بسم الله الرحمن الرحيم في السلك b_silik@hotmail.com *نكتب قبل مباراتنا ضد نيجيريا *نتمني ان يكون اولادنا قد اثبتوا وجودهم *الشريف لازم يعرف حاجه *اداء ونتيجه *اداء يشرفنا امام الشريف *ونتيجه تأهلنا وتبعد الشريف *المهم *المغرب خافت من الايبولا علي موطانيها *وكالعاده دقينا صدرنا *علي الرغم من اننا مفروض نخاف علي مواطنينا اكتر من خوف المغرب *فنحن شعب سنامو تعبان *ما بنستحمل اي (اسهالات ) *لو (بصقنا ) ساي بنفقد سوائل *يبقي مافي داعي يا حكومتنا تدخلينا في نفق مظلم وكفن ابيض *وبالذات هذه الحكومه فارسه *ما بتجر واطي اصلو *ما بتعترف باي وباء في البلد *ولو كمل البلد جت *عليه *وحفاظا علي المواطن السوداني الفضل *اقصد المواطن السوداني البطل *نرجوا ونلتمس ونخصم الحيكومه بي الله *تبعدنا بس من تنظيم بطولة الايبولا دي *ايبولا لأ *واذا الاتحاد الافريقي لم يقدر الحته دي *يبقي الاتحاد الافريقي دايرنا ننقرض بس *ياخ نحنا الملاريا ماقادرين عليها *النزله دي *اذا عالجناها بتاخد اسبوع *واذا خليناها بتفوت في سبعه يوم *سنامنا فاااااااضي *ونفس نبكي بيهو ما فينا *تروح بطوله ولا تقرضنا ايبولا *وحسنا فعلت جمعية حماية المستهلك ببيانها الوجيه *وادبها الجم في مخاطبة السلطات *وخوفها النبيل من اجل مواطن نبيل *ايها الناس *حكموا العقول والضمائر *وقصة ما بتجينا حاجه دي خلوها *نعم الجاتنا في مالنا سامحتنا *لكن البتجينا في ام رويحاتنا دي *اكيد ما بتسامحنا *ايبولا لأ *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *كان فتحتوا الباب لي ايبولا ما بتخلينا *بتقرضنا وتقرض اهالينا *كفايه العلينا يا والينا *تعرف يا والينا *ايبولا دي بتخلينا ننز دم من كل مسامه فينا *هو وينو الدم يا والينا *هو فضل فينا دم يا معالينا *الباعوضه ما خلت نقطه فينا *يبقي ايبولا لو جاتنا حا ننز الروح باي مسامه فينا سلك كهربا ننساك كيف وووووب علينا الايبولا جايه علينا والي لقاء سلك ///////
