ذلك اللهاث المنقطع النفس الذي مارسته (نانا) وزيرة العروس المفوضة عن أمور ومستلزمات ومتطلبات كل (العروسات) في عموم شمال السودان والي أقاصي حدود ولايات التماس ، وكانت حذرة جدا ً في تحديد خطي طول وعرض إمبراطوريتها بأن لا تتجاوز حدود 1956 ـ يا جماعة .. إمبراطوريتها المتوقعة والمتخيلة والمحمية في ركن مورّم من يافوخها ، لم يسبقه في سرعة إتيانه بالصور المجنونة والسخيفة واللامنطقية إلا الأسعارـ حدث تحوير كثير في متطلبات وزيرة العروس المفضية الي عروس زينة وعاجبانا نسخة 2013 عندما بدّلت نانا وعدّلت وإستعاضت وأعادت تدوير الكثير من الأشياء والموروث والمتبقي والفضل لتنجح في وظيفتها وتؤمن ديمومتها كوزيرة مفوضة لعموم عروسات السودان ، فكانت نسخة 2013 التي غيرت فيها فستان الزفاف الباريسي الأصول والموضة والخطوط الي تفصيلة معتبرة لقماش لامع درجة ثانية ، فتشوا ليه في ركن من سوق أم درمان حتّة حتّة وما عرفو إلا فؤاد القبطي .. دلاهم عليه ومشي طوالي، نانا بعد ما إشترت قطعة القماش ، إحتارت تقنع العروس باللون دا كيف لأنو من شدة القماش ما قديم لونو لما إتمسح بقي خاطف لونين من عصر الجلابية أم كشكشة في الوسط ديك ، قالت في نفسها تقنع العروس بأنو التشكيلة دي بالذات (إليجانت) جدا ً ، وتشرح ليها إنو كل الحضارات العظيمة بتستعين وتستلهم من تاريخها وتعمل علي إعادة تدويرو ، يعني شنو كان ظهرت وهي لابسة جلابية بكشكشة بدل فستان الزفاف ، وبدل حنطور الزفة ، شحدت ليها كارو جديد ولساتكو شدة من سوق ستة وأقنعت صاحبو يأجرو ليها تلاتة أيام وكمان البرسيم والدريش عليها (بتاع الحمار طبعن ) ، المهم هسة فضل ليها بدلة العريس ،بدلة كيف كمان ؟! يعني العروس تكون لابسة بدلة والعريس لابس جلابية ؟ هيّ .. أقصد العريس لابس بدلة والعروس لابسة جلابية ؟ نلبسو هو ذاتو جلابية ، طيب فطور العريس نعمل شنو ؟ ، قالو كمان أم العريس حالفة غير قدرة الفول ما تخش بيتها حاجة ـ الغتيتة .. إختارت أغلي شئ ـ ..! ماعلينا ،ندبر ليها قدرة فول إن شاء الله من السليم .. نعمل شنو؟ خلاص.. هسة فضل ليها الأشبينات ، أها ديل كيييف ؟ تجيب ليهم جلاليب من وين ؟ إستلهام كبييييير من اللقطة الشافتها في فيلم (ذهب مع الريح) ، المشهد داك … البطلة تشدّ ليك ستاير الحيطة كدا ، وتخيط منهم فستان زي الورد ، كمان هسة ديل جا وقتهم ، لكن خسارة ..! ستاير ماركة ، إشترتهم زمن الكان زمن من محل في شارع الرياض ما بستورد إلا تركي بس .. طيب .. أم العروس ..؟ إسماعيل الترزي، قال في توب ستو قالت يطقو ليها وحتشيلو بعد أسبوع ، أها في الأسبوع دا حيؤجرو لنانا بمليون ونانا تأجرو بمليون وخمسين جنيه ، كدا إتحلت .. تاني شنو .؟ فضل تكلم ناس برنامج (إطلاق سراح) عشان يجو يصورو ليها العرس ..قالو بدوها تلاتة دقايق علي شرط التوصيلة من والي بيت العرس عليها ، وافقت بشرط بعدين الكاميرا تركز علي الستاير بتاعتها العملتها فساتين للأشبينات ، ويكون في شريط علي الشاشة فيهو رقم تلفونات نانا كلها ، محلي ودولي وخصوصي دا لناس الخليج عشان أسعارهم براااااها ، وكمان عشان توريهم رقم حسابها الكائن في بنك بإحدي الجزر ما بعد الكاريبي .. هنااااك . أها طيب تاني فضل شنو ياأخواني…؟!
zizetfatah@yahoo.com