خارج النص
ما شُفنا لينا جماعة جابت ليها رئيس تخرج في مظاهرة ضد رئيسها الجابتُو!!!
(التجمُّع الإتحادي المُعارض يدعُوا للمشاركة في مليونية 30 يونيو والريِّس محمد ود الفكي قااااااااعد في القصُر)!!!!
وما شفنا لينا حزب حاضنة سياسية لي حكومة يخرج ضد الحكومة الجابها!!!
(الحزب الشيوعي السوداني يدعُوا للمشاركة في مليونية 30 يونيُو وحمدُوك وقادتُو المشاركين في الحكومة يتمتعُون بكامل صلاحياتهم في الدولة)!!!
للأسف يحدث هذا من ساسة الدهشة والدغمسة في سوداننا الحبيب…
في أُورُوبا والدُول المُتقدِّمة أحزاب الحكُومة تصلِّح حكوماتها من جُوَّة.. بدُون ما شعبها يعلم.. وعندنا هنا بالذات الشعب مُو كلُّو سياسيين.. اليوم اليوم في مناطق قريبة من الخرطوم دي قطِع شك في ناس مُو عارفين رئيس الدولة الحالي منو؟؟ بالدارجي كدي معظم الناس ديل ناس معايِش بس.. فشنُو يا ساستنا الكرام الله يرضى عليكم.. اتشاكلُو لا فُوق فُوق واتصافُوا واتصالحُوا وتعالُولنا بي نتاجكم المقرون بي خيركم على البلد.. ودا ياهُو العاوزينُو نحن..
*خارج النَّص:*
أول أمس طلعت مظاهرة في منطقة الكدرُو –أياً كانت مطالبها- المُهم قُتِل فيها شاب ثلاثيني (محمد أحمد عبد الله) بطلق ناري وهو يبث فيديو لهذه الإحتجاجات على الهواء، نسأل الله له الرحمة والمغفرة وأن يعوِّض شبابه الجنة.. آلمني جداً تجاهُل الحكومة من أعلى مستوياتها إلى أدناها لهذه الحادثة الخطيرة.. قتل مُتظاهر وبالرصاص وفي الخرطوم بالقرب من مكان الريِّس بينُوم.. تنُوم السهر آ البُرهان وشعبَك يُقتل بمجرد خروجه في مظاهرة!!!
واندهاشي الكبير كان من تصدِّي بعض الدجاج الإليكتروني وتصنيف القتيل بأنه (كُوز).. نان لو كُوز يُقتَل؟؟؟!!!
لو تساهلنا في مسألة القتل بالرصاص دي.. تبقى عوجة كبيرة.. اليوم كُوز بكرة مُو معروف منو.. وساعتها لا ينفع الندم…
أرجُو من وزير الداخلية ومدير عام شرطته وبقية الأجهزة الأمنية والعدلية أن تسعى بقدر ما تملك للتحقيق في هذه المسألة الخطيرة وإيصال الجُناة إلى ساحات العدالة..
.
.
.
*ويظل سؤالنا الدائم.. البلد دي السايِقَها منوووووووو*؟؟؟!!!!!
jamal.trane@gmail.com
