سودانايل أول صحيفة سودانية رقمية تصدر من الخرطوم
أخبار أخرى
إبراهيم خالد أحمد شوك
shouk84i@yahoo.com
بلد تَسَع المنافي
خِيار محبِّيهو
بلد مغبون
تمدّْ إيدك
تجود بالعونْ
يختوَّ العُقدة
في المنشارْ
يقاشرو القال يداويهو
بلد رهنوهو
هدّو قواهو بالإفقارْ
يفتِّش زول يواسيهو
يحتارْ الحِفن كرعينو
غايتو القُصوى يرضيهو
طول العمر بالتِّحنان
أعماقو تضاريهو
بطيب خاطر يدِّي
السُّلطة حاميهو
منتظرو يقود الخطو
يختا الحفرةْ
يتحزَّم ينجِّيهو
يزيل خازوق تربَّع سادْ
يلجِّم مصدر الإفسادْ
واسباب الحصاد البورْ
يخون عهدو يجور
يصبح حراميهو
بلد يشكي
لطوب الأرض
قضيتو ومايعانيهو
مصايبو الكدَّبت فيهو
تور في ساقيةْ والدوَّامةْ
ما بان في قعيرا قرارْ
سال الدَّم طفح أنهارْ
طغت جبخانةْ
بدل يحرسنا
مِن تالاهو جاتنا مهانةْ
كلّ ميليشيا
فاقدةْ قيادةْ
شاهرة أحقادا
سانَّا أسنانا
تلغي هيبة الدولةْ
بلد يتشابا لإعانةْ
فُتات يدمغنا بالذِّلةْ
ما غَرَس التَّواكل
أو حصد غلَّةْ
تزيد تتعمَّق العِلَّةْ
بدل ما يكون عزيزْ
والعُليا إيديهو
نعيمو الكابِّي ماليهو
ريعو العبَّا ما ليهو
عمار تريان مغتِّيهو
فيض ثروات يكفِّيهو
عديم الذِّمة شاريهو
يطفِّف في موازينو
يخازي مع المعاديهو
ما بنقدر نجازيهو
تسطِّر تبدع الأقلامْ
نقول أروع كلامْ
نخلص نغنيهو
نسدّْ باب الهوانْ
يرفع راسو مايتهانْ
مابنبخل تحاوطو
قوانا نبنيهو
لو ندرك مقامو
نصون معانيهو
نمُرق اللُّقمة
من أفواهنا
رضيانين نحابيهو
من الشِّريان نغذيهو
يشرب من كؤوس العزّْ
لا ضيم لا مآسي تنزّْ
في حضن المتانة يغُزّْ
بعد داك مايصيبو
عوزْ ولا يتهزّْ
تبذّْ الخَوَر الأزمنْ
جذورو العاتية تتمكَّنْ
تتَّمسح وعود تنسابْ
بشاير أمنياتنا تسابْ
وتنهض يا بلدْ
تتوكَّا حلم الغدْ
أنهار الوفاء تعتدّْ
تَبرّْ أحضان مجاريهو
تسخا نفوسنا نتساعدْ
تِبِرْ مجهودنا نجنيهو
يعود زهو السِّنين الفاتْ
الفي الغربة عانى شتات
يضمُّو أمان مراسيهو
عُصبة فتيَّة نتوحدْ
مدارسو مصانعو تتجدَّدْ
مزارعو الوافرة تتمدَّدْ
معامل أبحاث من غير حدْ
تمام الصَّحة ينبع من مشافيهو
مُحال يُهزم بلدْ والشَّعبْ
مواعين طاقة لا تنضبْ
يندم لو سلك
دربو القِبيلْ جَرَّبْ
ناضج شبَّ
حلمو الرَبَّ
قاب قوسينْ
صالب طولو يملصْ
توب سوابقو الشّينْ
يقطع ضُمَّ طاريهو
ضارب خيلو عصفورينْ
لا بتعبْ ولا بضهبْ
كارب حيلو شادِّيهو
بريطانيا
سبتمبر 2025
