خارج النص..
18 أبريل 2020م
بالرغم من إختلافي الشديد معاها ومع آلها من بعدها من الأمويين والسفيانيين، لكن فيها شرف وعفة وكرامة مبالغة الهند دي..
بعد فتح مكَّة في العام الثامن من الهجرة النبوية الشريفة، وخطاب السماحة والرحمة المحمدية (اذهبُوا فأنتم الطُلقاء)… جات هند بنت عُتبة بن ربيعة مع بعض نساء قريش يبايْعِن سيدنا رسول الله صلى الله عليه وآله وسلم ودخلَن في رحابة الإسلام من أوسع أبوابه…
أها.. بعد البيعة تمت، وفيها شهادة أن لا إله إلا الله وسيدنا محمد رسول الله، إقام الصلاة وإيتاء الزكاة وصوم رمضان وحج البيت للمستطيع والبُعد عن الفواحش ما ظهر منها وما بطن، بالإضافة إلى كل فضائل الإسلام بما فيها عدم السرقة…
قامت قالت للحبيب المُصطفى صلى الله عليه وآله وسلم.. يااااااااا رسول الله.. أنا راجلي أبو سفيان دا زي ما انت عارفُو إيدُو زي القاااااااابضي كدي.. كان دخَّلتَ إيدي في جيبُو اتناولتلي دينار ولَّة درهمين دحين فيها شي؟؟؟
ردَّ عليها معلم البشرية… تشيلي قدر البيكفيكي ووليداتك بس…
وهسَّع إنتِي يا البتقري في الكلام دا… أوعِك تعتبري الكلام دا دافع لمهاجمة أوكار راجلك التحت البلاطة رقم 5 من (كِيمِي) الغرفة الشرقية!!!!
لع… فقط للكفاية.. وبما أن زوجك (ماهُو كنجُوس) وقائم بواجب بيتُو وعيالُو… فلا يجوز تمدِّي إيدك لماله أبداً.. إلا برضاهُو…
السؤال دا رغم بساطته يؤكد الورع الذي كان يكسي وقار هذه الهند.. وشَتَّان بينها وبين اللَّتْنَا دي!!!
* في لحظة صفاء بحضرة الدكتور توفيق الطيب البشير الخبير الإقتصادي بالرياض.. والكلام دا بالضبط كان في العام 2011م.. وكان حينها يادُوووب يفكر يبني وهُو المغترب منذ نهاية الثمانينات!!!!
قُمنا سألناهُو كم يكفي موظف (شاب) في بلدية ولَّة حكومة ولاية ولَّة أمانة مجلس وزراء ليبني عمارة من 3 طوابق في حي جبرة، الشارقة أو الشهيد طه الماحي؟؟!!!
إجابتُو كانت غريبة خلاص بعد ما أخد ليهُو صنَّة كدي..
قال لي بالحرف الواحد…
الشاب دا عشان يبني العمارة دي لابدَّ أن يكون من يوم ولدُوهُو شغال بيأخذ راتب وراتبُو لا يقل عن 5 ألف جنيه!!!
يجب على لجنة إزالة التمكين أن تأخذ هذه الإجابة والسير على هُداها في الإتجاه الصحيح!!!!
*خارج النص:*
من منطلق مسئوليته ولمصلحة الشعب السوداني أصدر الأُستاذ نصر الدين مُفرح وزير الشئون الدينية والأوقاف قراراً يمنع فيه صلاة الجُمع والجماعات بالمساجد.. قام بعض مهووسي الجماعات الإسلامية باللطم والعويل، وحاولو بسذاجة يُحسدوا عليها إيهام الناس بأن الحكومة منعت الصلاة بالمساجد…
لع.. عزيزي القارئ الكريم بي بساطة كدي الحكومة ما قالت للناس ما تصلُو وتعبدو ربكم اللي خلقكم من نفسٍ واحدة.. بس قالت عشان مرض كورونا دا ما ينتشر أحسن تصلُو في بيوتكم…
وبالمُناسبة الفتوى دي ما جابها سعادة الوزير من مكتبو ولا من هيئة علماء السودان… جابها من مجمع الأزهر الشريف حامي حمى الدين الإسلامي في الدنيا كلها مُو في مصر والسودان وبس.. أها تاني شنو؟؟؟
الناطق الرسمي بإسم الحكومة فيصل محمد صالح أمس خرج للناس بخطاب هادئ ولطيف جداً وجهه للأئمة الذين خرقوا قرار الدولة وأقاموا صلاة الجُمعة في تحدٍ صارخ لقرار المنع!!!
يا عزيزي فيصل، الله إبتلانا بنوعية من البشر للأسف لا يلتزمون إلا بالردع..
طيب الحل شنو؟؟
كل أئمة ومؤذني مساجد السودان مسجلين عندكم في الوزارة، صحيح؟؟ نعم..
تصلهم رسائل فورية وحازمة.. يأتي المؤذن فقط للمسجد… وبعد أشهد أن سيدنا محمد رسول الله.. يقُول.. الصلاااااااااة في منازلكم.. زي ما معمول به في الدنيا كلها… إنتهى الآذان… يقفل مسجدُوا ويمشي يصلي في بيتُو…
كل من يخالف قرار الدولة يُضرب بيدٍ من حديد.. دي جائحة كرونا مُو ملاريا ولة بلهارسيا!!!
اللهم أحفظ أهلنا وبلادنا وأرفع عنهم الوباء والبلاء والغلاء، متعهم يا ربي بالصحة وأدِم عليهم نعمة العافية… اللهم آمين…
.
.
.
*ويظل سؤالنا الدائم.. البلد دي السايِقَها مِنُوووووو*؟؟؟؟!!!!
jamal.trane@gmail.com
