حوار علي قدر من اللطافة … بقلم: عزيزة عبد الفتاح محمود
17 May, 2010
ــ عندك ماجستير في إدارة أعمال وقاعد تبيع عطــوروفي محل ما ملكك كمان؟!
ــ ما تندميني إنو قلت ليك الكلام دا .
ــ لأ كان واضح من طريقة كلامك إنك شخص مثقف .
ــ مثقف..؟ أهو شايفة الثقافة وصلتني وين.
ــ بالعكس أنا شايفة إنك ما إستفدت من تخصصك وإنت داخل المحل الماعاجبك دا
ــ تقصدي شنو؟
ــ كلامي واضح ..ماقدرت تفجر أي طاقة من شهاداتك المتخمة دي
ــ ممكن تشرحي أكثر؟
ــ طيب ، العطور دي مش هي خلاصة نقية لأشهر العطور الباريسية زي ما مكتوب في اللافتة ؟
ــ أيوة ، بنجيبها من سورية وبتحليل معين بنبيعها للزبون.
ــ ليه ما فكرت إنك تبتكر ماركات خاصة من بيئتنا هنا وتسجل براءتها وتستفيد منها إما إنك تبيع العلامة أو ..
ــ دقيقة ..دقيقة ، إنتي فاكرة الموضوع بالسهولة اللي بتتكلمي بيها دي ..؟
ــ أنا عارفة الموضوع ما سهل لكن كمان مكاسبو ما هينة ، إنت عارف إنو في مصر القريبة دي في دورات تدريبية لصناعة خلاصة الزهور .. ياسمين وورد بلدي وغيرها وعندنا هنا في تدريب يؤهلك لتطوير منتجك وحصولك علي الآيزو ..
ــ ما عارف ليه حاسي إني بسمع في برنامج إنتخابي ..
ــ طيب شكرا، مع إنك ما دافع حاجة.
ــ بالله .؟ أنا أدفع عمري كلو
ــ سلامة عمرك ... المهم قلت شنو ؟
ــ في شنو ؟
ــ نبدا مشروعنا ..؟
ــ تقصدي ياتو مشروع ؟
ــ الخطوبة .. إنت نسيت..؟!
zizetfatah@yahoo.com