• الخريف واللواري بتقيف..الحمد لله على نعمة الظلط..
• والظلط معاه الخطر.. جنون السرعة ..زمان السفر باللواري وباصات النيسان..على الطرق غير مسفلته ماكان في حوادث طريق الا نادر جدا..صاح وقت السفر كان أطول…. لكن درب السلامه للحول قريب .
• الخريف .. الجايه من السما بتتلقاها الواطه..الواطه لازم تكون جاهزه.
• الخريف على الابواب… عشان مايقولوا فاجأنا.
• الخريف برضو ممكن يكون شديد …عشان مايقولوا أمطار غير متوقعه.
• النفايات + المطر = أمراض.
• مجاري تصريف مافي + مطر = سيول وخراب بيوت.
• حكمة : الإستعداد للخريف يبدأ من الشتاء.
• اذا خايف من المطر قول (اللهم حوالينا ولا علينا، اللهم على الآكام والظِّرَاب وبطون الأودية ومنابت الشجر)
• المطر والكهرباء مابتلمو.
• الحاردلو في مربعه الشهير يقول (الخَبَرْ اللكِيدْ قَالُو البُطانَه اتْرَشَّتْ
سَارِيةً تَبَقْبِقْ لا الصَباحْ مَا انْفَشَّتْ)..ابشــر بالخير..
• الخريف في الغرب خاصة كردفان حيث الاراضي الرمليه له نكهه خاصه تخضر الارض وتجيك ريحت الدعاش تنعش النفس.
• الخريف في الشرق والوسط (الجزيرة) يحمل تباشير للمزارعين ..أرض الطيبين.
• الخريف في الشمال بيكون معاه فيضان النيل وخير كثير..
• اهل توتي..(عجبوني الليله جوا ترسوا البحر صددوه) ..ملحمة الرجال مع فيضان النيل..عشق الارض.
• الخريف في الخرطوم..ربك لطيف بعباده.
• (خرفتو) لا لسع شباب.
• المطر بركة ورحمة..اللهم اجعله خريف خير وبركة.
m_mohd987@hotmail.com
