سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
· في اي مجتمع تظهر مصطلحات خاصه به
· تلك المصطلحات تتداول بين افراد المجتمع الي ان تصبح لغة تخاطب وتفاهم
· من تلك العبارات المصطلحه كلمة اربعه
· بدأت بين السواقين وسعان ما انتشرت
· واربعه في لغة السواقين تعني الزول المابعرف يسوق
· واستأسد سائقوا الركشات بتلك العباره
· يعني اي سواق ركشه اربعه الي ان يثبت العكس
· حاجه السره قررت تقيل مع بتها تيسير
· طولت ما مشت ليها
· حمودي ولد علي ابن حاجه السره قال ليها ماشه وين ياحبوبه ؟
· السره قالت ماشه ناس تيسير عمتك
· حمودي قال ليها ما شه بي شنو ؟
· قالت ليهو ماشه بي ركشه , تمشي معاي ؟
· حمودي قال ليها : ركشه ! لا لا لا 00 ديل كلهم اربعه
· السره قالت ليهو اربعه ليه 000 اصلوا موديني الجنه ! جنيهين بس
· حمودي ضحك 00 حبوبتو ما ناقشه اربعه يعني شنو
· قال ليها اربعه ده الجنه عندو اقرب من السوق 00 اعملي حسابك وما تركبي مع اربعه
· السره مرقت ووقفت في الشارع وقفت ركشه
· بتاع الركشه وقف
· مشغل استيريو السماعات اكبر من الكنبه
· السره شايفه وما سامعه
· كوركت وطي المسجل ده يا ولدي
· بتاع الركشه وقف المسجل
· السره قالت ليهو ماشه العباسيه ميدان الربيع
· بتاع الركشه قال ليها اتفضلي يمه
· السره قالت ليهو ما تقول لي اربعه ؟
· بتاع الركشه ضحك و قال ليها اربعة شنو يا حاجه , معاك معلم 00 نحنا الركشات دي كنا بنسوقها من زمن كانت بي لستكين
· السره ركبت
· بتاع الركشه طلع كضاب
· مابعرف يسوق
· وفووووو جاب الركشه قدام حافله لما بتاع الحافله طلع خلي الشارع
· ولفه ليك عكس
· خت نمره اتنين وفحط
· ركشه بتفحط
· السره الفيها كملت
· كلامها كتر
· سواق الركشه شغل المسجل عشان ما يسمع السره ونقتها الكتيره
· ورا بتاع الركشه كان ماشي بتاع بوكس
· السره خافت وقالت لي بتاع الركشه هنا هنا
· بتاع الركشه وقف ولفه في نفس الوكت عكس
· بتاع البوكس فرمل بسرعه
· سواق الركشه قال لسواق البوكس انت ما بتعرف تسوق !
· سواق البوكس قال ليهو انت ماشي قدامي فجأه القاك مقبل علي
· سواق الركشه دور وطلع وقال للسره ياتو شارع
· السره قالت ليهو خش بالكبري ده
· سواق الركشه انبرم ليك
· السره تكورك 000 الخور الخور الخور
· وبتاع الركشه ما سامع
· المسجل كان صوتو عااالي شديد
· وروووووو
· كب ليك الركشه والسره جوه الخور
· الجماعه في البيت سمعوا وجروا للسره في الحوادث
· حمودي قلت ليك يا حبوبه ناس الركشات ديل اربعه ساااي
· قالت ليهو اربعه يعني شنو ؟
· قال ليها اربعه يعني ما بعرف يسوق
· السره قالت كورة مازيمبي انتهت ؟
· حمودي قبيل يا حبوبه
· قالت انتهت كم ؟
· حمودي قال انتهت خمسه لمازيمبي
· السره قالت قلت ليك الهلال ده خمسه ساااي
· حمودي قال ليها خمسه يعني شنو يا حبوبه ؟
· قالت ليهو الزول المابعرف يلعب وكيشه بقولوا ليهو خمسه
· حمودي ضحك وقال ليها من الليله تاني مابنقول ماسوره بنقول خمسه
· وهم في الحوادث جابوا واحد متكلنوا وممكون شديد
· الدكتور قال ليهو شاعر بي شنو ؟
· المريض قال شاعر راسي لافي والارض لافه
· الدكتور قال ليهو افحص لي الهلال في الدم وتعال , اصلوا اليومين دي في مرض جديد اسمو انفلونزا المواسير
· المريض قال المرض ده صعب يادكتور ؟
· الدكتور قال ليهو بستمر خمسه ايام بس , اساسا بجينا من افريقيا وبالتحديد من الكنغو , اسموالعلمي مازيمبي موبوتو مولوتا
· المريض قال العلاج شنو ؟
· الدكتور قال خمسه جرعات خمسه مرات في اليوم لمدة خمسه ايام ويستحسن تاخد الجرعه جوار النيل مع الكماين
· المريض قال كماين دي يلقوها وين ؟
· الدكتور قال في الحتانه
· تتذكروا قصة بغلة عبد الخير !
· البغله فاتت الخيل ووقفت
· والله الشايفو انا تكمل وقفتها هنا ومافي داعي للجري تاني
· الرشيد قال مدرب المريخ الجديد عندو صلعه وكرش
· زكرتني يا روشا قصة البت البايره كلما يعزموها عرس واحده من صاحباتها الغيره تكتلها ولما ترجع البيت اول حاجه تقولها العريس شين وعندو كرش
· امها قالت ليها اقعدي انت ارجي السمح
· هلالابي قال لمريخابي تشمت فينا من تاني يوم
· المريخابي قال ليهو ماشمت فيكم من تاني يوم
· الهلالابي قال ليهو انا شايفك شمت فينا من تاني يوم
· المريخابي قال ليهو والله ما شمت فيكم من تاني يوم , شمت فيكم من تاني قوون
· والله سعدت جدا باختيار اللورد عبدالرحمن زيدان للقطاع الرياضي
· وسعدت بانضمام حاتم عبد الغفار لدائرة الكره
· وحاتشوف ياوالي مدي الانضباط
· شكرا جمال
· شكرا مجلس المريخ
سلك كهربا
لو الخمسه مسخنه بيكم تعالوا عندنا حوض سباحه باااااااارد
والي لقاء
سلك
