” شويه هلوسه “
قام وزير طاقه من نومه فجرا .. مليان حماس ، و “صلى على عجل ” ، ثم انتزع هاتفه من الشاحن واتصل بوزير ماليه ووزير تجاره ووزير عدل ، وكمان نائب عام (تم حذف الالف واللام لضمان عدم التمييز) .. المهم ، قاليهم عمكم محمد احمد عازمنا شاى الصباح عند حاجه ن….. ست الشاى الهناك في طرف الشارع جنب تقاطع هناي قصاد لفة بتاع .. قال شايا خرافي وباللبن المقنن والاحمر منعنع .. وما نتأخر ..
التقو هناك واستقبلهم محمد احمد وطلب ليهم الشاى .. وبعد ما شفط شفطه طووووويله قضت على نصف الكوب واتبعها بزلابيايايه مولعه نار واتمطق قاليهم : شوفو يا اولاد .. البشريه ما انتقلت من العصر الحجري عشان الحجار خلصت من الدنيا وبقت ببح .. انتقلت عشان اكتشفو حاجه احسن .. وكمان هسه البشريه حتنتقل من ال fossil fuel ما عشان خلص من باطن الارض ، بس عشان اكتشفو ال clean energy .. وعشان كده لازم تنتبهو انو الحديد الكوري المالي الشوارع ده مبوظ البلد وعامل ازمه صفوف المحروقات ، واسعار خاص وما خاص وتلوث بيئه .. انا بقول تقعدو تتدارسو وتصدرو قانون يلزم كل مستوردي السيارات انو 50% من استيرادهم يكون سيارات كهربائيه ولمده خمس سنوات .. وبعد الخمس سنوات يكون الاستيراد 100% سيارات كهربائيه .. والمغتربين اعفاء 80% من الجمارك لمن يجيب عربيه كهربائيه .. وتعملو محطات شحن للبطاريات في الشوارع الرئيسيه مع امكانيه الشحن المنزلي .. وتبعتو شباب يبقو مهندسين سيارات كهربائيه .. وشوفو كم حتمزقو من فاتورة المحروقات وانهاء الصفوف والتهريب والسوق الاسود وتنضيف الجو .. وطبعا يا وزير طاقه المسأله دي عايزه كهربه ثابته عشان كده فكر نووي يا بطل .. انا هسه ماشي المقابر ازور بت المجذوب والزين ومصطفى سعيد واولاد ود حامد رحمهم الله ، ولما ارجع ليكم توروني رايكم شنو ؟!!!
لكين .. ، وفي هذه اللحظه بالذات ، وبلا مقدمات ، وقبل ان تزول الدهشه من وجوه وزراء .. صحى زلوط من النوم ..!!
طيفور البيلي
fatimaelbeili@gmail.com
