يا أحلى يوم في حياتي
يوم لاقتني
يوم لاقيتها ولع شأني
اجمل صدفه
يوم كانت خلود النجفه
سرحانه في عبيرها المستريح
سر القمر والضفه
ما بين الهوى الرقراق
وجريان مشاعر الإلفه
يوم المنى الهَلَّ
ولوَّن أفقنا بشوقو
وحرك مسارب أمنياتنا التحفه
ساعة لقانا بنفسج
يوم بَقَّ فينا الحب
وضمتنا الحروف في وقفه
يوم السمحة جات مليانه ريد
مليانه إحساس بالجمال
مليانه اشتعال
غليانه فيها الشِّفَّه
عَبَّاني ريدها في لحظتها
وشعرت بالدنيا التقول صبوها
في ميعادنا داك اليوم
لوحة غرام كانت هناكا وهَفَّه
تسبي الشعور
ريانه
ماشه في وَقْفَه
غَالَبْنِي الكلام في الحب عِدِلْ
وغَلَبْنِي صمت القول عديل
اتغابى فيني العِرْفه
وين سيد الكلام يا زول؟
ووين ذوق السحاب الرفَّ ؟
وْوين طَلَق الحديث في هواهو
وكت القلوب تغرق بعيد تِدَفَّا ؟
بس ترجم مشاعري صمت الكون معاي
وزازتني فيهو الذكريات ام رجفه
دارت كل خواطري الوالهه
ترشف في كاسات السعادة
ساقية الوداد الترفه
تودي وتجيب في سماها
تهديني الورود الطاعمه
ما هماها
وتهامس في العيون الوطفا
تلمس خاطرها الولهان
تداعب في القليب أب تِفَّه
يا حلاة الصدفه لما تكون
صُدْفَةْ معاني عميقه
فارده جناحها فينا مُصَفَّى
تهش في إيدينا أوتار الأمان
لمسات الأماني الجارفه
وتحضن قلوبنا انسام الولف
دعاشات الأمل
إشعاعات الوئام الصرفه
وكان البينا مرسوم من زمان
راجينا بي خلجاتو
رسمة قدر مختلفه
وكانت مشاعرنا قويه صادقه
رقيقه
هاديه
ساكنه الشعور اللهفه
أبداً ما خانتنا داك اليوم
ولا خانا تيار الأصيل
الضام جناحو ولَفَّه
ولا خذلتنا حِن الأمنيات
نديانه باسمة في شُرْفَه
زي تحايا الموج هناك
متلاطفه بينها الرأفه
لا إبر الرحيل تعنيها
ولا دمعة فراق في مرفا
عبدالماجد موسى
٢٠٢٠/٧/٢١
seysaban@yahoo.co.uk
