سحر اسود ام ازرق ؟؟؟ .. بقلم: بابكر سلك

بسم الله الرحمن الرحيم

في السلك

*قلت ليكم الاهله ديل الذ ناس

*امس ورد في جوهرة رمضان ان هناك سحر في جوهرة الكارينال

*رمضان بقول في جوهرتو ان السحر اسود

*بالنضاره ولا بدون نضاره شفت السواد يا رمضان ؟؟؟

*سواد ساي ولا سواد اعظم ؟؟؟

*طيب السحر مدفون في استاد الهلال

*بالتأكيد ليضر الهلال

*وقل لن يصيبنا الا ماكتب الله لنا

*ان الله لايصلح عمل المفسدين

*لكن يارمضان قول السحر مدفون في الاستاد في امدرمان

*درونات شندي في شندي ودرونات الخرطوم في الخرطوم دي

*برضو من السحر المدفون في امدرمان ؟؟؟

*ده شيطان ولا سوبر مان يا رمضان!!!!

*علي كل ما اول يوم نسمع بي سحر مدفون في استاد الهلال

*قبل كده سمعنا بي حمار مدفون حي عدييييييييييل كده

*قد يكون ده الحمار يارمضان

*لانو في استادكم بتحصل حاجات غريبه

*تدق محل الحقنه الحكم يقول بنلتي

*هلال كادوقلي يكون احسن يطلع مغلوب

*مازيمبي يقول بسم الله يغلب خمسه

*من ناحية السحر مدفون

*مدفون يارمضان

*لكن الله يجازي الدفنو

*والعارف الدفنو وسكت

*والوصف العملو للدفنو

*والعملو

*وان شاء الله ربنا يفسده

*لان الله لايصلح عمل المفسدين

*ونطمئن يوم الاحد انو بطل وفشل وربنا ما اصلحو

*رمضان قال سحر اسود

*اسود شديد يارمضان

*ولا اسود نص نص

*موش احتمال يكون اسود فاتح ؟؟؟

*ولا ازرق يارمضان ؟؟؟؟

*بعد مرات يارمضان بعد الاربعين الازرق بتشاف اسود

*دقق النظر

*ايها الناس

*لايصرف جماهير الهلال عن حال الهلال الا الحديث عن السحر

*مسكين مكتوب الهلال

*وده سببو البوره

*دوليا ولا بطوله

*متلببين صفر البورة ده ومساهرين الليل كلو

*حبهم من طرف واحد

*المحببه لديهم ما شغاله بيهم

*وحال الاهله زي حال البت البايره وفاتها قطار الزواج

*طوالي تعمل ليك فيها مكتوبه

*وانو في زول كان دايرها زمان كتبها

*والعمل قدم واتعتق

*في واحدات بقولن حسادة من صاحباتن ايام القرايه

*واحده بتقرأ معاهن من الولايات

*لما رجعت ولايتها المشهوره بالرتينزات

*ربطت ليها واحده من النوع ابو كديس

*وفي وحدات بقولن هن المادايرات العرس

*دايرات يطورن حياتن ويقرن

*وفي وحدات بقولن هم وينم الرجال

*ولما الوحده تمشي عرس صاحبتها

*من الساعه عشره صباحا تتمكيج

*لاتخلي كستر بالبيض ما تمسحو

*ولا تخلي بيض بالطوه ما تمسحو

*والغريبه البرتكان

*تكرش ليك وشها بي قشرة البرتكانه لما البرتكانه زاتها تشك في نفسها

*تقول ياربي انا برتكانه ولا دومه

*المحلب بالليمون بعد تخمرو شويه

*تلطش بيهو محل حفر الزمن المشي وهي ناكراهو

*بعد داك زبادي بالصلصه تمسحو في الوش الببدأ من النافوخ

*بعد ساعه تطلعو بي خليط الخل بالكسرة البايته

*الزمن ده طبعا مافي كسرة بتبيت

*لكن هي بتبيتها مخصوص

*وبعد تطلع ده كلو

*ويطلع وش الملاح

*تقعد مع البدر البتردم الحفر

*والترويج والتلوين وتركيب شعر الحصين

*وتمشي الحفله

*طبعا الحفله معرض الخرطوم الدولي

*اغلب الفاتن القطر بجن عارضات وليهن اجنحه

*ولما ترجع البيت وزول يهببو ليها مافي

*تلفلف الصويفات الفضلن وتحضن الالقمر بي عويناتها

*امها تقول ليها عريس صاحبتك كيف

*ترد عليها بي حساده

*كبير وشين يا امي

*وانا لو دايره زي ده كان عرست زمااااااااااان

*وترجع الصباح لي مكتوبه وعاملين ليها عمل

*وعمرنا ما سمعنا قالت مخطوبه

*ده حال الاهله

*صفر كبير

*ويبخسوا اشياء الناس السيكافيه والمانديليه

*وقاعدين في بورتهم يقولو

*لو دايره اعرس زي ده كان عرست زماااااااااان

*وآخرتها يطلوا لينا بي مسحورة ومعيونه ومكتوبه

*ان شاء الله يارمضان السحر ده يبطل يوم الاحد

*نشوف الاتنين بتكتبوا شنو ؟؟؟

*عزام زاتو سمعنا انو مدفون ليهو سحر في ملعبو

*لكن سؤال

*نائب رئيس هلال كادوقلي قال

*في البدائل كان في لاعبين يستطيعون هزيمة الهلال

*ياربي قعادهم في الكنبه كان بالسحر برضو ؟؟؟

*طيب منو السحر مدربهم عشان يطش شبكه ويخت البغلبوا الهلال بره ؟؟؟

*يكون ناس هلال كادوقلي دفنوا السحر لي فريقهم برضو ؟؟؟

*سؤال مهم

*ليه يارمضان الهلال دائما بطير في رمضان ؟؟؟؟؟؟

*ايها الناس

*غرزه مشي المحكمه

*وفي لوزان لابنفع حمار مدفون ولا حصان

*قلت لي سحر اسود غامق يا رمضان ؟؟؟؟

*المهم

*بتاع بحر قاعد جمب البحر خلف البرلمان

*قالوا ليهو في نائب حلم بالرسول الكريم حملو للوزير سلام

*ضحك وقال ليهم قويه دي

*زي ده بجيبوهوا من وين الجماعه ديل

*اصلي

*قالوا ليهو والله القصه دي جد جد

*قال ليهم حلم بالحكاية دي

*قالوا ليهو ايوه

*قال ليهم ده نائب ولا نايم ؟؟؟؟؟

*ايها الناس

*ان تنصروا الله ينصركم

*اها

*نجي لي شمارات والي الخرتوم

*كان شفت يا والينا

*في سؤال حايص لينا

*الجقر الاكل كبارينا

*ما لو ما اكل دفاتر الضرائب المعموله لينا

*ودفاتر رسوم المحليات المفروضه علينا

*وحق النفايات البتشال من جوه عينينا

*ووصولات مخالفات المرور المطبوعه لينا

*والاوامر المحليه البتفرض المستحيل علينا

*وحصانة النائب البرلماني الجاهو في المنام اشرف الخلق نبينا

*وحملو السلام امانه لي وزيرا كده لدينا

سلك كهربا

ننساك كيف والعبارة الا محمد يا خلق الله

والي لقاء

سلك

b_silik@hotmail.com