عناية عُلماء السودان مع التحية والمحبة .. إسقاط الأُضحية هذا العام

 

 

جمال أحمد الحسن
26 June, 2023

 

الرياض 25 يونيو 2023م

إلى مشائخنا الكرام بـ(هيئة عُلماء السودان)... السلام عليكم ورحمة الله وبركاته...
أرجُو منكم التعامُل مع موضوعي دا من باب التذكرة والتنبيه والتناصُح فيما بيننا...
كما تعلمون الظرف التاريخي الدقيق الذي تمر به بلادنا وهي تخُوض هذه الحرب/الغزو التي فُرضت على شعبنا الطيب المُسالم المُنهك إقتصادياً، وذلك بتمرُّد قوات الدعم السريع على جيشنا الوطني...
ليه ما تِتْبَنُّوا مشروع: (السنة دي تسقُط الأُضحية على الشعب السوداني للأسباب الآتية)!!!
أيوا بالوااااااضح كدي... تطلعُوا عبر تليفزيون السودان وتقُولُو للشعب السوداني...
والله يا اخواننا... الضحية دي أصلها ماها واجبة... سُنَّة بس...
وبي سُنَّتَها دي... يؤديها الزول القادِر تَب... وعندُو ما يقدر عليها... وبما أننا مالكية والسادة المالكية قالُو *(تُسَن)* للزول العندُو قروشها ومُو محتاجلها في سنتُو دي... ولو احتاجلها في سنتُو دي... تسقُط عنُّو... وبما إنكم يا شعبنا الطيب المُسالم لا تملكُون ثمنها خليهُو من فائضها!!!
دَحِين نسبةً للظرف البتمُر بيهُو البلد اليومين دي... من حرب وتشريد ونهب أموال وترويع وجُوع وغلاء والقروش في رقبتها دي ماها موجودة... لا تضحُّوا السنة دي ونحن ذاااااااتنا ماني مضحين معاكم...
تعرف... حا تكُونوا عملتُو أمر عظيم... يُخلِّده لكم التاريخ... وتجدُون الثواب والأجر عليهُو من رب العباد...
فهلاَّ همِّيتُو بالأمر دا؟؟ أرجُو ذلك...
ربما هناك سؤال مشروع يأتي بالصيغة التالية:
ليه كل واحد فينا ما يعمل العملية دي بدون ما تقُول ليهُو هيئة علماء السودان؟؟؟
الإجابة ببساطة: الأمر عندما يأتي من جهة شرعية مُعتبرة بيرفع الحرج و(الحَسَسْ) عن المُو قادر.. لأن كثير من الناس الضحية دي قاعدين يتديّنُووووها ويؤدونها كمظهر إجتماعي أكثر من كونه عبادة ودين!!!
...
..
.
(من نفَّس عن مسلمٍ كُربةً من كُربِ الدنيا نفَّس الله عنه كربةً من كُربِ يوم القيامة، ومن ستر مُسلماً في الدُنيا ستره الله في الدُنيا والآخرة، ومن يسَّر على مُعسرٍ في الدنيا يسَّر الله عليه في الدُنيا والآخرة، والله في عونِ العبدِ ما كان العبدُ في عونِ أخيه)...
# صدق رسُول الله صلى الله عليه وآله وسلم...

jamal.trane@gmail.com

 

آراء