سبتمبر2026
موسى المكي
يا وطناً يصول بالجهر
ما بالسر
فِدَاك العمر بالقومات
نكابد دِيمة في دَربَك
مع الجايات
وفي الصخرة المقاما الروح
على الربوات
عِدَاك الشَّك وخُزلان الضَّمير
والذَّات
عِدَاك الموت يهَدِّم ساحة
اللَّذَّات
ولِسَّا لِحَافنا فوق للنار
سريرنا قَبُر!!!!!
وِسَادْتَك يانديم الجُرح والآهات
كفاك النوم كفاك توهان
وراك ابليس خريف الكذبة
عِيشة الضُّر
سليل التِيه مع الشَّهوَات
كفانا صَبُر!!!!!!!
سَوادَك عُمرُو ما غَشَّاش
سوادك سَمْتَة
لا لَمَّة ذُنوب لا طاش
وليلنا الطَّال ضربنا طَنَاش
وكلما تْكُر ولحظة تْمُر
تَشَتِّت شملنا
الآفات
وقام القِبلِي فوق للكُل
جاب ضحوِيَة
كاتمة الضُّل
وما ضاعت بِذُور
في شَق
تَصُب الطَرفَة مُنسَابَة
بدون دودَاي
يَجِيها التَّلَوِي عِزَّ اللَّيل
كما الهَبَبَاي
تقوم شتلاتَك
السَّمحة
ضَرِيرة المانجو والباباي
وتتعاظم غَلاوتَك
يا خريفنا الجَّاي
جبل حِكْمَة واَنِين النَّاي
وغَيماتَك بنات الدَّهشَة
والاِصرَار
علينا رذاذِن الغنَّاي
ومن بابَك خطاوِي
اللَّهفَة والتِسْفَار
تَتُب عَجلَانَة من دُغشَاً
عنيد ندَّاي!!!!
وعلى بابك
نقيف يا حُر
نقرا نشيدَك الامطار
نشيل شَبَّالنا نُص الدَّار
وما هَمَّانا عيشنا المُرُ
يا وطناً يَلِم سَرحَتنا عِزَّ الحَر
وِلادَك غُر بناتك دُر
عصيَّ التُربِ يا دارنا
تؤدِّب كل من زارنا
ويَحِلَّك الله من زادنا
ومن كل البِوَسْوِس شين
يَحِلَّك الله من ابليس
وناسُو الكُلَّهُم خُنَّاس
ومن الغَم
جَنَا الوَسوَاس
نناديك لحظة التَّبرِيح
تعال اسمع كلام الرِّيح
عقيرتنا وبآخر صوت
نناجيك يا فرح
غايب من التاريخ
تعال آ الدُّخري ود الزين
تعال للتاية يا حدبين
وَاكْرُب زِندَك المُعفَارِي
كَربِت فوق غُراب البين
وعلى بابك نَقَرنَا كَمَان
نَدُق اوتارُو عز الضَيم
توَشوِش في المَحَاصَة دليل
ندندِن في غناوِينا
نناجِي المَطَرَة والضِّلَيل
نَعَمِّر في الضُلُمَّة شِليل
نَوَسِّم في الرُمَالة الخط
نَزَمِّل حِمْلَنَا الجَّوَّال
على من بات قَوَانَا الحيل
وكَفكَفْ من دُرُوبنا السَّيل
شَيَّد في قلوبنا الرَّيد
بناهُو سَرَايا بي ضانقيل
فتح ابوَابَا للفُقَرَا
وعلى الباب البِجِيب النٌّسْمَة
خاتِية الرِّيح
نَشِدَّ الحيل
نخَتَ الحِنَّة في
الكَف البِصُون العِرض
فوق للمال
نَسُوس الخيل
نَخُت الشَكرَة للكتف
البِسِند الحيل
نجيب الموية للعطشان
وصَايمَ الدَّهرِ خَاتِي المَيل
يا دوباي
يا حدباي
يا مسدار
عليك الخاوية في سرجو
وود العمدة في دربو
وابو الواثق كريم وِردُو
ومَكَّاً يوت حبيب رَبُّو
بلا تجريف ولا تخريف
ودون تحريف
مبيتنا الفيض عيال الفيل
نقوم من تقلي للحُبَّاك
غُطانا الحُب وِلاد عَمَّك
ولا هَمَّاك
غير تلقي الاهل مَاسْكِين
دِرَيب اللِّيرِي و ام طَلحَة
مَلَان رايات
خَدَار وسِبَحْ
ودَارَات فيها كم صُبيان
وِجُوْهْ تَريَانة
ناس ضَيفان
على ابشَرَمَة وحِجير الدَّوم
نَشَقِّل في سَرَايَاتْنَا
نَصَفِّر لي مُرَاحَاتْنا
نَخُت الشَّيلة في ام فَكرُون
نعاف الشَّينَة والشَّرِكَات
ونرفع اِيدنا بالدَّعوات
الله يَسَدِّد الخُطوَات
الله يَسَقِّط الدَّجَّال
وتَعمُر تاني ساحاتنا
وتتقدم كمان درجات
ونتقدم
بفوق الدنيا
في كاما وفي تِرمِي
وفي الكِرِّيس
اَخُو الشَّيخَات
