مرحبا بالزواحف الخضراء .. بقلم: راشد عبد القادر

________

ببساطه..
قوى الحرية والتغيير ما هى الاسقطت حكومة المؤتمر الوطنى و نظامه..
القوى دى ما كانت ومازالت الا جهة تنسيقية للحراك و موكل ليها ادارة الفترة الانتقالية و ح تخطئ وتصيب و ح تستعدل و تنتقد من الناس القدموها..
الاسقط نظام الانقاذ ملايين الشباب والشابات فى امتداد السودان من قرورة للجنينه و من حلفا لكوستى و كتير جدا رفعنا فديوهات ايام الحراك لمناطق سقدان شرق و صوارده فى اقصى الشمال وقرى ومدن بعيده طلعت بي رجالا ونسوانا وبناتا وشبابا..
مشكلة (المخلوعين والارزقية) ديل قايلين الاسقطوهم ناس الحرية والتغيير و بيظنوا معركتم مع الحرية والتغيير..
يا ما فاهم مشكلتك مع اغلب الشعب السودانى دا مع جيل من الشباب كان و مازال ما فارق معاهم يفقدوا ارواحهم زى عباس وعبدالعظيم او عيونم زى امانى او اياديهم زى المصرى طالب جامعة الخرطوم والاف المعتقلين فى السجون حتى نهار 11 ابريل..
كان همهم ومازال انه ما يشوفوكم تانى فوق راسم عشان كدا وانتو بتقتلو فيهم وتطاردوهم بالبمبان و تعفصو الناس بالتاتشرات والبكاسي فى عزاء الشهيد محجوب كان الحراك بيزيد والناس ما بتخاف بتطلع اكتر واكتر لانها عندها هدف وحيد انكم تسقطوا..
السقطوكم جيل راكب راس استمر فى الشوارع تسعه شهور متواصله وهسع بيراقب و مستعد يواصل تانى وتالت..
لو بتظنوهم غافلين تبقوا وهمانين و لو بتظنوهم خايفين تبقوا وهمانين و لو بتظنوهم يائسين من بكرا و مستعدين يقبلوا يرجعوا سفهاء وتافهين و مجرمين زيكم تبقوا وهمانين..
اطلعوا الشارع واعملوا مسيرة وكوركو و اهتفوا واعرفوا انكم (محميين) بي اخلاق شباب الثورة العارفنكم واحد واحد كتائب ظل وامن شعبى وارزقية وضباط جهاز (زى انس عمر) وما سألوكم..
هم الوفروا ليكم الحرية دى لانها شعار ثورة (حرية سلام و عدالة)..
احترموا الثورة دى وشبابا الوقفوا عزل قدام بنادقكم و دوشكاتكم و ما تراجعوا..
ديل فرسان..
والفارس بيسكت عن شجاعه و بيعرف وقت تقل ادبك يعفصك و (يختك فى فتيل) برضو عن شجاعه و بي مزاجو و فى الوقت العاوزو هو…
المهم..
ايتها الزواحف الخضراء انتم فى حمى الثورة بدون كدمول وبدون اغتصاب لبناتكم وبدون قتل لاولادكم وبدون فقء لاعينكم وبدون اسياخ فى ادباركم..

https://m.facebook.com/story.php?story_fbid=1278220555701776&id=100005415311189

الكاتب

طارق الجزولي