(1)
التقشف هو أن تقطع الحكومة يدك.ثم تذهب لتشحد بها.
(2)
الشعب صار مثل مالك الحزين.بل أكثر حزناً منه.يبدو لى وأنه خلال
ال27عاما التى خلت. إستنفذ كل رصيده من الفرح والسعادة.
(3)
علم الجغرافيا وشقيقه علم التاريخ يؤكدان سودانية حلايب وشلاتين.ولكن
الجانب المصرى يريد أن يتوصل (لحل ما )عن طريق علم السياسة.وهو ما
يرفضه علم الجغرافيا والتاريخ وايضاً علم المنطق.وكافة الشعب السودانى.
(4)
أيها المواطن أنت تعرف أن الغائب عذره معاه.ولكن انت مالك؟وماهو عذرك؟
وانت(عامل فيها).لا أرى ولا أسمع ولا أتكلم.قم تحرك أو (إتغطى كويس وأشخر).
(5)
مصلحة السودان وشعبه هى أولاً وثانياً واخيراً.وخيرٌ فعلت الحكومة.عندما أُوقفت
(وأتمنى أن يكون الايقاف نهائياً)إستيراد السلع الاستهلاكية والمواد الغذائية من
مصر(دعك من حكاية مصر يا أخت بلادى ياشقيقه ياوريقه.دا كلام أغانى ساكت)
فالاعلام المصرى شخصياً أثبت بالصورة والصوت.عمليات سقاية ورى المحاصيل
الزراعية بمياه الصرف الصحى.(شوف القرف دا كيف)بل وفى هذه الايام تشهد
بعض المزارع
ندرة وشح حتى فى مياه الصرف الصحى(شفت كيف)ولو كانت هناك كلمة أسوأ من
السؤ.لكتبناها عن
الزراعة المصرية التى تًسقى بمياه الصرف الصحى.واليوم رُفعت الاقلام وجفت الصحف.
وصحة الشعب السودانى.صارت قضية رأى عام.بل هى قضية آمن قومى.لا يجب
التنازل عنها.ودعك من حكاية(نحن أخوات)وإحنا اولاد النيل.
(6)
مرة كده لقيت ليك(والافضل لقيت ليكم) عمك أبو الفنون.زهجان وزعلان وكاد
(يطرشق)من الزهج والزعل.وسألته تطفلاً (مالك ياحاج زعلان كده)فقال لى
(انتو شابكنى ابو الفنون ابو الفنون.وين هى الفنون؟وانا ذاتو سمونى مسرح عشان
يعرضوا فوقى المسرحيات.مش طوااالى شغالين غُنا فى غُنا.وياريت هى ذاتا اغانى
ليها قيمة او تسعد الناس.وكمان بعد دا يجى كل زول شايل معاهو جردل تسالى وفول
سودانى وترمس.وواحدين شالين صحن تمباك وهاك ياوساخة وياقرف,وسيبك من ناس
السجاير.وفى برضو حاجات تانية.)ثم جر نفس عميق. حتى اننى ظننت انه مات.ولكنه
قال(وبعدين وين هى المسرحيات.البتناقش مشاكلكم؟وعليك الله وفى ذمة
الكبيرة دى.العاملة
زى ذمة بعض المسؤلين.قريب دا شفت ليك مسرحية إستمر عرضها كم سنة؟وكمان
تعال شوف مسارح الولايات خرابات بس.ومثلا فصل الصيف دا فى الدول الراقية فرصة
للاسر عشان تمشى المسارح وتتفرج على المسرحيات الجديدة.ولكن واسفاى من ناس(وذكر
لى أسماء كمية كبيرة من المسرحيين)البستغلوا المسرح عشان يسوقوا انفسهم.او يعرضوا
برامجهم الانتخابية.وفى ناس عاملين المسرح دا بزنس عديييل كده..وقبل أن يواصل عمك
أبو الفنون.قلت له (يظهر عليك ياحاج انك زول ممكون ساكت ولكن صابر؟)وقبل ان يستحفل
عمك فى الاجابة.ويقوم فينداح.ويُصرح ويُسرج ويودينا الى (فجات على وزن
حتات)ويُدخلنا
فى امكان تجيب لينا الهواء البارد.قلت له(عليك الله ياحاج أسكت شوية
خلينا نشوف الزول
البغنى وينطط زى القرد على المسرح دا..فقال لى إنت ذاتو كان ماقرد تقطع
تذكرة بتلاتين
جنيه عشان تتفرج ليك على (ياى)ملعون أبو المسرح.لابو….وتباً.فلا أب لكم.
(7)
نريد حُجةً يتيمةً.لا أخ ولا أخت لها.بل لا كافل لها.تُوضح لنا لماذا
مُنع دكتور زهير
السراج والاستاذ عثمان شبونة من النشر الورقى؟إذا كانت تصفية حسابات (قولوا لينا)؟
وإذا كان الامر مجرد جبروت وإستغلال سلطات وإستعلاء(برضو وضوحوا لينا)؟وإذا
كان المذكورين أعلاه(الدكتور والاستاذ)إرتكبا جريمة فى حق الوطن والمواطن.فيجب
ان يُقدمان للمحاكمة.وهناك سيظهر الحق وتتضح الحقيقة.واللهم فك اسر وحظر دكتور
زهير السراج والاستاذ عثمان شبونة.وعجل لهما بالنصر وبالفرج.وردهما سالمين غانمين
للقراء والمحبين.
tahamadther@gmail.com
