ليس فقط .. بقلم: بابكر سلك

بسم الله الرحمن الرحيم
في السلك

•    امامنا تحديات جسام تنتظرنا  في بطولة افريقيا للمحليين
•    الفوز بالبطوله ليس  فقط هو الهم الوحيد
•    مساندة فريقنا بمنتهي الوطنيه والقوميه ليس فقط هو الهم الوحيد
•    انجاح البطوله جماهيريا وتنظيميا ليس فقط هو الهم الوحيد
•    حسن ضياقة الفرق المشاركه ليس فقط هو الهم الوحيد
•    تجهيز ملاعب ملائمه ليس فقط هو الهم الوحيد
•    اختيار فنادق رائعه تستضيف البعثات ليس فقط هو الهم الوحيد
•    ولكن هناك ما هو اهم مما ذكر اعلاه
•    النجاح الامني هو هدف يجب ان نعمل من اجله كلنا
•    الحمايه
•    للفرق المشاركه
•    حمايه امنيه لهم ولممتلكاتهم
•    حمايه امنيه للجمهور
•    فلا يعقل ان ننادي الجمهور للاستادات ولا نحمي امواله
•    كلكم لاتنكرون سرقه السيارات جوا ر الاستادات
•    عربات تتسرق كلها بي عضمها
•    اصحابها يدخلون المباريات للاستمتاع والتشجيع
•    يخرجون وتبدأ رحلة البحث عن العريه
•    عربات اخري تكسر ويسرق ما بداخلها
•    تخيلوا لاقدر الله لو طلع من الاستاد مشجع افريقي مقيم بالبلاد او عضو بسفارة بلده لدينا
•    ولقي عربيتو مكسوره
•    ومنهوبه
•    نودي وشنا وين ؟
•    تخيلوا لاقدر الله واحد من اعضاء البعثات فقد شئ يخصه داخل الفندق
•    نطير ياربي ؟
•    عشان كده
•    تأمين السيارات خارج الاستادات هو مسئوليتنا جميعا علي وجه العموم
•    ومسئولية الجهات الامنيه علي وجه الخصوص
•    دور الشرطه في المباراه لايقتصر علي الجلوس بجانب الدرقات خلف المرمي
•    ولا علي تعليق علب البمبان علي القاش
•    اظهارا للعين الحمراء للجمهور
•    ولا علي احضار تلاته كلاب عجالي
•    ولا علي مطاردة الدايرين يتزقوا في الصف بالحصين وتهييج الغبار في الناس الواقفين دغري
•    مهمة الشرطه اكبر من ذلك
•    هي في تطمين محمد احمد المسكين ده علي سلامة عربته خارج الاستاد
•    وهي في تطميننا علي سلامة اموال ومنقولات البعثات المشاركه وجماهيرها
•    وهي في الحرص علي ابراز وجه مشرق للبلد
•    ولانسان البلد
•    وجه نتشرف به
•    هو حقيقتنا
•    ولا نقبل من ضعاف النفوس ان يخروا سمعتنا
•    ودوليا كمان
•    شرطتنا بتقدر علي اي شئ دايراهو
•    واذا ختت الموضوع ده في راسها نمله ما بتتسرق
•    سمعتنا حقتنا ولا نقبل التهاون فيها اطلاقا
•    بالله في كم زول خلي الكوره عشان اتنشل في الاستاد
•    او اتسرقت عربيتو جوار الاستاد
•    او طلع لقي الطاسات مافي
•    او المرايه البي هناك مافي
•    والولد المحرسنوا العربه مافي
•    في كم زول بقي يخلي العربيه في البيت ويجي بالمواصلات للاستاد
•    في كم سيد حافله خلي الكوره وقعد بره الاستاد حارس عربيتو
•    ياناس
•    الموضوع ده لازم يتحسم
•    والبتحسموا جهه واحده
•    مادايرين تقصير
•    بعض الناس قد يقولوا واجعني اللاب توب
•    قول واجعني
•    لكني مادير انسان غيري يتوجع
•    بالذات الاجانب الضيوف
•    لاب توبات ناس سحري اتسرقت في الفندق في مصر
•    واتلقت
•    لانو الفندق فيهو كاميرات مراقبه
•    ياتو فندق عندنا بتمتع بهذه الميزه ؟
•    الله يسترنا
•    اها
•    الحرامي
•    ماعافي ليك دنيا واخري
•    يوريني فيك يوم
•    اها
•    مصر كيف !
•    لسه !
•    بمناسبة مصر
•    في خبر من الجماعه ؟
•    في الدقي ؟
•    بولاق الدكرور ؟
•    عزبة الصعايده ؟
•    ست الودع
•    كشكشي
•    برضوا ماعرفتي ؟
•    شوفيهم لي ما تختشي
•    في الفندق ؟
•    في الفندق جناح منو ؟
•    البرير ولا الكاردينال ؟
•    ولي كشكشي
•    فيلكس ده ما تشوفيهو لي
•    ماعندو شي
•    ولي كشكشي
•    اها
•    قالوا مبارك عمل اصلاحات اقتصاديه فوريه
•    تخفيض اسعار
•    زيادة مرتبات
•    وحاجات زي دي
•    يامبارك
•    القصه ما قصة رغيف
•    القصه انعدام احساس بامور مهمه
•    النزاهه
•    العداله
•    والمساواه
•    قناة الجزيره تقطع
•    قناة الجزيره ترجع
•    دي ما المشكله
•    لكن
•    تبقي الحقيقه
•    ياريت لو الاحساس بضرورة الاصلاحات كان قبل الشعب يقول كلامو
•    علي الاقل كان الشعب اقتنع بانك مهموم به ولاتحتاج لتدوير
•    البو عزيزي
•    دور مصر بسوتش براني
•    بالطرقه دي المسلسلات المصريه الجديده
•    يا اخ العرب
•    اجل يا رجل
•    كربتك كربتك كربتك
•    المسلسل سته ابطال بشر وتسعه عمم  وسطاشر حصان ورايه
•    وكربتك كربتك كربتك
•    بعد المسلسل الا ننضف البيوت من غبار الحصين
•    وكربتك كربتك
سلك كهربا
       ننساك كيف بس ؟
والي لقاء
سلك
babikir maki [b_silik@hotmail.com]