سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• والله لكن الحتانه قصتها قصه
• الحتانه مزحومه زي الحنانه شهر تمانيه
• طبعا الحنانه شهر تمانيه بتكون زي الترزي يوم الوقفه
• زحمه شديده
• المناسبات والاعراس كلها والسمايات شهر تمانيه
• بالمناسبه دي قالوا في حنانه فنانه
• الناس عندها بالحجز
• تقول للواحده ختي الحنه الساده في بيتك
• هي ما بتعمل شئ غير الرسم
• اها
• الحنانه دي قال ليك عندها مشكله نفسيه
• بيت العدل بتاعها لسه مانزل
• وطبعا لما يجوها بنات صغار ومتزوجات الغيره بتحرق حشاها
• المهم
• اي خلل تشوفوا بتستقلوا في التنفيس عن غيرتها المكبوته
• اها
• قال ليك يوم جاتها واحده متطنقعه
• ويادنيا مافيك الا انا
• قالت للحنانه وريني الكتلوج اختار لي نقشه
• الحنانه طبعا كل النقشات قاطعاها من راسها
• راسماها في كراسه
• ادتها الكراس
• صاحبتنا المتطنقعه قلبت الكراس زييييييييييين
• اخيرا اختارت نقشه معينه
• قالت للحنانه انقشي لي دي , زي ماياها , صفقه ماتنسيها
• الحنانه الغيره كاتلاها
• قالت ليها اقعدي
• مدي رجلينك ديل
• تفاجأة الحنانه بسيقان مسامير بس
• اخير سيقان سلك
• عاينت لي حقاتها وقالت مهمهمه الرجال ديل مابشوفوا ولا شنو
• المتطنقعه قالت ليها مالك ؟
• الحنانه قالت ليها اسي كراعك دي بتشيل الشجره العزلتيها دي ! والله رجلينك ديل الاتنين تيراب الشجره العزلتيها ما يشيلوهوا
• المهم
• الحتانه اتملت زي الحنانه
• الناس كلها مشت
• مافي زول مابستاهل مبيت الحتانه غير غانا
• الوحيده المفروض ماتمشي الحتانه
• لكن الاورغواي عملوها ظاااااهره
• مشوا نيالا
• معقوله ضربة جزاء في الشوط الرابع في الوقت بدل الضائع تدق في الماسوره !
• ابو ماسوره بقيت دولي ولا شنو ؟
• ناس كاكا باتوا بي هناكا
• ماردونا
• الالمان حيروهوا
• ميسي بعينو ما شافها
• ناس هتلر ربطوا ليهو مكنه ون تو ثري
• وجهجهوا ليك
• ماردونا بكي واستغفر
• تتذكروا ماردونا لما قال لو شلنا كاس العالم بحوم في الشارع ساااااي
• مولاي كما خلقتني
• داير يتفرعن يعني
• لكن ربك موجود
• وطار
• حتانه
• الحتانه دي بلد محترمه يا ديجو
• يافرعون قبل تجي الحتانه البس بنطلون
• سمعنا تحت تحت قالوا في واحده من الاورغواي قالت زي ماردونا
• لوشالوا كاس العالم عيننا ما تشوف الا النور
• برضو ناويه تحوم
• ابشركم بالاورغواي في الحتانه قريبا
• نرجع لناسنا
• ناس لاسانا
• ناس ناسيانا
• دولارهم الفي ايدهم من دمانا
• وخلونا في الاعداد برانا
• معقوله ياناس نمشي برانا
• معقوله محترفين زي المطر
• كل يوم نتوقع وصولهم
• تلفونات مقفله
• دايما تأخير عن ميعاد الاعداد
• الليله بجوا
• بكره بجوا
• وفضل لينا اسبوعين لمباراة التأهل للكونفدراليه
• دي مسخره
• لايمكن ان يكون هناك عذر
• نحن نقبل ونطالب بعقابهم حتي لو كانت العقوبه حرمانهم من المشاركه الي آخر الموسم
• نحن صفوه
• نحب الانضباط
• تسيب وارقو ولا سانا كرهنا فيهما
• لو المجلس داير يبرد حشانا
• يعاقب من طرف
• انه احتراف وليس اغتراب
• من يريد ان يستمتع باموال المريخ دون ان يلتزم ويمتع فاليغادرنا من الاسماعيليه مايرجع معانا
• الكوره في ملعب هاشم الزبير
• نشوف
• دي الطريقه البتودي الحتانه
• والحتانه اتملت
• تاني الا الشارع
• ونحنا مادايرين نمشي الشارع
سلك كهربا
ننساك كيف بس والمعسكر لي اسي فاضي
والي لقاء
سلك
babikir maki [b_silik@hotmail.com]
