخرطوم ماعايز حظ ، الطريفي ( المازول نصيحة) كان سكرتيره ، وقس علي ذلك عدد من كوادره آخرها حسن عبدالسلام ومجموعة الفشل الحالية ، كلها نماذج تعكس الحال الذي وصل إليه هذا الاتحاد ليأتي اليوم الذي يصبح من علاماته محمد عثمان خليفة والطريفي الصديق وحسن عبدالسلام نماذج تسبق الفشل ويسبقها .
نعود لمحمد عثمان خليفة ، الذي إنتهي به الفشل في العمل الاداري الطوعي إلي موظف في وزارة الشباب والرياضة الولائية براتب شهري ، محمد عثمان خليفة يرد علي محمد الشيخ مدني ، شفتو المهزلة ؟ ومدير الاعلام بالوزارة يرد أيضا ، شفتو الكارثة ؟ وياريت لو قالوا حاجة، كلام الطير في الباقير ، محمد عثمان قال ( بعبع الفيفا لن يخيفنا) ، والغريبة اتفقوا الاتنين علي إنه التعيين بعد يومين ، لو إخدنا حكاية (البعبع) دي وإفترضنا (الفيفا مابعبع) طيب، بدوي الوزير عمل لجنة للترجمة وتفنيد الخطاب لي شنوووووو؟ ولو ( مابعبع) بدوي الوزير رد ولا مارد ؟ الاجابة رد ، السؤال ردو مشي وييييين؟ الاجابة مشي الوزير الاتحادي ، ليه؟ مش قال حايرد للفيفا شخصيا ، ليه مامشي الاتحاد وسلم الخطاب بنفسه ، ليه مشي الوزير الاتحادي ، وبرضه تقول ( مابعبع) الوزارة راح ليها الدرب يامحمد عثمان خليفة (طشت عديل) .
ويامحمد عثمان خليفة لازم تعرف قرار تعيين لجنة تسيير لو جاي من جهات عليا أو جهات وسطي أو حتي صغري ، بعبع الفيفا وراك وراك والكلام بقي مافي إنها جاية ولا ماجاية ، إنت عارف وانا عارف وكلنا عارفين إنه العنتريات مكانها صفحات الصحف فقط ، وإنكم بتحاولوا تظهروا قوة ماموجودة ، مع إنه الخوف ( كتلكم) ، ياخي إنتو من شدة مامرعوبين كاتبين في ردكم الماحيصل الفيفا ( البرير زمان أدي حكم جزائري بونية وعندنا شهود) ، دي ذكرتني بنكتة بايخة جدا جدا ، بتقول ( في واحد راكب المواصلات شماعة والبص ماشي سريع فجأة داس فرملة جابت الناس الوراء قدام ، واحد من الخلعة قال : دي فرملة ولاخروف) ، الدخل الفرملة مع الخروف أقصد الدخل البونية في حل المجلس شنو ؟ بالله في بعبع أكتر من كده .
محمد الشيخ مدني كرياضي متقاعد كتب كلام واضح ومحدد ، وماعايز رد ، وماتضيع زمنك في رد إنت عارف إنه مامفيد وقرار لجنة التسيير ماشي ، عندك واحد من حلين يا إما تعين لجنة التسيير خلال يوم او إتنين يعني اليوم أو غدا ، يا إما تغادر وظيفتك من غير آسفين ، ويابدوي الوزير تستقيل ها الحين .
رايك شنو في كلام إنه مافي خطاب وصل من الفيفا وكل الحاصل ده مسرحة هزلية ، سمعت بالاخبار دي ؟ معاك الفكرةغبية والجهل مصيبة ، لكن نتعامل مع الخبر بجدية يمكن يطلع صاح ، ولو طلع صاح يبقي اللجنة الكونتها الوزارة ناقشت خطاب مافي ولا شنوووووو؟ والرد السلمتوهو للوزير الاتحادي رد شفهي ولا شنوووو؟ الموضوع ماعايز كلام كتير ، عين لجنة تسيير سرييييع يا بدوي أوع تنط في النهاية كرامتك بتهمنا يابدوي ، قلت الرئيس المعين منووووو؟ .
hassan faroog [hassanfaroog@gmail.com]
