أصل الحكاية
لما تعرف إنه إتحاد الكرة إجتمع بالهلال والمريخ وأهلي شندي وحذرهم الإقتراب من الحكام الأفارقة ومرافقتهم ، ولما تعرف إنه الإتحاد قال ليهم وبالحرف الواحد (أبعدوا بعيد الحكام ديل مسؤوليتي وأنا البحدد مرافقنهم ماإنتو وأوعكم أوعكم من الليلة القي لي نادي جايب مرافق لحكم جاي يحكم مباراته الأفريقية) يجيك إحساس إنه الحكم ساكن جبرة ولا الصحافات أو الثورات قول أمبدات ، ماحكم جاي بطيارة من دولة تانية ، معروف وصولها الساعة كم ، ومعروف حاينزل في ياتو فندق ، ومعروف حركته في البلد كيف ، بكون في الفندق من كم لي كم بيقابل المراقب والمسؤولين في الإتحاد متين وكيف؟ بمشي السوق متين ويجتمع مع الطاقم واللجنة المنظمة ويتمرن ويزور الملعب ده كله معروف في ياتو وقت.
طيب الجديد شنو ؟ وليه الإجتماع مع الأندية الثلاثة ؟ مش الطبيعي إنه الإتحاد هو المسؤول عن كل مايتعلق بالمباراة تنظيميا بمافيه إستقبال الحكام ومرافقتهم ؟ ومش الماطبيعي إنه أي جهة تانية تقوم بالمهمة دي؟ وكأنه الإتحاد إكتشف الذرة وعرف الكلنا عارفنو وهو ماعارفو ، ودي المصيبة ودي الفضيحة ، بصراحة لما عرفت خبر الإجتماع فكرت جادي إنه دي ضربة البداية للبطولات الافريقية أول بطولة أندية ينظمها (الكاف) ولسه الناس ماعارفه أساسيات التنظيم (الحكام يجو كيف ؟ يستقبلهم منو؟ يرافقهم منو؟ لكن أن تكون بطولات بالتاريخ الطويل ده ويادوب إتحادنا العام أو إتحادنا الوطني لكرة القدم يجتمع مع ثلاثة أندية مشاركة في بطولة واحدة عشان يوريهم الليهم والعليهم .. أكيد كارثة.
طيب قبل الإجتماع ده كان بحصل شنو ؟ منو البستقبل الحكام ؟ ومنو البرافقهم؟ وليه نمشي بعيد، الهلال لعب مباراة في بطولة الكنفدرالية الحالية والمريخ لعب مباراة وأهلي شندي لعب مباراة منو الإستقبل الحكام ورافقهم في مباراة المريخ وإنتر كلوب الإنغولي ؟ ومنو الإستقبلهم ورافقهم في مباراة الهلال وأهلي شندي؟ إذا ما الإتحاد أكيد الأندية .. طيب والأندية بتدي نفسها الحق ده كيف ؟ لأنه المباراة مباراتها والمنصرفات عليها يبقي من حقها الدخول في إختصاصات خاصة بالإتحاد؟
ويبقي السؤال قائم الجديد شنو؟ إذا كان الأندية من زمان هي التي تقوم بهذا الدور شنو الجديد خلي الإتحاد يصحي فجأة ويقول ده حقي ومابدي ويحذر ويتوعد أي محاولة للإقتراب من الحكام .
الكلام واضح وماعايز مفهومية أو عبقرية ، هناك إتهامات وشبهات وأحاديث كثيرة عن التأثير علي الحكام لصالح طرف علي حساب الآخر وقد صعد هذا الأمر إلي السطح بقوة في الايام الماضية ..
عشان كده لما تعرف إنه الإتحاد إجتمع مع الأندية محذرا من إستقبالهم ومرافقتهم وتأكيده إنها مسؤوليته وليست مسؤولية الأندية أول سؤال بجي في رأسك نحن وين؟ لكن لما تعرف إنه الموضوع عنده علاقة بالريحة الفايحة عن محاولات شراء ذمم الحكام .. مابتسكت وتسأل برضه، طيب لو الموضوع ماعنده علاقة بمواجهات الأندية الثلاثة مع بعض في المجموعة الأفريقية، الهلال والمريخ القادمة والتي تليها والهلال واهلي شندي السابقة واللاحقة ، والمريخ وأهلي شندي الكورتين ، وكانت المواجهات بين أندية سودانية وافريقية .. الإتحاد كان حا يجتمع ويهدد ويحذر من إستقبال ومرافقة الحكام ؟ سؤالي عن المبدأ.
hassan faroog [hassanfaroog@hotmail.com]
