بسم الله الرحمن الرحيم
هذا بلاغ للناس
توطــئة:
معليش يا غبش معليش
لا عصيدة لا كسرة لا قراصة لا عيش
معليش يا غبش معليش
قالوا الوفرة هسه شيش كباب أو كباب شيش
والإمكانية تحبس بي شامبيون
وسجارة كمان
وهم ما عارفين السجار بقى أغلى من الحشيس
معليش يا غبش معليش
الموت أخيرلينا من نعيش
ويا الأغبش جلابيتك من كتر الرقع،
التقول درويش
والنعال كعبو اتنحل
والشرابات خيش
والولد من جودة التعليم جا الطيش
المتــن:
الحيكومة قالت والله إنتو بطرانين ساي
أكلكم "بيتزا وهوت دوق" وبتحبسو بالشاي
وبتحلو بآيسركريم الفاخر
إتذكر الصفوف يا الأغبش النسّاي
معليش يا غُبش معليش
نحن بنتحمل غلطكم وفراغة عينوكم
ما نحن الدايماً شايلين همومكم!!
وحارسين ثغوركم
عموماً وجهنا ديوان الزكاة يحلحل ديونكم
وبحق الدوا يفكفك مرضكم وكروبكم
إطمئنوا إنشاء الله السلع المخفضة حتملا بيوتكم
الحاشية:
ويا حيكومة والله من زيادة الأسعار الأغبش انخلع
لآمن الفي راسو شعر انصلع
والحيكومة قالت ليهو سيب الدلع
أثبت للزيادة وخليك جدع
خلاص يا الأغبش المقدور وقع
بلاش الجرسة والسكليب
إتحمل وما تجيب ليك عيب
بكرة أجمل من النهارده أصبر يا الحبيب!!
وخلي الجِرسة و البكا والنحيب
لسه في بترول جاي في الطريق ودهب كمان..
قريب دا حتغنى .. حضّر جيوبك يا الخمجان!!
الهامش:
الحيكومة قالت والله هسه الوزرا زيكم
وبس غالبينكم باليقين والصبر
لا فيهم متخوم ولا فيهم ختّاف صقر!!
والله كان ما الخجلة ساي يتسولوا ضُهر
يالغبش أسكتوا ساي كان على نواب البرلمان ،
ديل فقرانين وساءلين الله الستر!!
قصاصة:
الشكوى يا الحيكومة لغير الله مذلة
طالعين من سيول وما خليتونا ناخد نفس
ولا حتى اديتونا طلّة
صبرنا وسكتنا رغم اننا عارفين وين العِّلة
قال أكلكم بيتزا قال .. وهوت دوق كمان
والله من جوعنا حتى الكلاب غادرت الحِلّة
والله كان ما الايمان قوي كان طلعنا من المِلّة!!
Abubakr Yousif Ibrahim [zorayyab@gmail.com]
